2

奧飛驒。平湯溫泉旅館﹑平湯大滝結冰祭 Day4-5

平凡人 於 2016-04-29 20:00:00 發表  |  累積瀏覽 845

分類:主題公園 其他 長線旅遊 特色景點 公園 其他 郊遊 ;地區:其他
< 日本中部﹑關西﹑中國15天遊 >

第四天(續)

好耐好耐之前計劃白川鄉行程時,係冇諗過會去到平湯溫泉,因為呢道交通比較唔方便,而且又要走回頭路,所以都唔諗住去到咁遠;之前我都講過今年天氣好反常,一月中時白川鄉都仲係冇積雪,為左增加睇到雪既機會,我就計劃去位於奧飛驒溫泉鄉既新穗高,相信山上會易啲有積雪;既然去到奧飛驒溫泉鄉,一於試試呢道既溫泉,我就揀左比較大既平湯溫泉


高山濃飛巴士站有車開去平湯溫泉,睇好時間去到巴士站等車


去平湯溫泉既班次唔多,大約一個鐘一班,要睇清楚時間先好搭
http://www.nouhibus.co.jp/wp_rnw/wp-content/themes/nouhibus/routebus/takayama/timetable/hirayu_shinhotaka.pdf

係5號站牌等車就得


今次坐呢部係普通巴士,車底冇行李箱,拎喼上車就麻煩啲要搵地方安置佢


開車時唔滿,中途有個站突然多左一班疑似行山既香港人上車,部車就迫爆左


離開高山市區後,巴士向深山前進,唔知由幾時開始外面變成好靚既雪景




巴士一路係深山穿梭,外面啲雪又多又靚


大約一個鐘車程,巴士到達平湯溫泉,大半車人都係呢道落車;奧飛驒溫泉鄉包含五個溫泉,包括平湯溫泉﹑福地溫泉﹑新平湯溫泉﹑櫪尾溫泉﹑新穗高溫泉,每個溫泉都有特色,而大家既共通點係風景靚而且特別多露天溫泉,奧飛驒呢道仲保留有傳統既男女共浴溫泉,唔知有冇人敢試呢?


平湯溫泉巴士站係一間大型便利店,亦都係餐廳同溫泉


係巴士站呢道已經可以感受到比雪包圍,四面八方都係雪山






呢道都有間郵局(個時見唔到,早知就係道寄下明信片啦)


由巴士站去溫泉區好近,行出停車場轉左就已經係好多溫泉旅館




溫泉區唔算大,只係得幾條街




雪雕裝飾




行五分鐘就到今晚住既溫泉旅館「山之湯穗高莊」




穗高莊有幾間分店,平湯呢間算係比較平,今晚房價兩個人一泊兩食收費¥20000,係今個旅程住得最貴既一晚,我又覺得價錢OK bor;呢間旅館規模睇落都算大,黎到登記好證件錢都唔洗比就有人帶上去房間




一開門入到房,咁大間!
第一次住傳統日式房間,空間感好大,仲好靚!




窗邊都仲有位置


由窗口望出去係雪山




帶我地入房既姨姨入到黎幫我地沖茶,未住過啲服務咁好既酒店;黎到平湯呢道都冇咩好做,坐低休息一下




枱面有塊唔知咩係道,見餓餓地就打開佢黎食,原來係超好食既紅豆餅




個櫃好有叮噹既感覺


仲未夠鐘開飯就出去行下,走廊設計好有日式風格




食飯既地方就係呢道


得閒就搵定去溫泉既路




係旅館四圍行行




仲有時間就出去出面行下






呢道既雪靚過白川鄉好多,啲雪好似粉,好鬆軟拎上手好舒服


呢頭冇咩地方好行,周圍都係溫泉旅館






天黑lu,好多人已經上車去平湯大滝,我地要返去旅館開餐先,食完再出發




入住個時可以選擇食飯時間,我揀左食最早既六點,食完仲要趕去玩


準時返到房等開餐,放定枝飲品係窗邊打開窗雪下,仲好過放雪櫃


第一次住溫泉旅館咩都唔知,唔知晚餐應該係房間食定出面食?係房等左10分鐘都冇動靜就出去睇睇,原來食野地方係出面「料亭街」




料亭街由好多小房間組成,其中一間房門已經貼上我既名,係自己大鄉里搞到遲左到,好唔好意思;打開房門就見到晚餐已經係枱上啦


今晚主角飛驒牛


中間有鐵鍋燒牛肉,超好食




我地到左之後,職員將其他餸菜都送入黎,放到成枱都係


一路食一路有職員入黎沖茶同添飯,我同朋友都覺得日本既飯特別好食;今餐係旅程最豐富一餐,有得食又有得玩,試到日式料理而且味道仲好好,我係第一次食呢啲咁有特色既日本美食,好滿足


