是次消費：每人平均約HK$ 400.00
二零一六年五月十四日
好多年冇去過澳門啦，曾經去過澳門幾次，講真我對澳門呢個地方冇興趣，記得早兩年玩遊戲拎過澳門免費船飛，我都諗唔到一個去澳門既理由所以送左比朋友，不過今次去澳門既理由就好大啦，我要去睇「黃色小鴨」丫！隻鴨仔咁得意想唔去探下佢都唔得啦！
難得星期六放假就出發啦！朝早八點去到港澳碼頭買船飛，今日好多人搭船，噴射飛航賣緊一個鐘後既班次，金光飛航仲誇張下一班船係11:30，我為左平都冇計要坐金光飛航
食個早餐就可以上船，時間岩岩好；上船既地方好多人，好多人排隊等後補
船上座位都算坐得舒服
今日主角係你緊係要帶你一齊去
一個鐘零五分鐘船程到達澳門，咁岩有其他船一齊到排左半個鐘先過到關；出到黎就即刻去搵鴨仔啦，揀左坐車去算係近鴨仔既金沙
坐車過橋個時已經見到鴨仔啦，睇下佢幾得意
係金沙落左車就向鴨仔所在地「澳門科學館」對出海邊行去，由金沙行去唔洗十分鐘就到，好近
每逢星期五﹑六﹑日係漁人碼頭會有「黃色小鴨遊樂園」活動，有好多攤位，遲啲先行過去睇睇，而家要趕住去探鴨仔
未行到都見到佢個得意樣
去到啦！唔係好多人咋！
今日天氣灰朦朦，幫唔到鴨仔影靚相
佢大隻過香港個隻架，可能放得遠感覺唔係好大
出黎玩下先
除左睇鴨之外，仲有小遊戲玩下架
我都係覺得鴨仔重要啲，超得意丫
行上天橋可以見到鴨仔正面 （可惜最靚既位置被封住...）
錫啖先
想睇到鴨仔既另一邊就要行去觀音像呢道
可以見到鴨仔左手邊，不過就有小小遠
我隻仲大過佢，哈哈
圍牆之後都可以見到鴨仔
暫時同你講再見
科學館入面都有鴨仔架
有個小小展覽
當年香港同台灣都超多人，澳門呢道相對好清靜
呢道有鴨仔賣！
差啲忍唔住買左，好彩睇一睇個底都唔係印澳門，咁就唔買lu
恐龍與鴨
行返去漁人碼頭黃色小鴨遊樂園，見到有好多隻鴨仔丫
跟我黎啦
呢道似係一個小小嘉年華會，有野食又有野玩
其實好多攤位都未必關鴨仔事，就算有鴨仔都唔係正式既Rubber Duck，只有官方攤位先係真正黃色小鴨
官方攤位啲鴨仔postcard好靚，可惜係非賣品...
鴨巴士
仲有好多鴨仔
行完攤位就離開漁人碼頭
今日最重要既探訪鴨仔旅程已經結束，因為買左今晚十點船飛，而家仲有好多時間係澳門四圍行
行左去水塘
行左入啲舊區，同香港既舊區都幾似
係超級市場見到澳門特有既陽光柑香茶，但唔想拎住佢成日所以冇買
見到傳說中世界最短既纜車「松山纜車」，一場黎到都坐下啦
入口好細
單程收費兩蚊，會唔會太平呢
未上車都可以望到山上既站，好近架
一部纜車可以坐四個人，我得一個人隊都唔洗排
話咁快就到
上到山向燈塔方向行去
有一啲軍事遺跡留低
由山向下望
燈塔就係上面
當年打風就係掛呢啲上去，同香港一樣
呢道真名叫「東望洋炮台」
「東望洋燈塔」
望出去既風景
頭先灰朦朦，而家又咁好天，比太陽曬到出煙，要快啲行返落山
呢道以前曾經黎過，好熟悉
落左山其實想搵B.Duck Cafe但一路都搵唔到，去到公園搵wifi睇睇先知我之前搵錯地址，Cafe係纜車站個頭，我都係懶行返轉頭決定唔去啦，繼續四圍行下算數
小朋友都拎住鴨仔！識貨！
「瑪嘉烈蛋撻」好多人排隊，想食返個都唔得
無無聊聊行左去「議事亭前地」
今日有佛誕活動，好多老人家排隊
議事亭前地超多遊客，迫過旺角
閃左入營地街市食呢間「梓記牛什」，以前睇唔知咩有介紹過，都算有小小名氣
湯底好香，幾好食，而且好平，25蚊一碗
大三巴街啲人多到
今次鴨仔黎澳門有咀香園贊助，間間咀香園都有好多鴨仔
咀香園仲有鴨仔賣！咁咪唔珍貴囉！而且要$130一隻！都係我隻有紀念價值一啲！
手信街有好多咀香園﹑鉅記仲有鳳城餅家，我咩都冇買，哈哈
傳說中既大三巴！多人到！係下面望一望就算，懶行上去
隔一條街小好多人
呢道都有台南周氏蝦捲？真定假架？
四圍行下睇下
福隆新街
好多人等食碗仔翅，而定要30蚊一碗好貴...
行左去最香買杏仁餅，呢道用炭火燒好正架
街邊牛什都咁多人排隊？好出名？今次黎澳門冇咩點準備，咩都唔知...
就天黑，經南灣湖邊行返去漁人碼頭
又返到黎啦
向鴨仔方向行去
又見面啦
今次冇帶腳架，只可以就咁影；現場鴨仔係冇燈照住，睇落好黑，影出黎反而比較光
幾唔捨得都好都要同鴨仔講再見，希望將來有幾會再見
行返去金沙坐車
見有時間先坐去威尼斯人行行，又行入賭場睇睇，我都唔賭錢賭場冇可能會賺到我錢，哈哈
坐十點船返香港，九點半去到碼頭排隊，順利到上船，一日鴨仔之旅完成
鴨仔黎香港已經係三年前既事，今日可以係澳門重遇好開心，唔知第日仲有冇機會同咁得意既鴨仔相遇呢？
PS.為左打呢篇野今日請左假係屋企慢慢打，平時儲落咁多日OT終於有藉口放返日，要諗下其他假可以點用先，哈哈^^
PSS.
今次去澳門電話冇得上網，要周圍搵wifi，試過金沙既穿梭巴士同好多酒店都有免費wifi，一啲公園又有政府wifi，黃色小鴨遊樂園都有得用
wifi（服務台有寫密碼），除左小鴨遊樂園之外其他wifi都唔係好穩定，成日斷線，不過上到網都好過冇啦唔可以要求咁多
