Rojo：樂哉．西班牙小食

上次同麵包班同學仔Ivan兄一齊試過間出色嘅西班牙小（Tapas）餐廳，佢意猶未盡，知道晌天后開咗間新嘢，所以又約埋一齊試，今次更加埋佢老婆，可以試多少少嘢添。店名叫Rojo，但查實炮台山港鐵站近啲。


餐廳店名黑底紅字，非常易認，店內裝修簡約，卻不失型格，尤其吧位，下身凹凸石牆，富粗獷味。







未齊人，先研究有咩好食，店子都喺以西班牙小食為主打，數一數有成29款（$38-$128）選擇非常多，豐儉由人；此外，仲有3款湯品、12款大菜及4款甜品。飲品方面就算唔上好有特色，而店家未有酒牌，所以，歡迎自携餐酒。









炸釀茄子 $48  甚有港式煎釀三寶嘅感覺，唔知算唔算港西混合菜？初時，睇落外觀橙橙哋，仲以為內裡釀嘅喺蝦膠，但其實只喺蕃茄粒，味道唔算好特別，但唔太油，算有份清新感。





蕃茄銀魚柳多士 $58 以鮮蕃茄蓉配銀魚柳做嘅多士，鹹香中有一份鮮活酸香，口感帶點油潤，而法包烘得脆口，雖然簡單，卻做得好食。





辣蕃茄醬燴牛肉 $68  今晚真喺同蕃茄幾有緣，幾道小食都咁啱揀嚟有蕃茄入饌。依道燴牛肉，牛肉確喺燴得頗腍，又幾入味，除有濃郁嘅蕃茄香之外，點點辣勁令人醒腦醒神。



風腿露筍卷 $78  幾道小食，就以此露筍卷最一致得我哋歡心，因為，原以為只用啲露筍仔嚟做，但卻用上大條露筍，難得清爽又食落無渣；而且，以風乾火腿捲住，加少少黑醋，油潤鹹香嘅味道夾雜清新清爽，實在平衡好食。



西班牙雜菜焗飯 $268 西班牙大鑊飯（Paella）有幾款選擇：素食嘅雜菜、雞肉辣味腸、傳統嘅海鮮及墨汁海鮮，話就話兩位用，查實4個人都夠食。近日食得肉多，所以，專登揀個素西班牙大鑊飯，況且，西班牙海鮮飯都食過好幾次，素嘅真喺想見識吓會喺點！

賣相都幾對辦，熱辣辣上枱，所以，即時傳嚟陣陣香氣，飯內混入好多蔬菜，如翠玉瓜、青瓜、燈籠椒、青豆、菇菌……等等，飯粒有股蕃紅花香味，整體味道唔錯，感覺輕怡，但始終無肉無海鮮，唔慣食素嘅人可能覺得有啲寡。不過，份量實在多，我哋3個人食真喺有啲勉強，應該點少一客小食划算啲。



西班牙油炸鬼 $58 女士果真有兩個胃，加上嫂夫人原來未試過西班牙油炸鬼，所以，點都要嗌一客俾佢試試。油條一客有6件，件頭比一般嘅大少少，一身炸得金黃，撒上沙糖，淋上朱古力漿，配少少士多啤梨做裝飾。油條入口挺香脆，不過，油咗少少，而且，較鍾意朱古力漿另上，沾多沾少自己話事，我就喜歡多漿，但依家佢淋定先，就未夠喉。

平均每人二百鬆啲，已經食得飽飽，因為啲大鑊飯真喺抵食，就算改要個西班牙海鮮飯，每人都只喺需要俾多廿蚊，實屬抵食價位。當然，酒水另計，不過，就算計埋飲品，應該都可以$300以下落樓，以食西班牙嘢而言，好抵吓啦！
個人評分
味道：7/10
環境：8/10
服務：7/10
抵食：8/10
平均每人消費：HK$210
餐廳資料：
Rojo
天后木星街3號地下B舖
2715 7777

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================