我食野食得慢,食到七點多啲先食完,返房拎背囊就出即出發;返房時見到原本房中間位置變成兩張床啦,雖然想訓落去,不過都要出去玩下先


快啲行返去巴士站等巴士;夜晚溫度低好多,不過頭先食完火鍋之後個人好暖,完全唔覺得凍


去到巴士站岩岩有車到,好多人已經排緊隊,我都要快啲過去排


平湯溫泉巴士站有專車接送大家去平湯大滝結冰祭,而且仲係免費tim,只要係祭典時間就會有車坐


部車會行雪地上山,為左安全要裝好鐵鏈


Hello Kitty係無處不在,哈哈


好多人等緊車,好彩都仲上到




搭左一陣車,去到「平湯大滝公園」


「平湯大滝結冰祭」係平湯二月一個特色活動,咁岩今日係祭典既第一日,可以順便黎睇睇
http://okuhida-fuyumonogatari.com/hirayu.php

一路行住雪地向山上行,啲雪又係好靚,踩上去有軟綿綿感覺,完全唔會「扇」,係上面跑步都冇問題






一路落住雪,好好feel


路上有一啲特別燈光,幾靚架;難得一個咁靚既地方冇咩人,就咁行下當係飯後散步都好開心


差唔多到瀑布之前有一個好多人聚集既地方,係一間小商店,又野食又有野飲賣,而且仲有野派,我岩岩先食飽暫時冇幫襯




呢道仲有一個火堆比人取暖,不過火堆旁邊既雪地溶到變晒冰,一個唔小心除時係呢道仆低(好彩唔係我)


唔知呢隻白色馬騮係代表咩呢?佢好可愛架有人行過時會同人打招呼又會發出一啲得意聲音,仲會同人影相




現埸溫度係零下七度,都唔係好凍姐




繼續向上行多幾步就會見到瀑布


終於見到呢個行程最重要既地方「平湯大滝」,即係「平湯大瀑布」


平湯瀑布係飛驒三大名瀑之一,冬天好多地方都結成冰,中間有小小流水經過,佢同我地距離都有啲遠,感覺唔係好澎湃


冇咩人,哈哈


有舞獅表演,日本獅子同我地平時見開既好唔同






大家都係道聚集睇表演;祭典之中可以比我地欣賞到當地特色文化,都幾得意丫




當地小朋友就咁爬上山當滑梯玩,佢地童年真開心,可以點玩都得




睇完舞獅之後有得玩呢個,大家可以親手試






有免費既酒派比大家,而且仲大大杯,呢個應該係米酒,可惜我唔飲酒只係飲左一啖已經頂唔順...




都係火爐邊最舒服


係時候走啦,同瀑布講再見


祭典仲有煙花睇,不過放煙花既地方係下山既公園入口附近,係瀑布上面望落去有啲遠,開頭成班人係上面倒數仲以為係瀑布上面放...


雪好靚架,好似粉一樣




白色馬騮仔好受歡迎,去到邊都比人捉住影相,我一早已經同佢影左啦,哈哈


今晚活動九點結束,行行下啲人走得七七八八,我都唔知九點之後仲有無車走,即刻趕時間向山下跑去,要跑返去頭先落車既停車場




停車場仲有好多人係道,即係仲有車啦?就算無車坐都唔驚既,最多咪行返去,我估大約半個鐘可以行到(遠方橙紅色既地方係馬路街燈,睇相好似著火咁)


大家都圍住個火爐等車,我好多時為左拎住相機影相無戴手套,係道暖返下隻手,舒服晒


九點黎左兩部巴士載人離開,順利上車返平湯溫泉巴士站


係旅館小賣部買左杯麵返房嘆,睇封面以為呢個係辣麵,但佢無辣味之餘又無咩味,早知食合味道好過,香港啲日版合味道咁貴唔捨得買,係日本食抵好多




今 完杯面又到溫泉時間,又去左浸溫泉啦!晚夜既溫泉都係無咩人,係呢道仲可以試到落住雪浸露天溫泉,好好feel!不過呢個feel係驚囉,出面黑媽媽,啲 燈又暗暗地,一個人係出面浸感覺好令人不安,浸左都唔知有無兩分鐘就入返室內,夜晚都係留係室內慢慢浸好啲;呢道個露天溫泉幾靚架,比早一晚住既下呂小川 村正好多,同相中一樣(啲相係旅館網站下載,影得特別靚,哈哈)




浸完溫泉好舒服,又有好教訓啦




第五天

超身望住個窗,心諗今日天氣都幾好丫,有藍天有白雲




太陽照上雪山頂,唔通呢個就係傳說中既日照金山?




