Leon的4D演唱會拆掉帳篷，意外地變成了普天同慶的免費音樂會。趁住好天氣，我也即興地跟兩位舊同事買定KFC外賣，帶埋膠袋報紙鋪地下，到「核心外圍」聽Leon。雖然我不覺得自己是Leon Fans，但Leon的歌充滿了小學和初中回憶，好多歌旋律響起就會識唱，是我們80後的集體回憶。在「核心外圍」跟一大班陌生人合唱Leon 90年代那些「愛生愛死冧女歌」感覺十分本土。我們都過了一個十分開心的晚上，而且可一不可再，因為相信以後也不會有人像Leon一樣傻，在中環海濱搞個普天同慶的音樂會益街坊。
核心外圍的KFC 野餐
前面一班男人被幾個記者圍住訪問。見個cam有紅色logo，以為係有線冇乜人睇，第日睇蘋果先知係蘋果動，唔覺意上左鏡。
其實我小學一年級開始曾以為自己的偶像就是Leon。原因完全是因為住我對面果個姐姐都鍾意Leon。當時未有獨立思考及判斷能力。小學時有段時間香港流行四大天王熨畫衫。當弟弟妹妹選擇買Aaron的時候，我選擇了Leon。因為個人認為，四大天王中以Leon最靚仔。90時代Leon的歌路以「愛生愛死冧女歌」為主。翻查維基百科，我最喜愛的Leon 歌曲例如 <如果這是情>、<兩心知>、<送你一瓣的雪花>、<我會像你一樣傻> 都是90年代初的作品，亦即是我的小學時代。直到中學開始聽電台音樂節目及英文歌後先知道自己鍾意邊種音樂，而Leon也轉型唱了大量我非常討厭的MK味濃電子跳舞音樂，我就把Leon完全「摒棄」。到後來連四大天王都「過氣」冇乜點再出唱片時，Leon忽然成為有點old -school及騎呢的金句王。我就更加唔敢認自己小學時曾以為自己是Leon Fans。
記得Leon今次演唱會出事果日在新聞看到有關報導之後我仲覺得幾好笑，食住花生睇吓場鬧劇點收科。畢竟Leon近年愈來愈騎呢，而香港近年荒謬的事也愈來愈多，騎呢的人發生荒謬的事不足為奇。只是事件發生之後網民和傳媒一面倒正面評價Leon的處理手法，成件事由公關災難變成了Leon形象的轉捩點，我也不得不對我這個「兒時偶像」另眼相看。
回想整件事，Leon以七千萬Budget搞一個香港前所未有的4D戶外演唱會，其實相當大膽創新。如果單為賺錢，以Leon的叫座力，簡簡單單搵個場搞個演唱會就可以賺錢，無乜必要搞到咁大，而且門票咁貴，個場又只能坐幾千人，D飛賣唔賣得去都成問題，係高風險的投資 。
再Review 一下Leon的金句，撇除一D估計是講錯左或真正騎呢的句子如 「左手又係肉，手背又係肉」、「衛蘭肥過部電單車」、「我朝早唔會空肚食早餐」等外，有D金句的確有他的道理。例如 :
-
「踏實好過疊水。」、
-
「有無機會拍拖同見鬼一樣都係要講緣分o既。」、
-
「勇氣呢，就係做一d平時唔習慣做o既o野，但一定要挑戰，挑戰產生樂趣。」、
-
「得到歌迷支持我好高興，但我未必要討好佢地！」、
-
「當一個藝人覺得自己好有魅力的時候，其實佢已經喪失魅力！」、
-
「計不到的，就用猜的，猜一猜最壞有多壞，如果最壞也不是太壞的話，GO。」、
-
「我覺得玩風帆同做人一樣，要能屈能伸；同娛樂圈的事業一樣，有起有跌！」、
-
「我豁達，所以我不介意別人說我不豁達！」、
-
「我揸住嘅宗旨係『做好自己唔好理人』，地球唔會因為我而冇咗地心吸力升咗我上天嘅。」、
-
「不要理別人怎樣看，反正無論你是好人還是賤人，都會有人覺得你是賤人。」、
-
「要convince到觀眾，一定要令觀眾唔覺得你喺度convince緊佢」。
無論你認不認同他的理念，至少比起其他已上位、說話總是四平八穩的藝人，Leon可說是難得一個夠坦誠、夠真、有個人意志兼獨立思考的藝人。如果香港娛樂圈沒有Leon這種跟大圍不一樣的藝人，個個都係同一個模樣、同一個價值觀、同一套生存模式在娛樂圈中混，咁香港娛樂圈就不再精彩。我們需要Leon。
在核心內圍入口selfie 扮入場
============================================
感謝 lingwhatever 提供以上資料
lingwhatever的網誌: http://lingwhatever.blogspot.hk/
============================================
中環海濱摩天輪
釜山水族館
Thormork 冰島高地
六義園(東京)
中環街市
珠璣巷
數碼廣場
G-fit