8 【親子好去處】沙田 香港文化博物館「他鄉情韻—克勞德‧莫奈作品展」Claude Monet: The Spirit of Place @Hong Kong Heritage Museum

最近好Hit嘅親子好去處，去文化博物館睇莫奈畫展係其中一個，今日食過早餐後我哋就向沙田出發lu！

我哋由石硤尾港鐵站出發，搭一個站到九龍塘，轉東鐵又搭一個站到大圍，再轉馬鐵搭一個站到車公廟就落車喇

喺A出口行過去只需5-10分鐘，穿過條橋行過城門河再往右方行就會見到文化博物館

最先見到係牧羊少年咖啡．慢遞館，因為太多人喇，所以我哋都打定輸數一陣間下午茶唔會喺度食

麻煩咗媽咪先去買飛入場(成人$20／小童$10／芊芊$0)，因為我俾呢個大主題裝置吸引咗，因為燈會不斷變色影相非常靚

我哋預先已經同小朋友講咗話今日會去睇一個畫家嘅畫，所以佢哋知道唔會有得瀡滑梯，而係一個比較靜態的活動

我哋搭扶手電梯上到一樓, 喺無特別指示下我哋先行入去展覽館5 (之後先發覺順序應該由展覽館3及4開始先)

入口有個展場概覽既立體圖!

行到入去同我自己想像嘅好唔同，因為我起初以為展覽廳室內燈光好光猛，點知原來裡面黑鼆鼆

第一個展區係一個好大的地方，叫做「吉維尼花園」一邊掛住好多塊布幕，設有投射裝置，影片將一日24小時的景像投射到每一塊布幕上，而每塊布幕卻併合成一個很大的風景像，太陽由右邊升起到日落，繼而月亮升起到了晚上，感覺很特別，像在3分鐘之間經歷了一整天的生活

旁邊放了一大一小兩個畫框供遊人影相

再進入另外一個展區係講述莫奈大師的生活，一個係「莫奈起居室」及另一個係「莫奈的飯廳」

飯枱上擺設了幾份餐碟及餐牌，餐牌是平板電腦，大家可以在餐牌上點選要吃的菜式，然後餐碟會配合投影像將已點選的菜式呈現在碟上，餐飲也會隨不同款式配合燈光效果轉變

跟住去到一個白屋的展區，這裡可供大家隨意在白牆上塗鴉，當然佢哋畫得好開心啦(不過始終燈光太暗了，畫得有點不暢快)

呢個擺設好多朋友經過都會多手去拎佢出嚟, 保安員要周不時在旁邊提醒大家係唔可以掂的(所以大家記住唔好攪呀)

離開咗展覽館5後我哋行番去展覽館3同4, 兩個館係打通的, 一個係入口一個係出口!

再入到去展覽館3就更加黑鼆鼆, 芊芊開始感到唔舒服一路嗌住要走

也難怪, 連大人都可能唔識欣賞而且愈行愈黑! 唯有一路安慰她說很快就會離開

終於到咗主菜啦! 就係莫奈大師既真迹名作, 可能我真係太年輕了, 所以未可以好似其他人咁企喺幅畫作面前欣賞十幾分鐘

而且小朋友都不會有耐性去慢慢欣賞, 只希望儘快離開這個黑暗地方! 所以我同媽咪只能夠輕渺淡寫的快閃所有名作(之後我帶小朋友到探知館, 媽咪回展覽館再重看一遍)

最後到了一個投射荷花池，大家可以控制平板電腦上的調色器，選取不同樣式及顏色的荷花，點選及呈現在投射荷花池上，一直看到有點悶的芊芊，這個時侯終於活躍番少少

離開博物館繼續向沙田公園出發, 見到咁大個李小龍同佢影番張相先

因為今次係展出印象派大師克勞德‧莫奈(Claude Monet)共17幅真迹名作，所以好多朋友都想親身嚟欣賞一下, 好在我哋早嚟, 離開既時侯見到行哂鐵馬出現人龍!!!!(好誇張噢!)

Photo by CANON 5D Mark III, Len | EF 24-70mm f2.8L USM

呀劍評分: 9分