2009年上海、杭州8日7夜歎美食之旅-day8

今日9點半起身,梳洗後就去辦退房手續,然後去了吳越人家食早餐,我們點了醇香排骨麵同吳越拌川,埋單$40蚊.

吳越拌川:麵係炸的，但一點都唔脆，配料就炒得好生下，所以特別鮮味.

醇香排骨麵:排骨既醬汁非常好味，排骨亦好(淋)好入味，麵就好一般，一點都唔Q的.

跟住去了佳家湯包買了5盒湯包回港,然後搭地鐵去上海火車站出,因為上海朋友請了我們去雲都食午飯,呢間店做本幫菜係好出色的,亦很多菜都得獎的，我個朋友真係非常好客,一早訂了房同菜,我地四個人點了蜜汁素雞、熗河蝦、白斬雞、周庄咸菜毛豆、毛蟹年糕、外婆紅燒肉、鱔糊、揚州干絲、童子冰糖水魚、(羅漢齋) 唔記得個名、粢飯團.

毛蟹年糕:d毛蟹個殼好薄炸得好脆，d肉好鮮味又多羔，個醬汁又夾.

外婆紅燒肉:整件肥肉食起黎有些咬口，煮得入晒味.

白斬雞:又係這道菜、又係走地雞、又係出名菜式，雞味十足，如果有薑蓉就正喇.

周庄咸菜毛豆:毛豆大大粒好有豆味，好濃咸菜味，但又唔會好咸的感覺.

揚州干絲:湯就好飲，干絲就......(鞋)囉

童子冰糖水魚:初初見到真係驚心動魄，還要原隻撕黎食，以為係烏龜，原來知道係水魚後都無咁驚，點知食落就驚為天人，無論味道、肉質都係勁美味的，d肉質還要比田雞更嫩滑啊.

粢飯團:這裡很有出名的名菜，第二度好難做得咁出色，外脆同嫩.

蜜汁素雞:素雞好滑好似豆腐咁，幾得意

熗河蝦:呢道菜這樣的做法，完全食得出河蝦既鮮味，d蝦係生熗的，有些蝦還在彈下彈下.

(羅漢齋) 唔記得個名:果些係魚腐，同香港食的差不多.

鱔糊:這道菜唔係用黃鱔煮的，係好細條的鱔煮的，鱔既味道比一般的濃.

每道菜都很好食，不過真係食唔晒,他們還送了昆山正宗陽澄湖大閘蟹俾我地,食飽後就同他們道別.

我們再搭地鐵回人民廣場一帶買手信,之後去了沈大成食蟹粉小籠包同鮮蝦小餛飩,埋單$30蚊.

鮮蝦小餛飩:餛飩都很鮮味

蟹粉小籠包:d湯都幾好味，

然後回酒店打包d手信,這間酒店的服務真係好體貼,他們冰塊提供給客人打包大閘蟹及其它,之後我們搭地鐵2線到龍陽站再轉磁浮列車,持有當日機票就有8折優惠,即$40蚊一張,架車真係超快,用了8分鐘就到了機場.

港龍航空在D閘口,之後就登機回香港了.

煙鴨胸伴通粉:材料夠新鮮，青瓜特別好味

紅酒燴牛肉配意大利麵:意大利麵好好味，都幾濃紅酒味架.

原粒豆豉雞配白雞:雞唔夠滑，有點失望

哈根達斯雪糕:咖啡味及士多啤梨味

後記:今次旅程雖然唔可以講好好,又加上黃金週效應,四圍都勁多人,體驗到人山人海的景象,但我感受最深的係上海朋友的熱情,大家祇係在網上傾過幾次計,但她竟然全心全意去幫助及招待我們,那份心意我會永世難忘的,能夠認識到呢位朋友,亦係一種奇妙的緣份.

感謝 Dusty 提供以上內容
Dusty 的個人網誌 : www.dusty1118.mysinablog.com/