7 平日兼宵夜時段最底食!

未等齊人, 只有望..., 未有得食, 八啩一下餐牌, 椰椰芝麻雞煲 (雞"鍋"..., 硬係好UN耳, 雞"煲"好D囉..), 正價時段九十蚊一隻, 計埋打邊爐湯底, 算合理價, 宵夜時段, 減到去四十五蚊, 超值啦! 不過, 話須如此, 價格呢D嘢, 從來都無絕對, "市場"先係話事人, 無話絕對平或貴, 如果隔離又開多間... 嘜嘜嘜雞煲的話, 價格肯定還可以向下插...

人未齊, 照落單, 遲到唔等...是常識吧! 大煲上檯, 唔係用行內最多餐廳用的黑色"易潔煲", 改為不鎸鋼煲, 還要省到立立令, 那種閃閃令的煲身, 看得我有些少興奮... 真有點兒心理變態耶... 哈哈哈...

餐牌背頁, 又是那種三大程序和五項指令等的指導食法, 香港人呢... 連食都鍾意搵人教..., 點樣食法最好??? 梗係搵"權威性食用方法指導員"上翻個課程最好!!!

食雞煲, 送啤酒, 一隻雞, 送四罐, 半隻雞, 送兩罐, 牌子? So-Q-rry... 無得你揀, 只有燕京, 嗱..., 咁樣樣..., 人家講到明..係送, 唔使錢既, 唔好咁多投訴吧..., 九十蚊雞煲火鍋, 重送你四罐啤酒, 如果係宵夜, 重五十蚊有找, 你出街搵間平過呢到先講啦...老細...

全雞上檯..., 呀..呀..呀..., 我腦海...忽然地...汎起了一個圖像: 巴斯光年..., 還有配樂...: 雞, 全部都係雞, 全部都係雞, 全部都係雞.......,  哈...哈...哈..哈...

水滾..., 放雞落湯, 可能放雞落湯的那位天才, 餓得太耐的關係, 一時放得太快, Din Din Dum Dum..., 湯花四濺, 倒完雞, 冚蓋, 等... 等... 等... 還是等...

等食的時間, 最好當然係混醬, 個人口味, 不好那種...有殺錯 無放過的混醬心態, 只選幾款, 除了蔥花和辣椒碎, 還有專為椰子雞而推出的: 青桔和鮮沙薑, 紅、黃、青、啡的配搭, 單看賣相, 已經無得輸!

滾呀....滾..., 滾呀...滾..., 開蓋, 食得, 以迅雷不及掩耳的速度, 先搶得一件雞脾肉, 雞骨中央浸出尚未變成固體的已熟深啡血水, 正是剛熟的跡象, 此時的雞肉最滑溜.

配上自家製的調味, 新鮮沙薑醬, 落兩滴青桔汁, 加些少蔥花, 不要太辣, 只放一粒細辣椒碎, 入口, 雞皮厚度免強過關, 如果再薄一點更好, 雞肉非常出色, 又軟又滑, 醬汁配合得絕佳!

食完雞, 飲啖湯, 再咬兩件椰子肉, 仍然好硬..., 湯味非常清甜..., 非常清甜... 清甜到呢...., 不可能只有雞和椰子肉囉..., 你懂的....哈哈哈哈....

餐牌上寫著: 皇牌推介, 美國牛小排, 推廣價$48, 上檯時的賣相, 比想像中要好很多呀, 那種肥瘦佔二八分的比例, 啱晒我愛瘦唔愛肥的僻好喲...

灼至接近全熟的牛肉, 咬落仍然保持軟身不鞋口, 又是加了最喜歡的配料醬汁, 四十八蚊一碟的價錢, 好滿意了.

海生蝦 $30, 近年多了去街市買餸, 發現蝦價平了, 更發現了某種蝦的蝦殼特別硬身, 雖然味道吃不出有很大的分別, 但肉質似乎更彈牙一些, 可惜未有時間去詳細了解...

此為蝦蠔雙配, 被我灼至縮晒水的蠔肉, 無耐只能為海蝦作嫁衣裳, 彎彎曲線的身型, 頭向上, 尾向下, 壓著那奶白色的蠔, 放得夠美觀吧..?? 可惜最終都要入我口...

黃金脆竹卷 $20, 這碟廿蚊貨仔, 應真超值, 件件炸得金黃, 夠晒精神, 腐皮紋路平均, 先不浸湯咬一啖, 脆卜卜, 好鬆化.

夾一件在手, 千企唔好手震, 迅速地放湯一浸, 半秒時間已經足夠, 入口, 浸過湯的腐竹, 滿載清甜味道, 還有些微的餘脆.

魚皮餃 $48, 屬於餐牌上的精選系列, 應該是非一般的雪藏貨, 整整齊齊八隻, 外型脹卜卜, 魚皮餃屬於"任淥唔嬲"系列 (唔知道有此系列??? 唔係化...? 佢接近與"芋絲"齊名喎..., 係淥足一晚, 都咁彈牙好味既火鍋配料...)

嗱... 有證有據..., 一早放入湯, 半個鐘後, 仍然如剛剛放湯一樣, 四四正正, 整整齊齊 (當然..., 首要前提, 沒有被人食咗..., 所以要不時監察...大聲警告: "呢件嘢你我既!!!!"), 加些蒜蓉和辣椒, 入口彈牙煙韌有魚香, 超正!

脆鯇片 $20, 我對脆鯇這種後天培育品種的興趣不大..., 話說愈食得多黃豆, 魚身愈彈牙, 可以彈到咬唔入..., 講起食鯇魚, 我都係鍾意原始鯇魚的那種軟散口感, 脆鯇...都係留翻比好此道的友人...

So..., 無錯! 雖然口講唔食啫, 但人家夾到埋嚟, 點好意思推呢, 話晒..都算係知書識禮! 唔要..好無禮貌! 魚肉好彈...好彈...好彈...好彈牙呀...哈哈...哈哈...

元貝片 $58, 呢味...真係唔好講笑, 睇少陣都無晒..., 點分別元貝和帶子?? 依家唔係講呢D既時候...! 嗱嗱些夾件大既, 放湯..., 睇時間! 滾半分鐘...多五秒...

嗱..., 呢個係錯誤示範, 滾咗成分鐘..., 無法, 一放落去, 侍應竟然加湯喎, 真係..XYZ@#&!  但新鮮貨, 加些少蔥花炸蒜, 味道依然 very good!

手打鯪魚滑 $58, 我生平最唔鍾意食鯪魚球, 無法..., 真係最無興趣, 但此味屬於餐牌上的精選新鮮推介, 點都試少少....

一啖, 味道... 好有鯪魚味呀! 口感... 好有鯪魚肉既口感呀! 好新鮮呀!!  .. 哈哈...哈哈...哈哈

鯪魚球 $52, 這款鯪魚球, 又都是放在餐牌的精選部份, 相信也因為如此, 友人才會在之前食完"手打鯪魚滑", 還再落單, 食多次與鯪魚有關的鯪魚球, 但...今次唔好攪我了...

鐵棍淮山 $38, 我雖然無食, 但我有檢查過, 我以真誠發誓, 那件淮山, 一定無枝鐵棍咁硬!!

上載埋張火鍋餐紙, 方便大家, 也方便自己有需要時研究一下.

================================

感謝oasiswong提供以上資料

oasiswong的網誌: http://www.openrice.com/zh/gourmet/reviews.htm?userid=85184&city=hongkong

================================