仲有幾日小齊就幼稚園畢業,
9月就會升上小學~
由舊年開始我就同小齊預備升小o既事,
當中投考直資/私校, 自行選校都經歷過
預備工作包括儲 d人有我有o既cert, 填表, 整 portfolio, 買面試衫, 去 interview...
比起 3年前考幼稚園真係複雜左, 難度更高, 最慘同埋壓力更重o既係對小朋友影響更大,
經過今年同小齊考小學我明白點解香港人唔係咁願意生育子女, 讀書真唔簡單
![]()
話分兩頭, 有批家長係唔會太擔心升小,
可能係小朋友已經有足夠分入心儀小學 (例如係有兄姊就讀該校等世襲因素);
亦可能係已經有 IS 收左 K2 已經跳船, 考小學係可有可無;
而或者覺得讀邊間都冇乜所謂o既豁達派
以上o既都可以寬心面對家中 5, 6歲小朋友o既升小一事
(但能夠做到以上呢批人都可以話係各有前人莫羨人o既)
敗家媽媽呢? 就應該係夾o係中間果批, 又唔係好緊張但當然又唔係完全豁達 ~
![]()
又講 dd 背景資料:
自行我有 2間都有幾大機會, 分別係我同外子o既母校 (即 20分), 一間係地區一線 (有宗教), 一間係二線 (無宗教),
只可惜兩間都唔近家亦未必有校車... 如果等運到等到大抽獎恐怕我會擔心到癲...
有家長會搬家揀校網但我地開過家庭會議否決左呢個可能性, 小齊太想住近公公婆婆啦～
加上我地都懶懶地, 一動不如一靜
考直私變得事在必行!
於是成大半個K3生涯都同升小面試平衡渡過,
起起落落高高低低
![]()
但今時今日o的直私間間都幾千人考, 要突圍而出談何容易?! 成日講劉華喎?! 個個都鍾意但人地鍾意我先得咖?! 喺過程中學會欣賞唔同學校嘅優點都好重要, 報得嘅學校總有令我欣賞嘅地方, “兩情相悅” 時繼續發掘佢嘅可愛之處總好過立心非君不嫁萬一失落時難以遣懷~
好多人都鼓勵我話小齊讀名幼機會已經比人好, 但一日未上場一日都唔知結果
而且小齊只係普通小朋友, 冇乜獎項證書或技能,
性格上算係靜啲, 唔係十分主動果批,
據說考小學性格活潑主動會比較有利
所以我變得忐忑不安呢~
雖然有啲擔心但我諗唔會全軍覆沒啩?!
(事後發現呢, 有擔心就報多幾間啦！)
![]()
首先我訂立o既策略係:
1. 自行要穩 -- 本區我無太心儀之選, 大抽獎可以放棄, 自行我想 "穩入"一間津校做 back up, 所以揀左 2 線但冇宗教o既學校, 20分基本上已經可以去做校服咁滯 (想知每校機會上多d EK 問人/收風, 往年15分都收o既即 20分全收)
(官校/無宗教津校一般競爭略低於同級但有宗教o既學校, 起碼冇人有宗教果 5分先)
2. 直/私 大包圍 -- 我 list 左 over 10 間心儀o既學校, check 埋佢地o既面試日期, 要唔要整 portfolio? 教育理念, 有咩強弱項 (強弱項因應個人需要, 好似地點遠, 普教中對我o黎講就係弱項, 對其他人就未必, 所以真係好個人選擇!) 我知有人報廿幾間, 其實邊有人想咁辛苦呀？但報多幾間的確會令人安心啲啲 (哦呢間收reject呀？ 咁下間啦～ ) 日子好似易過啲
3. 保持戰意 -- 每次面試後不論結果都要同小齊去玩以保持戰意, 唔會另佢覺得面試係苦差 (事後發現多數係去 fing 錢樂園)
4. 保持新鮮感 -- hehe...買新衫 for interview 是也~
一路考一路再調整策略!
![]()
跟住就係落手寫自薦信同整portfolio啦
自薦信真係需要係“自薦” ，可以的話唔好外判
自己係最清楚小朋友強弱項嘅人,
過去, 將來會點培育亦係只有自己先知!
考小係matching game, 學校如果真係會睇信同portfolio , 呢個就係最好嘅機會去推介自己嘅小朋友! 點可以比其他人寫呢？ 我知有啲面試班收幾千蚊幫人整portfolio , 我都睇過呢啲“重金”portfolio, 但坦白講 -- 唔值!
家長自己用心做一份tailormade 一定好過呢啲面試班mass production 呢！
有好多學校唔收 portfolio, 有啲話收左唔睇 (咁你又收?!) 我報嘅學校之中還是講明唔收portfolio嘅比較多!
我覺得家長如果做到嘅咪做, 冇時間或唔識做咪由佢, 面試表現比一份精美 portfolio似乎更重要! 況且 portfolio 要放啲咩的確係費煞思量???!!! 得3, 4版可以寫啲咩呢？ 我最後整出嚟果份一張 cert copy 都冇夾, 但自己睇完覺得有助學校了解小齊呢！有冇用我唔知, 自己覺得盡左力啦～
越寫越長, 下篇待續!
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
