28-6-2016：半熟手媽媽14m．牙牙學語(三)之樹獺曉的雙音節詞語

原本第三篇牙牙學語嘅構思，只係想講曉曉開始學講雙音節詞語嘅過程，但點解變咗樹獺曉？呢個係爸爸講的﹗如果你有睇「優獸大都會」電影，你一定會記得好搶眼嘅交通部樹獺職員，未睇過？套戲好搞笑，好值得睇㗎～

之前曉曉學講嘢一直都係單音或者疊字，其實都唔係有心教bb話，但自自然然就發展成咁，幾時驚覺要準確啲教佢講正確嘅詞語呢，就係巴士變成「巴巴」嘅時候～爸爸如果唔介意自己同巴士同音都算數喇，但我實在好介紹我自己同馬騮同音囉，曉曉認得馬騮係「媽媽」呀陰公～^^"而我哋一直好努力教佢嘅雙音節詞語係姨媽，既然佢識講「2」又識講「媽」，姨媽應該唔難丫，但只係呃到佢講咗一次咋～

我勢估唔到佢自己講嘅第一個雙音節詞語係⋯如果開盤嘅話，我諗大家估一百次都估唔中﹗哈哈～居然係－－肚臍﹗我有教佢講眼、耳、口、鼻、手、腳、pat pat，但真係冇教過肚臍﹗但呢個詞語彷彿佢真係成日會聽得到，幾時？咪就係埋身食奶奶時，我會叫佢：「你唔好再搞我個肚臍喇﹗」(我需要馬騮自己遮住對眼嗰個emoji﹗)可能真係聽得太多，慢慢就知道呢個窿係肚臍，仲要自己彈出呢兩隻字出嚟囉～第一次聽見時都唔相信自己對耳，太爆笑了～而家好肯定佢識啦，早兩日睇相簿時，佢指住我去studio影嘅大肚相講「肚臍」，估唔到睇咁多次嘅相簿都有新發現﹗

因為肚臍係咁偶然，我曾經聽過嘅「搞掂」都可能係真嘅，事關平時同佢換片，我搞掂時都不自覺會講咗搞掂，一日換幾次，搞掂又聽咗幾次，學識咗都唔出奇～

爸爸話呢兩日佢睇「好品格」嗰本書時不停講「排隊」，講排隊嗰頁本來佢只講「排」之嘛，轉眼間又進步了～

講番點解係樹獺曉呢，肚臍、搞掂同埋排隊都係佢自己學識的，但我教嘅雙音節詞會慢到好似Zootopia嗰隻樹獺咁，最初令我哋concern嘅「巴士」好不容易成功了，唔再係「爸爸」，但佢講嘅時候係「巴－－士」，兩隻字係分開跌出來的﹗另外一個就係祈禱嘅「阿門」，開頭佢只跟住講「門」，咁想講得好啲嘛，咪強調個「阿」囉，而家又變成「阿－－門」～

小朋友進步真係好快，隔一兩個星期，學多嘅新詞又多好多了﹗最近曉曉更願意模仿我哋發音，進步應該會更明顯了～

前往其他半熟手媽媽blog

分享此文：

• Twitter
• Facebook

請按讚：

Comments

comments

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================