8 開心寫意, 氣氛一流...

試食活動

蘭桂坊..., 真是十年如一日, 由中環地鐵, 沿德己立街行上來, 成街都係人, 嚟Happy Hour飲酒, 有室內冷氣唔涼, 係要企出街... 應該是常識... 哈哈... 但一到頂, 轉彎, 當堂靜晒..., 夏季未到中期, 晚上七時的天空, 還是光亮得奇異...

街外光線透入內, 未到繁忙時段, 座位任坐..., 返工放工時間, 由以前的朝九晚五, 變成朝九晚八, 你是香港人, 無理由唔知... 放工後, 約埋同事出嚟吹水, 千企唔好再講公事..., 唔講公事, 講私事..., 最好當然就係講公司和老闆既八卦事... 哈哈..

天氣熱, 消消暑, 最好係一杯大啤, 但下午茶已經飲咗..., 無錯! 係"下午啤", 唔係"下午茶"..., 既然飲咗"下午啤", 就來一杯Cocktail吧. 餐廳推介, 其中一款, 名稱又真夠異類, 名稱: "NOTHING...

敝孤陋寡聞, 對於此Cocktail 品種 "NOTHING"的認識, 真係只有nothing... 但跟據餐牌介紹, 材料有Vodka, Melon Liqueur, Coconut rum & Pineapple Juice..., 應該似係 MIDORI SPLICE... 飲第一口, 好強的菠蘿香味, 蜜瓜味...很輕, 甜飲的酒精度, 嘗不到太高, 整體上, 好清新涼爽的感覺...

成日食 Buffalo Wings, 有些厭?? 轉轉新口味, 試一試 Rockin' Wings ($138), 中文翻譯是"搖滾雞翼", 有些攪笑..., 餐牌上有說明, ".... smoked dry rub, slow roasted...", "dry rub"也有些稱呼為"spice rub", 即是用乾的香料醃漬(必須加入糖份), 燒烤時, 糖份會焦糖化, 形成一層脆身的香料薄皮緊包雞翼, slow roasted.... 應該係...近年紅人 "slow cook"既兄弟... 哈哈..

如果一邊聽著rock n roll, 一邊食"搖滾雞翼", 可能更有風味, 至於聽邊種rock n roll? 則...是個人口味, 視乎你想"搖"得有幾勁? 又或滾得幾有勁?  rock n roll 有咁多種..., range 太闊, 如果想"搖"得勁D, "Guns N' Roses" 是好提議, 如果想"搖"得輕力一點, 那"Foreigner"啦..., "搖滾雞翼"配上Blue Cheese Sauce, 味道與口感都比較強烈, 加多一條新鮮生西芹, 就可達至口味上的equilibrium了... 55...

一講"Foreigner", "Foreigner"就到... 此店全年無休, 晚晚都有Live Band 坐陣, 聽講話係"入口"Live Band呀, 來佬貨, 啱晒香港人, 唱緊代表作: "I Want To Know What Love Is".. "....In my life there's been heartache and pain, I don't know if I can face it again, Can't stop now, I've traveled so far, to change this lonely life..." 好正..!

American rock 'n' roll 之後, 一轉, 來一個義大利傳統, Balsamic Tomato Bruschetta ($138), 香脆烤法包, 材料是切碎的番茄粒, 新鮮 basil 和 basil oil, 廚師用 Parmesan 代替常用的 Mozzarella, 味道濃郁一點.

香蒜牛柳粒 ($138), 噯...! 西洋餐廳做埋中式酒樓小菜, 但做得好過很多中式酒家, 味道比較清淡, 但不是海綿牛肉, 沒有中式牛肉那種被蘇打粉折磨得體無完膚的海綿狀, 絕對是貨真價實的原始牛肉質感, 好味有咬口, 夾著連炸蒜皮一起吃, 好滿意!

據聞五月尾有兩大節日, 分別是"國際漢堡日"和"國際奶昔日", 未有時間研究到底是何方神聖..., 但我認為, 諗呢兩個節日出嚟個位人兄, 都算無得頂! ..好應該比翻一日去記念佢囉...哈哈, Hard Rock Cafe 都因應國際漢堡日, 攪了新campaign: World Burger Tour 2016, 推出了一系列國際口味漢堡包.

新加坡款式的 Satay Burger ($178), 新鮮牛肉以沙嗲風味製成, 脆口感的碎花生粒, 爽口的新鮮青瓜和火箭菜, 還加了士拉差沙律醬... 士拉差辣椒醬就食得多, 但士拉差沙律醬有甚麼特別?? 我未試過... 單看見牛肉漢堡的厚度, 就已經想一口咬落去...

每款漢堡包都跟碟送上新鮮炸起的薯條, 薯條都有三種口味, 這款是Chili Seasoned Fries wiht Chipotle Garlic Ketchup, 一聽見...用墨西哥辣椒做的醬汁, 當堂肅然起敬, 原來會錯意, 唔係每隻墨西哥辣椒都係"Red Savina", 還有一些平凡的口味, 例如"Chipotle", Chipotle 的辣度, 如果以國際辣度級別, 史高維爾辣度單位, 只是1500SHU, 與勁量級Red Savina的580000SHU, 無得比, Chipotle 還低過一般街市的尖紅椒, 而且, 還加了蒜蓉和番茄醬, 用來蘸那剛炸起熱辣辣的薯條, 正是酸、辣、甜三味合一.

