7 熟悉粗菜＊非平淡也

今日有得早放工，就打算同同事係炮台山附近食個晚飯。原來呢度有間粗菜館，豬油撈飯就聽得多喇，我哋都好想試下，放工執埋啲手尾就即刻落去！餐廳好近大馬路，如果係銅鑼灣嗰邊，搭叮叮過嚟都好快到。

大約七點到餐廳，先有個玄關位，有金庸先生嘅提字，牆上掛上蓮花油畫，地下一層都用方枱，方便2-10位都可以組合，上層有幾張大圓枱聚會就啱啦！燈光集中係枱上面，影食物相好容易呃到 like！









時日老火湯 $98 /一窩
今晚係番茄薯仔湯，湯水色澤濃郁，有豬骨、番茄、薯仔可見材料豐富，味道都被時間同爐火提煉出嚟，見過一本講湯水嘅食譜，不同節氣需要飲不同湯水，最為人熟悉嘅都可以話係番茄薯仔湯，我哋三個人，每人都有三四碗，叫一窩就夠喉！

惠州梅菜扣肉 $82
睇睇餐牌，最吸引我嘅仲有惠州梅菜扣肉，平時嘅梅菜扣肉都係晚餐首選，因為係屋企好難整，要去豬肉上嘅毛、岀水入味、炸完再炆、加入梅菜再蒸，步驟繁複，餐廳仲會將佢哋隔一晚，梅菜及醬汁就更入味，用煲仔送上，豬肉上一層肥一層瘦，經長時間烹調，呈現深啡醬油顏色，肉質容易化開，脂肪唔會油膩，肥瘦均勻，夾起一件，約一寸厚薄適中，一口就化，用嚟送飯一流。



豬油撈飯 $20
我嘅目標豬油撈飯，聽就聽得多，聽聞九龍城店之前係將凝結嘅豬油，放係枱面任由食客加入白飯中，帶有懷舊風味，餐廳就選用中國秀珍米，米質水份比較少，口感嚼勁，豬油及甜豉油就另上，份量足夠一碗飯，膽固醇萬歲，哈哈。







菜甫涼瓜煎蛋 $62
煎蛋係我晚餐最好朋友，菜甫涼瓜煎蛋更係不二之選，菜甫帶咸味，涼瓜亦淡然苦味，配合上感覺爽口，蛋漿剛熟透，煎蛋柔軟，帶有金黃色，蛋餅分成四份，一人一片直接夾起食，愈食愈滋味！





蘭 - 西檸脆脆雞 $88
即炸雞扒，切件後肉汁慢慢滲出，新鮮燙口，炸皮唔會太厚，而且乾爽唔油膩，醬汁分開用碗上，送上時保持一定溫度，配搭醬汁悉隨尊便，可以夾起一件炸雞將它浸進誘人的醬汁中，酸香味經已令人垂涎。







平均消費$135/位，3位，1個湯 + 3個餸 + 2碗飯(包括加一服務費)
以呢個價錢，都食到幾飽，三餸一湯，仲有兩豬油撈飯，份量足夠

粗菜館 Tso Choi Restaurant
星期一至日: 11:30-23:00
截單時間: 22:30
北角炮台山英皇道125-133號月明樓地下
Tel: 3579 4755
分店：九龍城

================================

感謝mohkc提供以上資料

mohkc的網誌: http://www.openrice.com/zh/gourmet/reviews.htm?userid=717759&city=hongkong

================================