(Day 10) 2015-9-20
住宿：Mabuya Camp
行程：Cape Maclear —> Lilongwe
![]()
尋晚半夜都痾左幾次，又發冷又頭痛，好在朝早已無發冷跡象。晨早又比個肚痛醒左，因為晏d要長途車離開，啪返幾粒喇叭牌穩陣D。
係住宿食了自費早餐便回屋收拾行李，便要準時10點check out。見間舖仔有人，買返張wifi卡先~ online時收到巴西朋友阿Yau嘅whatsapp，話尋晚好掛住我，記住一陣2點係餐廳用餐後車埋我回首都。尋晚放佢飛機都記住我，太好人了~
![]()
見時間尚早，個人又痾到散晒，攤咗喺酒吧位置⋯ 看見住宿D住客陸續離開，住宿及小村回復平靜，看來好多人好似阿Yau咁用一個週末來這裡渡假。由於天氣太熱，又痾到好口乾，買D野飲先。個職員見我個人謝晒皮，便推介我飲Red bull，非洲南部好興飲red bull，周圍都有得賣。都係唔好飲呢D野，飲返今個旅程其中一款至愛嘅飲品玉泉Ginger Ale。
![]()
|
| 攤左係度hea左兩粒鐘 |
無耐有三個亞洲人騎電單車車尾來到fat monkey，穿著大陸骨場好娘果D拖鞋，以為是內地人。他們攞房後出來酒吧位置，我係罕有嘅亞洲人當然即時被Target左啦~ 傾計後才知他們來自韓國，被公司派來馬拉維工作，有一星期嘅假期，就來到Cape Maclear渡假。看來Cape Maclear係馬拉維好受歡迎嘅渡假勝地噃~ 這三個韓國人兩女一男，好明顯其中一啤又是熱戀中的情侶。情侶之後周圍行，及坐係對面談心。單身韓妹就變咗埋我身，看真點都幾靚，單眼皮白白淨好有韓國feel。由於我個人個痾到腳軟，無乜心情。傾傾吓，差不多中午12時，費事到處留情（港女按：大誤），還是走吧！我還好期待跟港女嘅非洲之旅呢~ 臨走前買嘢飲，個鬼馬職員不停跟我打眼色，又望去韓妹度，當然剛才吹水過程全收佢眼底啦。佢係咁八掛問我，我話有老婆了，跟住佢抵死話可以做一天女朋友喎，哈哈~ 走啦，再見這位利物浦fans職員，也跟韓國朋友say goodbye。韓妹知我肚痾，表現得好擔心，我好記得呢個樣，因為香港女仔臉上係唔會有的。這跟日本妹子說話時一模一模，就係你跟佢說話時，佢會含情脈脈望住你嘅眼神。（港女按：睇下一句前，歡迎大家捐贈玻璃）我只好說聲I’m ok，頭也不回，背著沉重嘅行李，喺非洲嘅烈日當空下離開。
艷遇嘅野，唔知點解同港女一齊後經常在我身邊出現。我曾經單身長達5年，但就於旅途上只試過一次咁大把。佢係一個台灣女仔，當年去埃及時因delay左曼谷幾日有一面之緣，佢係台中讀緊大學，long D幾個月，因佢爸爸發現左電話賬單(當年仲係SMS年代，逐個SMS收費)，反對求學時期談戀愛，都無再見過面就告終⋯ 依家d艷遇唯有心裡跟佢地講句名草有主，timing唔啱吧，哈哈~
![]()
![]()
![]()
|
| 熱死人 |
個人痾左咁多次，於三、四十度中午嘅高溫下，仲要攞住咁多行李都係對一個身體極限嘅挑戰。一離開住宿，穿梭於民居，便有幾個當地小朋友好開心向我飛奔過來，他們不是求攞錢，而是好開心咁拖住我隻手咁行。左一個，右一個，內心實在有說不出的窩心感覺，不知是否上天知道我唔舒服，刻意安排給我的一點鼓勵呢~ 小朋友係烈日當空下送了我一程，行咗20分鐘到達簡陋住宿，有點想暈。發現門已鎖上，於是放低行李於地上，係僅餘太陽曬唔到嘅簷篷底部休息。
坐了成粒鐘，阿Yau佢地返嚟，知我肚痾仲係咁講sorry添。先將行李放上佢架車上，就去Geko食午餐。去到Geko餐廳，見到佢女友Laura，見我痾到咁嘅死樣，即時拖住我隻手來慰問，西人真熱情。
@1400
同枱仲有兩個非洲女仔一齊食。咦！這兩個當地女仔我之前行返簡陋住宿時見過，她們都是赤腳，而其中一人只踢著一隻爛嘅人字拖，心諗做乜唔乾脆赤腳？可想而知當地對日常用品嘅珍惜。
外國地方無乜清淡野食，唯有點個漢堡包。食野時見成兩點鐘，我問咁晏怕唔怕返到去會好夜架，阿Yau話車程只需幾小時，叫我放心。於是詢問尋晚睇運動會嘅情況，佢地話有排球、足球、籃球，抵死來自巴西嘅阿Yau仲話bad football添，點有得同佢巴西相比呀，哈哈~
