探險家攻略 > 休閒玩樂 / 城中探秘 / 旅遊 > 主題公園 / 郊遊 / 特色景點 / 其他 / 長線旅遊 > 奧飛驒。雪白的新穗高雪山 Day5

奧飛驒。雪白的新穗高雪山 Day5

由平凡人於 2016-05-06 20:00:00 發表 | 累積瀏覽 420

分類：主題公園長線旅遊特色景點其他郊遊；地區：其他

< 日本中部﹑關西﹑中國15天遊 >

第五天（續）

浸過溫泉又食完早餐，可以開始今日既旅程，今日會去到今個旅程最高點，上超過海拔二千米既新穗高雪山，好耐都冇去過雪山啦

朝早咁好天氣，藍天白雲，心情都特別好，寄望一陣上山都有咁好既天氣，冬天新穗高雪山多數都唔好天，而家總算有啲希望

平湯巴士站已經有好多人排緊隊，有去高山亦都有去新穗高，要睇清楚唔好排錯

高山既車黎左之後新穗高既車都到，好在巴士用漢字表示地方名，睇清楚就唔怕上錯車



睇好時間表先黎等車，唔洗等好耐巴士準時到達，不過第一部去新穗高既車黎到時已經坐晒人，上唔到幾多個，正當以為無車坐既時候竟然黎左一部空車，咁大家都上到啦

好多人去新穗高，連中間走廊位都坐左人


大約40分鐘車程去到新穗高巴士站

巴士站就係纜車站旁邊，大家落左車都即刻行入去

新穗高纜車由兩段纜車組成，第一組係細啲短啲，第二組係大啲長啲，我兩段都會搭

呢道有新穗高纜車既資料
http://shinhotaka-ropeway.jp.t.uk.hp.transer.com/

係搭纜車之前要先排隊買飛，纜車來回收費￥2900

我有pass就唔洗比錢，呢張pass幫到我慳返小小架


雖然有pass係唔洗錢，不過都要係售票處排隊換返張正式既飛先可以坐車

排完換飛又要再排隊等車，兩部巴士一齊黎搞到好多人...

纜車正常半個鐘一班，每個鐘00同30分開車，而家咁多人就加密啲15分鐘一班，唔洗等好耐就有車



一個車箱可以坐到最多45人，唔係香港個啲細部纜車，當然唔一定次次都迫到45個人咁多，要入咁多人可能仲辛苦過東華籌款



一開車就可以見到好靚既雪景


短短四分鐘車程話咁快去到「鍋平高原站」

落左車之後要行一小段路，去另一個纜車站繼續上山旅程



呢道都有溫泉可以浸，係一個咁靚既風景之下浸溫泉一定好正，我就冇時間試啦...

去到「白樺平站」轉另一部纜車，呢條纜車線係更長更高



山上-14度唔算好凍，不過我最擔心既事出現啦，白版寫住山上視野唔清楚，如果一陣上到山無風景睇就好可惜...

今次呢部纜車好特別架，係日本唯一一部雙層纜車，可以載到超多人，最多可載121人；我去到時上層已經迫爆，下層亦都開放比乘客乘坐，好多人迫晒上上面我地下層反而鬆動好多；呢部纜車都係半個鐘一班，開車時間係15同45分，正常既話兩部纜車之間唔洗等好耐就接到另一班車



車窗結晒冰，想睇風景就要出力刮，有埋工具比你刮刮刮


纜車一路向上升，風景越來越壯觀，可以見到好多雪山



好多白色聖誕樹



職員都幫手刮

見埋最後既藍天之後，再升高天氣就變得差lu

大約七分鐘車程上到海拔2156米既「西穗高口站」

而家-13度，暖左bor

纜車站天台就係一個觀景台，落左車即刻上到最頂；呢道都係有影相服務，比白川鄉平少少，￥1000一張，佢地都好好人會幫你用自己相機影，不過都係佢部機影得靚啲，我朋友都係道買左張相



天氣唔係咁好，遠就睇唔到啦，呢一刻由觀影台望出去總算見到小小雪山



幾分鐘之後突變得好大霧，白茫茫一片



理想係可以睇到連綿不斷既雪山，可惜好多時理想同現實總係有好大段距離...

對面山頭已經見唔到



只可以睇到近既樹



雪花丫

出面天氣凍，好多人睇兩睇就入返室內

餐廳比起出面更熱鬧，呢道暖笠笠，好有令人留低既衝動

穿過餐廳可以去到室外地方；而家係2155米高

植物鋪滿雪



呢道有一個叫「雪之迴廊」既地方，係積雪中間開出一條路比大家玩雪



有發現！

如果做足準備，呢道仲有登行路比人行，不過相對之前既路應該危險好多，我就無行啦



呢道係一個比人玩雪既好地方，咁多雪想點玩都得；呢道都有唔少香港人出現，而家開始熱門黎呢道？

係室外玩完又係時候返入室內暖返下，入面有暖爐好舒服

呢間餐廳唔似好多旅遊區咁賣到好貴搶遊客錢，呢道食物價錢同日本其他地方差唔多

雖然唔肚餓，都買返個薯餅食下先

食完就坐返纜車落山lu，山上視野唔好，落返低啲就清楚返啲



落山都係坐下層車廂

如果一落車直接行去另一個纜車站係可以接到幾分鐘之後開出個班車，我諗過巴士都未咁快開唔洗趕時間就無去追車lu，係上面hea下仲好，有半個鐘時間慢慢hea

呢道除左雪，仲有間餐廳同小賣部，無咩特別野睇，影完纜車就走啦



行去纜車站既路鋪左膠墊，唔怕地滑

已經有人等緊車

幾分鐘之後又返到纜車起點「新穗高溫泉站」

呢個站有商店比人shopping，不過巴士好快就開車，我無時間睇就要出去上巴士

巴士又係迫滿人，好彩早上車

返到平湯巴士站，暫時同朋友分開一下，佢會係巴士站對上浸溫泉，張pass包左係呢道免費浸架，而我就係道四圍行下同返旅館拎行李，我地有一個鐘時間活動

平湯落住雪，把握最後小小時間影下雪先，離開呢道都唔知仲有無機會見到咁靚既雪啦



係雪中行返旅館，拎完野再行返出巴士站，奧飛驒兩日一夜小旅行即將結束



奧飛驒溫泉鄉係深山之中，黎到可以見到好靚好靚既雪山，又可以浸溫泉，比住係城市舒服好多，好彩有黎到呢道咋