樂天皇朝 Paradise Dynasty：知足常樂

樂天皇朝喺一家幾鍾意嘅餐廳，價位唔貴，餸菜有水準，依家開晌旺角雅蘭，對我哋依啲九龍人，唔晒過海真喺方便咗好多，所以，專登搵埋老友一行3人過嚟聚舊兼食餐飯。我哋幾個都喺70後，算喺努力工作搵餐晏，有時都會對現況有啲不滿，但生活各方面稱得上無咩缺，懂得知足常樂可以令人更正面。


小籠包絕對喺佢哋嘅招牌，唔單止門口有個大廣告牌介紹其小籠包嘅特點，更從門口側嘅玻璃，可以直接睇到師傅整小籠包嘅過程，足見店家對自家出品嘅信心。始終，小籠包都喺佢哋嘅招主打，晌門口等位時就見啲師傅唔停咁密密搓、密密包。



一如銅鑼灣總店，裝修雅致，餐廳中庭嘅一屏白石龍雕，餐廳尾嘅閃閃銀色大衣，帶有濃厚中國風，卻喺唔俗套。我哋被安排一角嘅卡位，就更加份外少騷擾，感覺較幽靜。不得不讚，全店調校嘅燈光柔和色暖，但每張枱都梗打盞射燈，超方便我依類相機先食嘅人。







醬油花生、栗子 $15 今次由老友發辦點菜，小弟就樂得清閒，所以，影吓相，兼食吓前菜小食。花生煮得好腍，又有醬油香，栗子切成小粒，粉糯好食。

餐牌嘅設計跟以前都唔喺好大分別，「頭版」喺新推介嘅小籠包，之後有啲廚師推介菜式，其次就喺一連串嘅小籠包、點心、湯、涼菜、經典小炒、人氣川菜、飯麵、拉麵、甜品、飲料，全部圖文並茂，中英文對照，唔會錯估其他菜式，又有晒編號，可以跟侍應直接落單，亦自行剔落單紙又得，總之唔會咁易嗌錯嘢落錯單。





避風塘辣蟹小籠包（$98/6粒） 皇朝小籠包（八種口味）食過好幾次，所以，今次就無打算再試，而今期新推出由港人票選嘅避風塘炒蟹小籠包就喺必試之選。一橙一紅鴛鴦色外皮，已甚具特色，加上充滿港式風情嘅避風塘口味，極具賣點，再者外皮薄，餡料以豬肉混入蟹肉，鮮味更上一層樓，而且富肉汁，辛辣鮮香，真喺頗獨特。









醋醬海蜇頭 $58 海蜇頭裁成一件件，口感硬硬哋，又爽爽哋，底下墊有唔少青瓜粒，以酸醋為醬，極之開胃嘅涼菜。





香辣蒜泥白肉 $62 睇返以前啲食評，晌2014年9月第一次幫襯，就曾經食過佢嘅蒜泥白肉，兩年前都只喺賣$58，算喺無乜點加價 。樂天所做嘅蒜泥白肉做得別緻小巧，腩肉薄切再捲起青瓜絲，既唔覺任何肥膩，又有份清新爽口感，更過癮喺一陣陣辛辣香同蒜香湧出，有心思。





老田家菜肉雲吞湯 $52 一客雲吞湯啱啱好有6粒，平均分唔使爭，粒粒包得好豐滿，填滿晒菜肉，加上湯頭香濃鮮甜，所以，有得食又有得飲。





竹筒剁椒魚片 $108 翻餐牌時，老友睇到依道新菜，覺得幾有趣。 剁椒魚片以竹筒做盛器，確喺成為雅致嘅亮點，面層鋪滿艷紅椒碎，大大件嘅魚片雪白滑溜，兩者相映成趣。魚片入口質感挺實，夾起嚟唔會「散修修」，味道帶川式嘅辣，卻無太濃重嘅花椒之麻，老友喜歡佢嘅辛辣刺激。







京味炸醬拉麵 $52 因為依度嘅拉麵全部都喺即場拉，所以，小弟要求加個拉麵作主食，之前已試過喇沙湯底，相當出色，今回則試試京味炸醬。大大碗拉麵，淋上大量炸醬，加上青瓜絲、芫莤碎、蔥粒，撈勻嚟食，炸醬嘅香濃，搭上佐料嘅清爽，滋味無窮！



檸檬蘆薈桂花蜜 $26 有女士在場，甜點作結自然必不可少，況且，小弟都喺甜點死粉一員，又點可以唔食甜品吖。女士總喜歡養顏滋潤，依一道檸檬蘆薈桂花蜜喺首推啦，冰涼透心嘅桂花蜜，配搭埋養顏嘅蘆薈粒，入口又滲出幽幽檸檬清香，輕盈、清爽、清潤，富心思嘅甜品。



宮廷驢打滾 $35/3粒 「驢打滾」名字好得意，印象中從未試過，所以，點一客睇睇喺點。店員介紹喺以前嘅宮廷食物，後來成為北京地道小食，簡單講原來喺紅豆糯米卷，再撒上黃豆粉，食落軟綿黏糯，煙煙韌韌，紅豆蓉又夠清甜，認真唔錯。

晌餐枱上仲見到個五折「下午茶優惠」，真喺估唔到佢哋都做到頗出名，食客都客似雲來，仲有咁筍嘅優惠，雖然只喺星期一至五下午茶時段供應，但明顯都喺益食客。

整體服務一如過往，換碟，添水，勤快到位，侍應亦好有禮貌。加上環境舒適，食物既有特色，又有水準，值得一嚟再嚟。
個人評分
味道：9/10
環境：8/10
服務：9/10
抵食：8/10
平均每人消費：HK$195
餐廳資料：
樂天皇朝 Paradise Dynasty
角彌敦道639號雅蘭中心2樓203及205號舖
2177 3456

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================