正宗水上人氣鍋專門店 Boat Dweller Steam Hot Pot Specialist：氣鍋蒸選

近年大行其道嘅蒸氣鍋，小弟唔算食得多，皆因食蒸氣鍋以品嚐食物嘅鮮味為主，所以，一間店食材嘅優劣就成為成敗關鍵。早前同食友飯聚，就聽佢猛讚依一間「水上人」，仲標以正宗，今晚就嚟到一探究竟喺咪好似食友所講咁正。


門口仲架起名廚「周中推介」，不過，好搞笑，佢推介唔喺有咩正嘢食，而喺唔同嘅優惠時段，果然鬼馬！

踏進餐廳，一室裝修以竹作為主題，雅致不庸俗，加上樓底高，枱櫈安排唔太逼，所以，感覺闊落舒服。尤其4人卡位，絕對無逼逼夾夾嘅感覺，枱嘅長闊都比一般大。



正如上文所講，食材嘅質素好重要，當睇到偌大嘅魚缸，放滿唔同種類、生生猛猛嘅海鮮，會唔會令你信心大增呢？

此外，魚缸旁掛上兩塊大黑板，正正就喺是日時令揀手海鮮，明碼實價，童叟無欺。

食海鮮，比起散點，叫套餐就易圍數。嚟之前都睇過人家嘅食評做參考，所以，心裡有數。餐牌一面喺散點食材，另一面就喺唔同級別嘅套餐（全部兩位起），我哋就揀個中價位（$398 / 位）嘅B餐。





影埋個酒水牌，俾大家有個參考。



不過，一如好多中菜館，既收花生（每碟$10），又收茶介醬油（每位$28），仲有加一服務費依等傳統巧取嘅收費。老實講，花生都算喇，但茶介醬油就自覺有啲多餘，嚟得食蒸鍋都會叫嘢飲，再者，蒸海鮮以嚐原味為主，唔應該太倚賴太多醬油提鮮，所以，我俾嘅醬油費真喺白蝕俾佢呀。



坐定定等食，因為，近乎每蒸一樣食材，都有店員幫忙。不過，食過蒸鍋嘅朋友都知，例牌附送粥底，所以，最先送嚟嘅喺做粥底嘅白米同雞件。







胭脂蚌 每人有3隻，大細不一，我等外行人，睇外觀跟平常嘅蜆隻無咩分別，但蒸熟之後，你就明白何解叫「胭脂」喇。

感覺有啲似北寄貝，尖尖一角帶粉紅。先試一隻乜都唔好點，肉質爽口清甜，最緊要半粒沙都無。之後再試一隻沾丁點豉油，鮮味更能突顯。





白汁貴妃蚌 我估師傅都喺想俾客人有啲新意，唔好樣樣都咁寡，所以，墊啲金菇碎之餘，仲搞啲創意鋪上白汁。

還好個白汁唔算太濃，無搶走蚌本身嘅鮮味，但點都影響咗少少，倒不少簡簡單單加少少白酒落去，做成一道白酒蒸貴妃蚌，唔知效果會唔會仲好啲。





象拔蚌仔 店員話食依個象拔蚌仔唔使蒸好耐，嘩！真咪睇住佢冚番頂「草帽」，轉頭就話食得，蒸得嗰半分鐘左右。

蚌仔已切成細條，個樣好似未熟咁款，真喺信個店員話OK就OK，入口有種好似食緊刺身嘅感覺，清新爽甜，又幾好喎。





奄仔蟹 奄仔蟹雖然細細隻，但勝在肉鮮膏香，稱之爆膏都不為過，當然，每人得半隻確喺唔夠喉啦，但高膽固醇嘅嘢少食多滋味嘛！







波士頓龍蝦 是晚海鮮嘅亮點卒之登場，聽講近年波士頓龍蝦因產量豐而價位抵食咗，所以，比往常隨處都有佢蹤影。

將蝦身、蝦鉗一次過拆完肉先食，份外過癮，尤其隻鉗，拆咗真喺大大嚿蝦肉。肉質確喺爽口彈牙，鮮甜無比，同樣，沾丁點豉油，已足夠提鮮，不得不讚啲料夠新鮮。







雪花和牛 食咗幾道海鮮食材，輪到紅肉登場，咪以為蒸和牛喺咩新奇事，早兩年已經曾晌西環嘅季和日本料理試過和牛蒸籠料理，仲喺飛驒和牛。今趟嘅蒸和牛，睇落質素不俗，單睇啲雪花紋，真喺分布得頗平均而細密，非常對辦，每位客人有二兩，裁出嚟人人有兩大片。

原籠放入爐內蒸大概5分鐘左右，成品跟普通牛肉無異，但入口軟腍富油香，綿綿油潤，就算未喺入口即化，都可以講喺嫩滑無渣。





怪味禾豚肉 明明唔見套餐有包，問個究竟，原來喺推廣「加餸」，一籠有8塊，每塊都加上一抹秘醬，少少意外驚喜。

豚肉需要蒸耐少少，不過，都好快有得食。將豚肉捲起一啖放入口，肉質蒸得啱啱好，挺鬆軟，一股「怪味」有啲似沙茶醬，再問店員原本來喺一啲帶新疆風味嘅醬料，又真喺幾得意。





金蒜蒸勝瓜 套裝所包嘅蔬菜就只有勝瓜，是種不過不失嘅取材。整個餐只得一款蔬菜，略嫌單調，但最大問題喺勝瓜唔喺人人都啱食，如果有多一兩款蔬菜俾客人揀，就人性化好多。





霸王西施粥 所有「蒸氣」食材都食完晒，就喺輪到食粥時，佢哋啲精華落晒入粥，再加入雞件，個粥唔鮮甜都幾咁難。原來個粥都唔喺就咁滾完就算，按個人喜好後加蔥花、榨菜及芫茜，增添香氣，但最欣賞喺再混入一碗炸米花，立時個粥綿滑得嚟，又有份脆脆口感，好食到飽上頸都要食多一碗。







西瓜 如一般中菜館咁，以西瓜作為飯後果（成本平吖嘛），無咩特別，只算為點點心意，當然，食完咁多熱嘢，片片西瓜可以帶嚟陣陣涼意。

整體而言，食得出用料新鮮，份量亦啱啱好，不過，始終一如好多中菜館嘅漏習咁，收費多多，好似$398嘅套餐，只喺加多罐汽水，埋單每人要近成$500，可是，依個做法相信都無乜中菜館會願意打破（註：稻香系嘅酒家好多都唔收依等雜費，但一段時間無幫襯，唔知仲喺唔喺咁）！
個人評分
味道：8/10
環境：8/10
服務：9/10
抵食：7/10
平均每人消費：HK$475
餐廳資料：
正宗水上人氣鍋專門店 Boat Dweller Steam Hot Pot Specialist
旺角砵蘭街196號地下
2527 8883

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================