試食活動
新加坡著名餐飲集團, 樂天, 最近在旺角雅蘭中心開設第二家香港分店, 官方網介紹, 集團在亞洲多個城市已經開了六十多間餐廳, 合共十二個品牌.
![]()
樂天新店, 落地旺角雅蘭, 以後要食八色小籠, 唔使過海去銅鑼灣了, 還記得...銅鑼灣開業時, 驟眼看到"樂天...", 咿..., 以為日韓餐廳在香港開店賣小籠包?!?!?!...
![]()
門口設計, 攞飛等位隔離, 開放式廚房, 一邊等位, 一邊看小籠包製作, 唔怕悶親, 但裡面的師傅仔們就.., 好似魚缸內的金魚... 嗚嗚...
![]()
三位師傅, 很勤力地表演... 搓麵粉..
![]()
店鋪比想像中大, 座位寬闊, 坐得舒服, 平日夜晚, 坐滿九成客. 報紙曾報導有關樂天兩店的投資, 銅鑼灣店的裝修所用的支出, 比旺角店多了一倍有多, 分別是1200萬元及500 萬元, 就算有水份, 睇怕也只是打個八折, 也算驚人.
![]()
特色皇朝小籠包 ($98), 八種顏色, 代表八種味道, 中間白色原味, 跟著逆時針開始, 綠色人參, 啡黃色鵝肝, 黑色松露, 黃色芝士, 橙色蟹粉, 灰色蒜香, 淡紅麻辣.
![]()
黃色芝士, 芝士味不重, 應該是類似 mozzarella 品種, 拉絲質感大於味道, 未有蓋過了小籠包內豬肉的原始味道, 吃時, 千萬不要蘸醋, 因芝士味道已經輕身, 再用鎮江醋, 會完全蓋過芝士味.
![]()
可能因為顏色黑漆漆, 還有些反光, 竟然揀淨無人要...! 嘩... 黑松露喎...! 特色小籠包, 要嘗得真風味, 不宜用薑絲和醋, 也不需要跟那張"吃小籠包方法"學習紙, 個人習慣, 整隻小籠包放入口, 不蘸醬汁, 最能夠吃得到箇中風味, 餡料與皮, 經過黑松露油浸制, 香氣十足.
![]()
薑絲鎮江醋終於可以出場..., 用力大咗..., 夾爆了摺口, 湯汁漏了出來, 這款是麻辣口味, 幸好有匙更盛著, 都是一啖整隻入口, 為適應大眾化和家庭消費者口味, 小朋友都啱食, 麻味輕, 辣度低, 帶花椒的香, 輕度的麻辣味.
![]()
避風塘炒蟹味道小龍包 ($148), 餐廳早前舉辦了一個名為小籠包新口味的活動, 邀請消費者提議一款具香港特色的小籠包, 結果選出了避風塘炒蟹口味, 嗱... 創意呢家嘢, 我自問...真係識條鐵! 實在想像唔到, 到底...避風塘炒蟹的小籠包是甚麼味道??
![]()
由消費者提議, 最新研發的新口味, 外皮淺橙暗紅雙色, 先不加醋式薑絲, 全隻一啖入口, 因相機先食原則, 入口時已經不太熱, 咬開後, 湯汁湧出, 有蒜香和辣椒味, 辣度中等, 比起剛才的麻辣款式, 要強烈一點, 口中咀嚼, 豬肉中混有蟹肉, 果然是...收得貴些少, 是有原因.
![]()
再試多一隻, 加了薑絲, 蘸了醋, 中和了辣味, 不及之前的辣度, 我還是喜歡不加調味汁, 更能吃出避風塘炒蟹的味道. 免費報內有一專欄"米豬蓮", 應該係米之蓮個家姐啩..., 有跨張評價: "像在吃避風塘炒蟹，米珠蓮的口腔和嘴唇已有點發麻，卻有種欲罷不能的感覺，確是奇妙。"... 睇完... 笑咗好耐.... 哈哈哈
![]()
心太軟 - 糯米紅棗 ($48), 與西餐的心太軟剛相反, 中式心太軟屬於涼菜, 不屬於古舊傳統菜, 只出現了十多年, 由上海廚師發明(有興趣可以在網上找), 同檯友人討論這道小食, 家人試做, 但不太成功, 可能是因為次序問題, 在釀入糯米之前, 不應該先煮紅棗, 如果紅棗太硬, 應該只用水浸耐些少, 還有一點重要, 紅棗是滋養補血, 但紅棗核是另一回事, 棗核燥火.
![]()
去核紅棗, 包裹糯米團, 蒸熟後放涼, 有些店做這道菜, 會用油輕輕煎過, 可以增加紅棗香氣, 而且色澤會更彩, 糯米也會呈半透明, 但不合健康要求, 只蒸不炸是最好做法, 入口, 少少甜, 口感糯糯, 柔軟綿密, 糯米做得好, 還會牽絲.
