第十天（續）
宇治最出名應該係抹茶，係香港都可以食到（真假就唔知啦），除此之外宇治仲有好多地方值得去，可以參觀到世界遺產；宇治距離京都好近，大約二十分鐘車程，之前未去過今次我就去走返轉
由稻荷站坐開去奈良方向既車，大約二十分鐘去到宇治站
宇治站比起頭先稻荷站大好多，快速同普通列車都會停
宇治主要參觀既景點集中係河邊，由火車站行過去就得
由火車站行幾分鐘就去到平等院對出既表參道
呢道表參道最特別既地方係沿路都有好香既抹茶味道，一路行一路都係香味，鐘意抹茶既人一定覺得呢道超正；既然宇治抹茶咁出名，兩旁商店主要都係賣抹茶產品，食物﹑茶葉，仲有好多抹茶雪糕
黎到宇治當然要試下特產抹茶雪糕啦，好好食架
「平等院」係宇治最出名既地方，距離而家有差唔多成千年歷史，係日本國寶亦係世界文化遺產；叫得國寶都知道係好野，就算冇咩興趣都一於入去睇睇；平等院入場費￥600，係日本黎講都算小小貴架，黎到都係入左去先算
進入平等院後係一個日式花園，天氣好花園都特別靚，同琴日落大雨比心情都好得多
平等院之中最重要係呢座「鳳凰堂」，堂內有由平安時代頂級佛師製作既「阿彌陀如來」坐像，上千年歷史既佛像成功由古代保存落黎，話係國保當之無愧，除此之外堂內仲有好多精雕細琢既菩薩像，好值得參觀
入鳳凰堂要另外再買飛，而且有限時要一批批入去，最後我都懶排隊冇入去lu
好大個鐘
院內有間博物館，展出平等院相關既文物同介紹歷史等等，入面唔可以影相我冇影lu
由博物館出黎之後沿路兜過鳳凰堂後面，又返到去入口位置
好快就行晒出返去啦；如果大家有日本10円硬幣不妨拎出黎望望，睇下硬幣上面既建築物同鳳凰堂係唔係好似呢，哈哈
平等院旁邊係宇治河
經過兩條橋去到對岸，呢邊都有好多古蹟參觀
落左橋之後見到「宇治神社」
呢個係一個小神社，人都少多人，難得係遊客區有個寧靜地方
唔知木條係點用呢？似係好似繪木咁用？
由宇治神社行多幾步，去到「宇治上神社」，宇治上神社係世界文化遺產，出名好多，遊人都多一啲
宇治上神社係平安時代建成，又係有成千年歷史咁多，同時亦都係日本現存最古老既神社，對神社冇咩興趣既我都要黎朝一朝聖
古老既神社冇新式神社咁美輪美奐，又冇咁多色彩，只有一種樸素既感覺，不過唔需要咁多修飾，簡簡單單可能已經係最好
宇治上神社好細，幾步已經參觀完出返黎
路過「橋寺放生院」，冇咩特別，係一間小小既佛寺
當係上黎睇下風景啦
穿過「宇治橋」行返去表參道個邊
宇治有好多以食抹茶著名既餐廳，呢間係其中一間
呢間伊藤久右衛門都好出名
中村藤吉係宇治又係好出名，我都想入去試試正宗抹茶美食，可惜一打開門就見到入面好多人排緊隊...
呢間食唔到，行返去近火車站個間中村藤吉，不過呢間都係超多人，門口掛個牌出黎寫住要等六十分鐘...我就冇咁好心情係道等，買啲手信就走，今日既午餐+下午茶食唔成lu...後來妹妹講先知，原來香港都有中村藤吉分店，估唔到竟然香港都有
坐火車返去京都站，再轉火車返大阪
有咁多蒸汽火車係道！大阪京都呢頭好似冇蒸汽火車行架？
五點半黃昏時份，一路坐車一路睇住日落，都幾靚
已經係坐特急列車，由宇治去關西機場坐足兩個鐘，路途遙遠；今次黎機場唔係要坐飛機，我係黎轉車咋
係關西機場坐普通列車返轉頭，坐一個站去到Rinku-town（臨空城）落車，呢道有大阪好出名既outlet
火車站出閘位係一個商場，呢個商場感覺勁奇怪，燈光冇日本平時行個啲商場咁光猛，地下暗暗地啲磚裂左又冇人理，鋪頭店員叫賣仲係講普通話，真係以為自己去左大陸...好彩呢個感覺只係係呢道出現，離開呢個小商場所有野都正常返
摩天輪係outlet標誌，離遠都可以睇到，唔怕唔識路
就係呢道啦！呢道好大岩晒shopping，我自己就冇野要買，見得閒冇野做黎睇下有冇野買比屋企人都好，好彩有收獲唔洗空手而回，哈哈
行到八點關門，坐車返去大阪市區
返到黎人山人海既道頓堀，行到邊都係咁多人
想食野要排長龍
我黎呢道係為左食一蘭咋，好多人都話一蘭味道一般，始終我未食過都要試一試先心息；今晚比之前下午黎到少左人排隊，不過都係要排一陣，夜晚我都冇野好做唔介意排下
排隊時劃定食咩
入去時先係售賣機買好野食；今日我好似冇食過午餐，買埋個替玉一陣加
自修室位，岩晒我一個人
味道好岩我口味，食拉麵我鐘意濃味啲既湯底，呢個岩晒我
記住食個時要留返啲湯比個替肉，冇晒湯既話我都唔知呢個麵可以點食，哈哈
係機場出返黎又係路途遙遠，去到一蘭又排左陣隊，到食完野已經十一點幾，如果坐JR返去又要轉車又要有排行，所以都係直接啲比錢坐地鐵
坐地鐵返去hostel方便好多，出左站行兩分鐘就到；今日又係由朝玩到晚，又京都又宇治又機場又大阪，一日就去左好多地方，聽日唔會去咁多地方啦，全日都會係京都，希望聽日都會繼續有好天氣啦
