岡山。岡山城﹑後樂園﹑倉敷美觀地區 Day8

第八天（續）

離開四國，去到中國地區岡山；岡山係日本雨量最少既地區，有「晴天之國」之稱，今日就遇到好靚既晴天啦

由岡山站開始岡山旅程

岡山站對出有個人像，除左會考讀過日本歷史之外都冇睇過日本歷史，唔識佢係邊個

呢個就識啦，細個睇好多卡通片都會見到「桃太郎」，佢係日本傳說之中一位來自於岡山既人物，係岡山好多機會見到佢架

岡山站對出有電車「岡山電氣軌道」，佢已經有超過一百年歷史，坐佢去玩都算方便

由「岡山站」坐去最近岡山城既「城下站」只係幾個站，車費￥100好快到；岡山電車係日本最短既路面電車，有兩條線路，坐去岡山城就要小心上錯車

幾分鐘就到站落車，不過岡山城同電車站有小小距離，跟指示行去大約10分鐘

河既左邊係日本三大名園之一「後樂園」，右邊係「岡山城」，一次過就可以參觀岡山兩個重要地方，而家我先去岡山城參觀

日本人好鐘意坐係河邊？睇日劇同勳畫都成日見

望到岡山城啦！岡山城同平時見開既城堡有啲唔同，因為佢外牆係黑色，就好似烏鴉一樣，所以又有名叫「烏城」

行上去近距離接觸岡山城

岡山城可以入去天守閣參觀，咁當然要入一入去啦；我一陣仲會去後樂園參觀，係呢道同時買岡山城同後樂園既通用入場券係平過兩個地方分開買，一齊買冇記錯既話係￥560，慳返小小都好

岡山城原本既天守閣係第二次世界大戰時被燒毀，而家呢個天守係戰後重建，入面設備好齊全，一入已經可以由地下搭lift上到頂層

係頂樓睇風景

好清楚見到後樂園

天守閣入面有個小小地方比人著古裝影相，啲衫同道具放晒出黎比人任影；咁岩我係道睇緊既時間有家人叫埋我一齊影，雖然唔知發生咩事，不過影左好多相，哈哈

日本啲轎咁細邊坐得舒服架

有得整備前燒，呢個要另外收費

天守閣唔係好大，好快就出返黎，如果岩時間既話岡山城係有免費導賞團帶人參觀，咁當然要識聽日文先明講咩啦

舊岡山城遺跡

由岡山城出發過條橋就到後樂園

呢個應該係後樂園南門

岡山後樂園同金澤兼六園﹑水戶偕樂園合稱為日本三名園，兼六園之前已經去過，終於黎到第二個名園後樂園啦；不過今次明顯黎唔岩時候，草地都變成灰晒，感覺怪怪地...

有啲水點綴一下都算靚小小

園中間有個小山丘，可以上去睇風景，居高臨下係好睇好多（如果岩季節一定超靚）

有好多光禿禿既櫻花樹

梅花就開左好多

啲樹同草灰晒搞到風景唔係太靚，四圍行下hea下算lu

如果春天黎到開滿花一定靚好多好多

隨意行一個圈，去返正門個邊走人lu，二月唔係花開季節，亦都冇綠草如茵，此終都係有啲失色，冇所謂啦冬天係冇咁多野睇架啦，呢道總算係一個hea行既好地方

離開後樂園慢慢行去電車站要用15分鐘，一路行一路留意下四圍既野不知不覺就行到

去返電車站坐車返岡山站，如果得閒啲既話我直頭行返去岡山站都問題不大，不過一陣仲有地方要去就唔慢慢行啦；咁岩比我遇見一部新款電車，同舊款電車有好大對比

岡山城+後樂園半日遊好快又完成啦，去到岡山站坐火車去下一個地方lu

下一個要去既地方「倉敷」距離岡山市只係幾個站，今次坐呢部黃色普通列車出發；呢款車係日本好多地方都可以見到，今次係我第一次搭咋

15分鐘車程就到；開頭以為倉敷係一個小地方，見到佢既火車站已經感覺到倉敷比我想像中大好多，人流都好多

黎到倉敷係想去美觀地區，出火車站時個天都黑黑地，即刻向美觀地區衝去，係我加快腳步之下用左10分鐘行到，五點五十分成功到達，呢個時候四周圍已經冇咩人，只係得返入口仲有幾間鋪頭開住門（好快都收埋工lu）

美觀地區之所以咁出名，原因係佢被日本文化廳指定為「重要建築物群保存地區」，保留左好多傳統日本建築，而且仲係好特別既白色外牆，又白又靚

好 耐之前我曾經睇過一張倉敷既相，個時根本就唔知倉敷係邊道，只知道相中有隻小船泛舟河上，河邊仲有綠色大樹同傳統建築襯托，成個畫面可以話係完美，呢個就 係我鐘意既水鄉風景，估唔到我又真係黎左當年呢個唔識既地方；本來我book左係呢道住兩晚，後來諗諗下都係懶搬行李所以放棄，亦都影響到第二晚睇唔到最 重要既活動...係自己懶咁冇得怨啦

京都﹑高山等等日本好多地方都有呢啲傳統舊街，但係白色建築比較少見，有河既舊街就更加少見

今日太遲黎到，個天好快已經黑晒，日景睇唔到只睇到夜景

其實夜景都好靚架，有時候覺得夜景比日景更加靚，而且冇咩人，好寧靜好舒服

行返去火車站時路過一間炸豬扒店，順便入去食晚餐

豬扒好大塊，新鮮炸出黎超好食丫

係香港食最少都百幾蚊，呢個只係￥620咋，而且白飯仲係任裝，唔食返幾碗都唔比面佢啦

食飽繼續行去火車站

先係倉敷站坐車去岡山站；咁岩有部特急列車先到就上左佢，張pass包左坐特急可以免費坐，今次只係坐一個站都冇車拳check飛

係岡山站轉坐新幹線去新大阪站

上左最快到個班車，夜晚車上一樣好多人，好彩我一個人好易搵到位

去到新大阪站要再轉車去大阪站

夜晚10點半返到去hostel啦

今日一日之內就去左好多地方，聽日仲會去多次岡山，睇一個好特別既傳統活動；聽日要搭既車大約十點半先開，唔洗好似今日咁早起身，可以訓一個好教啦