另一款Burger, 上檯, 我掛住食, 無留意包名, 事後看餐牌, 搵呀搵, 搵唔到... 靠估, 應該係 Miami Florida Cuban Burger ($178), Miami..., Cuban...., 應該用"Little Havana"更好吧...., 再搵, 又好似係 New York Big Little Italy Burger ($178), 是旦啦... 訂價一樣, 差唔多...

Burger 好豐富, 除了那塊厚身漢堡牛肉之外, 還有類似炸魚手指但其實係炸芝士條, 好creamy, 但味道略淡, 應該屬於Mozzarella類品種, 重未夠, 再加多幾片鬼佬煙臘腸, 到底是Salami or pepperoni ?? I 唔太肯定, 餐牌個名, 又Italy, 又new york, 如果義大利, 就係salami, 但如果係美國, 就係pepperoni 喇... 哈哈...

嘩... 呢款薯條是 Herb & Garlic Fries with Chimichurri Mayo,  超正! Argentina 的 Chimichurri, 都是翻譯為"青醬", 但絕非義大利的 pesto..., pesto唔夠專業?? 那..salsa verde?? 都唔係... Chimichurri 是青綠色, 材料都是用香草, 但加了其他香料, 尤其是辣味的香料, 還有堅果, 撈在薯條上, 少少鹹, 多多香, 微微辣, 是近年食過最好味的薯條醬汁...

Hark Rock Cafe是餐廳, 也是rock n roll 展覽館, 飲咗酒, 食得半飽, 搖吓搖吓去打個轉, 周圍看看, 發現了George Michael 對太陽眼鏡..., 90後應該唔知 George Michael 係邊個..., 但嚟得呢度用餐, 不可能唔知吧..., 就算你唔知邊個係George Michael? 都應該聽過Wham啩? 吓... 就算你無聽過Wham..., 都無理由未曾聽過"Last Christmas" 吓??? 都無??? 係鄉下耕開田...無留意?... 咁careless whisper 呢..? 梅姐都唱過中文版喎...

還有"賣飛佛"的Queen, Freddie Mercury 死咗, 都重有得開 concert, 今年9月係香港有得睇! 已經賣緊飛, 主音瓜咗, 都開得咩...?? 梗得!! 唔通開"問米演唱會"??? 哈哈....., 搵咗個後生靚仔 Adam Lambert, 有興趣同仁, 可以上網聽一聽先決定買唔買飛, 我本來打算買飛, 但聽過後.... 哈哈哈

巨型瓷碟盛載著巨型牛扒, 稱為 Porterhouse Steak ($528), Porterhouse, T-Bone, New York strip, 三種都是由牛腰前端 Short Loin 切出來, New York strip 無骨, Porterhouse 和 T-Bone 都有直橫T骨, 兩者一前一後, Porterhouse Steak 通常是兩人的份量, 美國農業部 USDA, 對市場上使用 Porterhouse Steak名稱, 都有提供"無法律規定"的指導, T-Bone 的厚度, 最少要達0.25", 但porterhouse 必須達1.25", 當然, 如無法律規定, 商家們真係採你都傻...

20安士的澳洲貨, 兩位男士剛剛好, 如果女士, 三位都夠食, Porterhouse 其實就是最好的T-Bone, 與T-Bone 的性質相同, 骨為中間, 左右分別是西冷和牛柳, Porterhouse的牛柳部份較大, 西冷部份較少, 無論如何, 可以一次過食晒兩款, 西冷部位, 肉質的纖維粗一點, 但牛味口感重, 牛柳部份則味道較淡, 但夠晒鬆軟, 正是兩者兼得.

美國人食牛扒, 喜歡用A1 Sauce, 這款專為牛扒而製的調味汁, 已經有百幾年歷史, 現時為Kraft 公司製造, 但原來最初是英國人發明...., 但無所謂吧..., 美國人原本都是英國人... oh, sorry... 美國人應該唔會有"大英國膠"吧...??

最後... 飽到郁唔到, 重有甜品... Hot Fudge Brownie ($98), 布朗尼朱古力蛋糕, 面頭放了熱半溶的朱古力和雲呢拿雪糕,  味道十分重口和濃郁..., 整翻杯熱茶就最good喇!!

飲咗酒, 紅都面晒, 睇嘢都唔係好清楚, 但都重行到直線..., 搭車翻屋企... 絕對無問題! 晚上九時半左右, 坐滿人, 好熱鬧, 氣氛一流, 得閒與同事朋友嚟飲飲食食兼吹水, 真係人生樂事!

================================

感謝oasiswong提供以上資料

oasiswong的網誌: http://www.openrice.com/zh/gourmet/reviews.htm?userid=85184&city=hongkong

================================