2016 EASTER 山陽四國賞花淺度遊 DAY 6 @ 香美市 ANPANMAN MUSEUM, 大步危, 祖谷溫泉和之宿

第 6日車程比較長, 
小齊一早起身上車冇耐又瞓返~
長途跋涉由琴平揸車去高知縣香美市, 
為左帶小齊去睇 ANPANMAN MUSEUM




瞓到咁~ 哈哈






車程長呀我地中途都有去D PA 休息下再上路
PA 都有櫻花~



睇地圖都行左大半路程啦



目的地係香美市



四國冇其他大城市果種發達, 
但風景區卻是一絕, 
沿路見到湖光山色, 深入竹林深處
心曠神怡



成 2個鐘車程先o黎到 ANPANMAN MUSEUM!



又見櫻花~









ANPANMAN MUSEUM o係橫濱, 福岡, 名古屋, 仙台都有, 
相信唔少小朋友都去過









Anpanman 真係陪住日本小朋友成長嘅character



呢度有個小型遊樂場o添









Museum要比入場費




















2樓係美術館咁
























地下果層就啱小朋友, 
而且係6歲以下比較啱
大啲恐防會覺得低B


















小齊仍然鍾意玩啲BB嘢，
所以嚟呢度都仲覺得ok
估計大多幾年就會冇興趣









參觀完我地去左對面間餐廳食lunch, 
呢度冇其他地方食咖...我地叫左意粉, 飯
地道食材清淡又冇乜肉, 簡便嘅一餐



主館後面其實仲有2個別館
有時間可以睇埋






其中一個館好有“兒童之科學” feel



有啲木製玩具同簡單機械設計






小齊呢樣試下, 果樣摸下
不亦樂乎~



難得冇乜人, 真係可以探索一下



逐件試~









另一個別館係anpanman作者嘅其他作品展覽
唔可以影相但有紀念品同繪本出售






鏡頭一轉我地揸返車去德島縣, 
只係o係高知停左幾個鐘, 所以話係淺度遊
下次有時間好想去埋四萬十 ~






我地打算去大步危睇風景
據說風景好靚



o黎到見到溪流係"碧綠"色!!
我部相機就影唔出, 
但大家可以上網睇其他介紹~




仲有觀光船可以坐o係山川間遊覽
我地只係預左半小時o係度睇睇, 
當然坐唔到船了









除左睇風景呢度仲有個"鬼屋"景點


卞
小齊細膽話唔去, 我一個人去也是興趣缺缺



於是繼續行程向我地今晚o既旅館進發



我地今晚會住祖谷o既溫泉酒店, 
想早D 去到o係天黑之前試試個風呂



沿路山呀水呀...
人煙越見稀少






多得GPS 帶領, 卒之到埗



祖谷溫泉和之宿
祖谷溫泉區仲有幾間出名o既旅館, 
我揀左呢間有個原因, 一陣講係咩~



今次book左普通房



我地3人o黎講尚算OK
地方不大但雅潔可喜



小齊已急不及待食迎賓點心



點心後換上浴衣去泡溫泉囉~



小齊真係有D似日本妹...



我地住別館6樓, 去露天溫泉要坐纜車



無錯! 係纜車!
旅館o係露天風呂要坐私家纜車前往, 
因為o係山腳咖~  我都係因為呢個特別原因先book呢間旅館咖!!
每班纜車相隔半小時左右







望落去路軌真係到山腳



等車時又睇下風景, 
比山環抱, 空氣有種清新感覺
我相信o係度住日日吸咁清新o既空氣會長命D



纜車到啦, 小齊話要自己坐單人位



幾開心~



幾分鐘之後到山腳啦~
溪水係淺綠色



風呂是這樣 (官網圖)
坦白講我都試過唔少日本風呂, 
呢度可以入到我心目中o既三甲, 
一來風景唔錯夠特色, 特別之處係佢d 溫泉水係滑咖!!
好 silky ~ 即刻覺得有潤膚功效!
(我臨走都忍唔住買左d溫泉水護膚品)湲
美中不足係泉水唔多夠熱, 熱d會舒暢d~



浸完溫泉食晚飯, 
係我地呢個 trip 第一晚o既一泊二食




































整體算ok啦, 一般日本餐o既感覺



小齊當然最欣賞甜品生果, 嫌少~



晚飯後回房已見床舖 ready
我地休息一會再去旅館o既大浴場泡多次~
十分寫意, 一洗幾日o既疲勞



第 6日行程完~

============================================

感謝 敗家媽媽 提供以上資料

敗家媽媽的網誌: http://buyjiamama.blogspot.hk/

============================================