係食早餐之前先浸一浸溫泉,今次可以真真正正享受露天溫泉啦!揀左八點食早晨,慢慢浸完溫泉先食都未遲,去溫泉時路過食事亭聞到好香,而家到我食啦,早餐好豐富


豆瓣醬燒到好香,好岩我食


最估唔到係早餐都咁豐富,係意料之外!(大鄉里未見過世面咩都開心一餐)


食飽返房執好行李,係時候check out lu


成日都覺得呢個既叮噹住既櫃...


Check out時先交房錢,唔怕人走數咩?暫時留低大背囊係呢道,今日輕輕鬆鬆出去玩下先


琴晚一路落住雪,四圍都係雪




又返到去巴士站,有個免費足湯比人浸,我要等車無時間浸lu


今朝天氣咁好,希望一陣都一樣咁好天啦


今次係第一次住日式溫泉旅館,都幾得意丫,環境又靚野食又夠特別,露天溫泉仲好正tim,如果下次有機會都想再住呢啲溫泉旅館,有得住多幾日嘆世界就好啦(如果中左六合彩既話可以諗諗,哈哈),成個旅程繼續好多first time in forever!




鐘意SeeWide的分享,給我們一個Like吧!
  • 攻略日期:N/A
    攻略地點:其他
  • 攻略時間:N/A
    是次消費:N/A
2人比"掂"
  • EEChan 於2016-04-29 21:11:12 留言
    呢處真係唔錯,未知夏天又如何呢?
  • 舉報 回覆
  • No.1
  • 林公子 於2016-04-29 23:59:21 留言
    非常正~~~~~~!!!!!!!!!!!!!!!!!!!!!!!!!!!!!!!!!!!!!!!!!!!
  • 舉報 回覆
  • No.2
  • stellaluk 於2016-04-30 09:59:25 留言
    引用自 '平凡人' 的相片:

    回覆:頗別緻!
  • 舉報 回覆
  • No.3
  • 1874飛飛 於2016-04-30 17:53:19 留言
    真係不能不佩服他們服務的周到, 細緻精緻, 所以同粗線條的韓國是不同的
  • 舉報 回覆
  • No.4
  • 平凡人 於2016-05-01 08:09:13 留言
    原文由 EEChan 於 2016-04-29 21:11:12 發表
    呢處真係唔錯,未知夏天又如何呢?
    夏天都好靚架,仲可以去埋旁邊上高地
  • 舉報 回覆
  • No.5
  • 平凡人 於2016-05-01 08:10:33 留言
    原文由 林公子 於 2016-04-29 23:59:21 發表
    非常正~~~~~~!!!!!!!!!!!!!!!!!!!!!!!!!!!!!!!!!!!!!!!!!!!
    多謝
  • 舉報 回覆
  • No.6
  • 平凡人 於2016-05-01 08:11:15 留言
    原文由 stellaluk 於 2016-04-30 09:59:25 發表
    引用自 '平凡人' 的相片:

    回覆:頗別緻!
    仲好好食架
  • 舉報 回覆
  • No.7
  • 平凡人 於2016-05-01 08:12:22 留言
    原文由 1874飛飛 於 2016-04-30 17:53:19 發表
    真係不能不佩服他們服務的周到, 細緻精緻, 所以同粗線條的韓國是不同的
    服務真係超好未去過韓國唔知韓國係點呢?
  • 舉報 回覆
  • No.8
  • mrsakwok 於2016-05-02 15:48:41 留言
    仲以為飯後去邊添,原來有平湯大滝結冰祭,好幸運!
    我去咗咁多次,都未試過遇到D「祭」
  • 舉報 回覆
  • No.9
  • 平凡人 於2016-05-02 19:57:00 留言
    原文由 mrsakwok 於 2016-05-02 15:48:41 發表
    仲以為飯後去邊添,原來有平湯大滝結冰祭,好幸運!
    我去咗咁多次,都未試過遇到D「祭」
    我真係好彩咁岩遇到,可以睇到當地文化係幾特別之後係岡山遇到另一個祭典仲特別
  • 舉報 回覆
  • No.10

最多能輸入300字

累積瀏覽 112322

全部攻略 126

全部回應 1394