8 外賣記

今晚招呼友人來舍下, 吹水兼飲吓啤酒, 各人準備一些小食, 已在屋企樓下茶記訂了兩三個小菜, 放工順道再在銅鑼灣外賣多件德國豬手.

上次食過這間德國餐廳, 燒豬手水準不錯, 今天放工, 六時十五分左右, 急急腳由天后走過來落單, 時間早, 未多客, 師傅話:"即叫即做, 要等一等喎....", 無問題啦...

時間尚早, 橫豎要等, 叫翻杯啤酒, 頂吓肚.... 上次嚟食過食晚餐, 飲過德國鐵血宰相"俾斯麥"最愛的Kostritzer Schwarzbier 黑啤, 今次要試試另一款...

餐牌上有三款生啤, 都是Bitburger酒廠旗下品牌, 選了一款酒精度略高的 Benediktine Weissbier (5.4% Alc) $68. 為了讓泡沫達到應有的標準份量, 水吧達人必須分多次開啤酒水喉... 唔單只豬手要等, 要飲好啤酒, 都要等啦... 55..., Benediktiner 的白啤(Weissbier) 的歷史是源自修道院, 但並不算是現今的"修道院啤酒", 因要稱得上"修道院啤酒", 不論是Trappist 又或 Abbey beer, 都有十分嚴格的定義標準, 有興趣...去網上爬文吧...

當然Benediktiner的釀製歷史也算十分悠久, 其最早出自四百年前的Kloster Ettal修道院, 味道有輕微的焦糖和蜂蜜香, 講比我聽, 即刻feel 到些少....  但還有.....這款啤酒的介紹:"絲絲香蕉和葡萄乾的果香"..., so..., 我的味蕾結構..., 未有如此超凡水準, 試不出來哦..., 靠其他高手吧, 另外, 還有一點... 這啤酒是"以阿爾卑斯山泉水及拜仁小麥發酵釀製..." 嘩..... "阿爾卑斯山泉水"... 我只飲開"屈人寺"的蒸餾水咋...., 未知阿爾卑斯山泉水是咩味呢...? 哈哈哈....  無論如何, 大淡一口, 泡沫豐富且持久, 實而不華, 順滑不澀, 酒體濃厚, 麥味香重, 喝起來口感潤滑有著迷人的味蕾質感 (so..., 其中兩句形容, 是抄自Benediktiner的介紹紙... 哈哈).

豬手燒好, 入盒攞走, 未上車前, 影幅街照留念...

回家, 打開紙盒上蓋, 豬手用大紙袋包起, 另附有配菜一盒.

燒德國鹹豬肘伴酸椰菜烤燒薯角 $198. 首先打開紙袋, 一隻大型豬手, 今天第二次食, 經過一輪運輸, 差不多半小時, 豬手皮仍然十分香脆, 用有齒鋼刀切開, 卜卜聲, 有聲、有畫、兼聞到香味.

傳統德國菜, 用的是豬肩以下、前腿上部, 皮略為厚, 燒到脆口, 配合皮下的膠質肥肉, 半肥半筋狀, 口感又軟、又煙韌、又脆. 一隻豬手, 夠三位男士享用, 記住要準備大量啤酒...

燒豬手, 不可能少了Sauerkraut (酸椰菜), 這店的Sauerkraut 偏甜而輕酸, 個人口味喜歡酸味高一點, 而原隻小薯, 經過半小時的交通, 略為涼了, 我立即開爐, 放鑊大炒兩下, 如果閣下姓"懶", 大可放微波爐, 叮一分鐘也可, 但當然無用鑊炒得那麼香脆吧.... 真係超正!!

================================

感謝oasiswong提供以上資料

oasiswong的網誌: http://www.openrice.com/zh/gourmet/reviews.htm?userid=85184&city=hongkong

================================