食了個懶洋洋嘅午餐，hea左了粒幾鐘後離開。離開時我咁啱同Yau單獨行，佢向我透露心事，話跟Laura結識後一同約來這裡玩，突然有一日就kiss起來，不過就話no sex喎，哈哈~ 臨走前來張自拍吧！跟南非靚仔道別並安慰佢一番，因為欖球強國及主辦國嘅南非再輸埋比日本⋯
![]()
|
| 巴西及南非型男 |
阿Yau揸嘅係香港稱呼維他奶嘅Suzuki私家車，兩名當地女子都一齊坐順風車。由於唔舒服，成程車好好瞓，只記得前往首都Lilongwe要翻過高山。剛入黑時到達首都，入住Yau及Laura推介嘅大型Hostel。道別前仲給了我前往贊比亞首都長途巴士嘅時間表添~ 逐一擁抱及錫面後道別，真係感激阿Yau嘅順風車。
@1900
![]()
![]()
|
| 坐順風車時，見到運動會還未完結 |
![]()
![]()
|
| 跨過高山 |
![]()
|
| 路線終於向返西了⋯ |
馬拉維首都Lilongwe
這住宿叫Mabuya Camp。 嘩，好多人呀！室內吧枱梳化、室外嘅長櫈坐滿人，電視直播緊欖球世界杯，啲人多到好似開緊party咁呀~ 雖然好多人，但都好彩有得瞓，我住Dorm，整間大房無人住，我可以霸晒添~ 看來這住宿真係好大。這Hostel雖然好大又有規模，可惜蚊患十分嚴重，室外唔在講，室內白紋伊蚊周圍飛，多到嚇死人⋯
先係吧枱飲杯果汁，價錢唔算平。期間認識吓其他住客先，分別同兩個英國朋友傾計。他們都來自倫敦，最喜愛球隊係熱刺，也是一個人周圍遊。跟其中一個貌似迷幻青年聊得最耐，為何迷幻青年？因為佢身穿代表牙買加三種顏色大麻草嘅帽同衫，一講起牙買加就話題來了。當然他也正在隻身遊世界，亦到過牙買加。仲話係納米比亞首都好危險，見到有人持????行劫⋯ 唔係嘛，我尾站就係納米比亞喎！跟住打聽到關於納米比亞嘅資訊，如睇土著地點等等。
問吓個reception，明早前往贊比亞過境巴士嘅資料，不過佢英文機關槍咁回答，毫無體諒我呢個英文水皮嘅人⋯ 一個字都聽唔到呀！都係先沖涼吧~ 晚餐未食，唯有食幾塊餅充機就去沖涼。可能止痾藥效力開始過，又痾了兩次⋯
沖涼後大廳少了好多人，不知是否直播完欖球嘅關係。攞起本早前留起嘅馬拉維指南睇睇，由於明早要過境往贊比亞，原先今日想早點來這裡，去贊比亞領事館問問香港人入境情況。其實特區是免簽證，不知是否早前受了挫折，依家膽怯，才想做呢D多餘野。 不過唔睇尤自可，一睇本指南有講特區護照係要簽證，即係點呀⋯ 擔心左一陣，又whatsapp港女幫我check都話免簽證。唔鬼理佢，再於吧枱問第二個客人有關長途巴士情況，佢話可以幫我約定明早的士前往巴士站，稍後就有的士來跟我講價。我入黑先到這裡，對這首都地形毫無概念，只睇過LP地圖，又要趕住走，看來係要比錢人賺了。無幾耐的士就到達住宿，開價約$4-USD，唔太貴應該合理價錢呱，成交。明早0545見。
回吧枱跟剛才嘅好人道謝，他是一個馬拉維嘅中年肥胖大叔住客。佢係當地嘅雪茄商人，差不多每個月都要飛經香港，轉往中國做生意，仲話不時落老蘭隊啤添。不過佢都講起差不多每次喺香港搭的士都被呃錢⋯ 呢樣我絕對清楚，因為我前前後後都曾經係機場工作了七八年，所以香港這個國際大都會，有時跟這些「第三世界」國家不遑多讓。不過名不經傳嘅馬拉維雪茄竟然受大陸人青睞？定是我太孤陋寡聞？佢仲攞出最新嘅iphone 6俾我睇佢喺馬拉維嘅農場及大陸嘅相添。聊天時啤酒一支接一支，帶點醉意。佢仲想請我飲酒，我話肚痛婉拒了⋯ 交換了電話，又好好人咁幫我換了點馬拉維貨幣。早點上床瞓覺，臨瞓前小心檢查蚊帳，個人已經唔舒服，如晚上俾蚊咬，我實會發癲架⋯
![]()
|
| 以Dom價錢獨霸房間，賺晒~ |
![]()
![]()
|
| 看見窗外都坐滿晒人 |
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