![]()
白灼秋葵 ($55), 秋葵這名稱真夠雅致, 好過羊角豆的名字, 外文有幾個叫法, Bhindi(應該係印度文), 又或Okra(日文), 最好的當然是Lady Finger(英文), 夠意境..., 秋葵的好處, 真是多到講唔完, 高纖維, 有利腸胃減少吸收糖份, 控制血脂血糖, 有降膽固醇等等...,
![]()
當然, 好嘢都要煮法配合, 如果油煎大炸, 肯定不及白灼那麼有益, 但白灼食物有弱點, 口感不及煎炸的香口美味, 最好用調味補助不足, 輕度淡身醬油, 加些薑絲, 是最佳配搭.
![]()
麻醬拌手捲油麥菜 ($52), 又是一款甚有創意的健康食品, 用青瓜薄片包裹油麥菜, 油麥菜脆綠, 灼得剛好, 師傅有心思, 菜葉把菜逛包在中心, 入口爽脆有菜香, 加上麻醬醬汁, 少少酸, 非常微微的甜, 味道好似日本的芝麻沙律醬, 清新兼開胃.
![]()
有機鮮筍炒煙肉 ($78), 算是有名的湖南菜, 此煙肉不同彼煙肉, 其所指, 是臘肉, 鮮筍也是湖南有名食材, 鮮筍之清淡, 與臘肉之油膩, 平衡得恰到好處.
![]()
外婆紅燒肉 ($88), 也算是上海本幫菜吧.., 到底紅燒肉, 是外婆做得好? 還是嫲嫲做得好? 阿媽做得唔好咩?? 其他親朋好友呢?? 我真係毫無頭緒....
![]()
五花腩切成方塊, 用老抽生抽及黃糖, 燜至入色入味. 五花腩未至於是肥瘦清晰相間, 但入口仍然香甜鬆軟, 配上醬汁, 濃稠但不油膩.
![]()
竹筒剁椒魚片 ($108), 大量剁碎的辣椒、酸菜和乾椒, 與魚片放入竹筒一起蒸, 剁椒醒胃, 魚片滑溜, 入口鹹鮮, 輕輕辣度, 十分惹味, 但如果唔覺意吃下幾粒碎辣椒的話, 則絕對會額頭冒汗.
![]()
麻婆豆腐烤桂魚 ($238), 之前在銅鑼灣店已經食過, 水準好, 今晚再食, 桂花魚骨少, 肉質特別細嫩, 市面的烤魚店, 大多提供兩款魚類, 平價用鯇魚, 高價一定是桂花魚, 最平都要二三百. 上檯時, 麻婆豆腐的味道已經散發出來, 賣相比一般麻婆豆腐要深色一點, 醬汁做得比較杰, 不是水汪汪款式, 但辣度不高, 豆腐皮帶些少煙韌, 與桂花魚的嫩滑, 配合得宜.
![]()
侍應幫忙拆肉拆骨, 桂花魚又名淡水石斑, 外皮炸過, 略帶點韌度, 魚肉則嫩滑味鮮, 撈一點醬汁, 入口, 初時微辣, 慢慢食出了一陣麻香, 十分惹味.
![]()
喇沙海鮮拉麵 ($78), 新加坡式喇沙, 椰味較重, 辣度不高, 聽聞蔡san 話, 食喇沙, 要有螄蚶..., 好似係... 除非唔係囉..., 這碗沒有螄蚶, 我又唔係蔡san, 無所謂啦... 哈哈哈... 喇沙湯煮得濃郁, 椰奶味香, 有蝦味, 有無大地魚味?? sorry... 我程度低, 食唔出...
![]()
宮廷驢打滾 ($35), 據聞是慈禧太后最喜歡的宮廷點心, "驢打滾"的名字夠晒怪異, 網上搜一搜, 名稱的其中一個由來是 ... 話說"古代一位將領為解決有厭食症的士兵而發明... ", 一聽, 古代厭食症..?????? 吹水都唔好咁離譜吖....哈哈哈哈...
![]()
另一講法, 是起源於承德, 盛行於北京, 名稱由來, 皆因需要滾一層黃豆粉, 似是驢子在黃土打滾, 糯米釀入豆沙, 捲成後再滾上黃豆粉, 外表呈淡金黃色, 豆香餡甜, 入口綿軟, 香甜可口.
![]()
下午茶時段, 五折優惠, 啱晒蛇王同仁, 到時見!
![]()
![]()
![]()
![]()
![]()
![]()
![]()
![]()
![]()
![]()
================================
感謝oasiswong提供以上資料
oasiswong的網誌: http://www.openrice.com/zh/gourmet/reviews.htm?userid=85184&city=hongkong
================================
