1：今屆非建制（我唔用泛民呢個Term啦）成績算唔錯啦，高投票率，非建制直選有19席，比上屆多一席，當然，總有啲（自己覺得）好出色嘅參選者落選，亦有一啲（自己覺得）廢柴或仆街當選，這是時勢及制度使然，豈能盡如人意？即使美國，都唔係次次都自己人當選啦，吓吓香港已死，吓吓香港不配有民主，點同那無形之手鬥落去。
2：上屆贏開嘅衞生、教育、法律、科技、社福同會計都成功冧莊，會計上屆梁繼昌得票唔過半，今屆得票六成！
周博賢都雖敗猶榮！
建築測量姚松炎爆冷勝出，仲要係贏「梁粉」呀！係「梁粉」呀！
連醫學界嗰位都號稱「淺黃」。
除非你一定要本土派、自決派勝出先高興，否則點都唔可以叫失望啩！大家要明白，敵人嘅敵人就係朋友呀！
3：提提大家，計埋醫學界個位，非建制有30人，加埋「反斗」的自由黨，係34席！真係諗起都想笑！
4：除非你是熱狗，否則即使不支持雷動計劃（如我），也很難說此計劃失敗啩（是否成功就好難講）。雷動計劃原意從來不是趕走所有保皇黨或讓泛民全部當選（我都想），而是透過小部分人配票，令本來落選第一位變當選最後一位。
結果如何？上屆五區，有四區最後一位當選者是建制派，今屆呢，有四區最後一位當選者是反建制派，一來一回差了多少個議席！
范國威可能好慘（其實他排第十一位，前面仲有個方國珊），但他落選是因為X家富出嚟選喎，而且佢當選，代表長毛落選，條數一樣；皇上同教主都（好似）好慘，但他們當選代表機師同BB落選，條數都係一樣（如果你當雙黃是自己人的話）。
至於新界西李卓人真係好慘，但新界西亂過乜！李卓人之後全是非建制派，黃浩銘、黃潤達、馮檢基同黃俊傑，個個少則近萬票，多則2萬幾票，實死啦！同樣道理，九龍東贏選票輸議席都無法，鬼叫人哋出三個，非建制出四個，自己分薄無得講喎！
即使強如中央配票機器，都唔係話配就配啦！否則超級區議會頂頂同琼姐過少少票，亡國興已經贏咗啦！
無錯，戴可能真係書生論政，但我哋冷眼旁觀笑人傻仔乜都賴晒佢，又是否公平呢？
5：下屆立法會，無咗「子烏虛有」、「明張目膽」的TreeGun，又無咗「日以繼夜，夜以繼日」寫大字數午餐肉的亡國興，應該少了娛樂性！信我啦！江山代有才人出，我睇好容小姐㗎！
6：最後最後，是的，選舉已經完咗啦！無論你覺得非建制係贏係輸，覺得畀何同容贏咗係咪好黑暗好灰，又或者覺得泛民贏議席係咪慘過民建聯贏都好，都要接受結果。趁住放假攤抖中，送上H2呢一段畀大家。
![]()
![]()
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
