北海道五日四夜自駕遊*四月2016 ( Day 3 - 登別 / 函館 )

16-20.04.2016

今次係小地勤第 2 次黎登別 , 見的係完成上次未完成既行程 . 兩星期後 , 小地勤會帶老爺奶奶黎北海道玩 , 當然要探定路 , 我係一個好乖好識做既新抱仔 ( 自己讚自己 ) .

我地架車就泊係巴士旁邊的收費停車場 , 上次黎時 , 過左 5 點 , 所以無人收費 , 賺左一次 . 今次晨早由札幌開車過黎 , 用左 2 個幾鐘 , 黎到都已經兩點幾 . 

其實我地知道山既另一邊仲有一個停車場 , 會比較近我地要去既地方 , 但封左路 , 只可以人行 , 唔准車行 .

咁都無法 , 唯有自己行過去 . 路上見有一架鏟雪車 , 路邊都仲有積雪 . 妹妹話每次黎登別都係大雪中 , 所以無去過足湯個邊 . 其實我對落雪黎日本既興趣不大 , 又可能雪已經睇過 , 就再無必要每年都睇 . 其實落雪真係好麻煩 !

上次我係行山路的 , 今次係行車路 , 好行好多 , 不過行山路就比較快 , 但行得好辛苦 . 所以我建議行車路 , 舒服些 .

我印象中行左成 20 分鐘先去到第一個景點 .

大正地獄 , 只係去足湯時路過 . 依個景點好細 , 一眼睇完 . 但介紹話佢間中會水滾到噴上天 , 所以我地都唔敢留係到太奈 .

 

 

水好滾 , 不停地起泡泡 .

佢既另一邊就係天然足湯 .

依條係溫泉河 , 由附近幾個超高溫既溫泉合併而成 . 當然大正地獄都有份共水比佢 .

 

沿住條河一直行 , 有水氣 , 好有詩意 . 終於行到黎 . 見唔見到一堆人係到浸腳 ?

我地黎到既時候 , 剛好佢地浸完 , 我地 3 個霸左成個足湯 . 不過附近好多泥 , 一除鞋就成腳泥 , 自己想方法 . 我就帶定濕巾 , 浸完抺腳用 .

 

水係暖 , 唔係熱 . 不過都好睇上游既泉眼 . 我第一次咁樣係山林之間玩水 , 一個好開心既體驗 .

上次行山路 , 一落山就見到停廾場加依個大湯沼 . 

 

今次我地由另一邊行過黎 , 原來依邊先睇到佢有幾大 ! 大自然真係好奇妙 !

因為大家都已經行過地獄谷 , 所以只係門口影張相就走 . 妹妹黎登別係要買紅藍鬼 ! 妹妹之前跟男友黎北海道都係雪際既日子 , 每張機票最平個次都要 8 千幾蚊 , 難得今次 1 千蚊唔洗 , 佢話可以豪買 . 做地勤除左自己可以飛 , 亦可以令家人受惠 , 我公司好重視家庭的 , 所以小地勤老爺奶奶都受惠 !

 

妹妹唔講 , 我都無留意到紅藍鬼 .

一條沒人的商店街 , 慢慢行 , 慢慢睇 , 正 .

聽聞佢地變臉的 .

好多成雙成對既擺設 . 都係個句 , 妹妹之前落雪先黎 , 好似咩都無見過咁 ...

 

祈求合格 ...

我見人地當手湯咁 , 所以我都走去試左下水暖 , 熱 !

行到肚餓 , 可惜商店街得便利店有開 . 都係個句 , 唯有下次再黎先試返個地獄拉麵 .

登別 , 拜拜了 ! 兩星期後再見 !

繼續向住函館進發 , 黎到函館 , 預左天黑無野行 . 基本上每黎到函館既第一日都係入夜 , 除左居酒屋 , 都無幾他選擇 . 激安都唔係 24 小時 , 所以晚上既函館係訓覺 .

 

多左呀妹陪老公不停食魚生 ... ... 我仍然係熟食既朋友 .