8 忘返那些年 * 流連在樓上咖啡店

假日做完瑜珈，懶洋洋咁去到旺角同親愛的食個下午茶，特登嚟到屋喔餐廳，因為睇到Instagram上朋友post過餐廳嘅肉燥飯，用鐵鍋上，好吸引相機食先嘅我。

大約兩點到餐廳，位置就係朗豪坊商場隔離。餐廳位於4樓，有一排大玻璃窗非常開揚，難得可以喺旺角感受到陽光。另一面牆身有綠葉植物襯托，感覺自然，餐廳仲有一個搭起嘅室內空間，用咗好多木同燈光裝飾，悠閑寫意。門口位置仲見到有餐廳所有員工嘅相，特別warm有一家人嘅感覺。





餐廳午餐及下午茶時段，大約有7款套餐價錢約$48-58，有飯麵沙律，仲有兩款唔同特色飲品選擇，各款小食$40起，飲品$28起有30多款俾你揀！係旺角年輕男女特別多，諗返以前中學，放學後會同同學行到旺角，去一啲樓上cafe坐下，溫下書傾下偈，都係一個幾重要嘅聯誼活動嚟嫁。

近期特別鐘意用雲石餐枱影相，白色枱同食物，會形成顏色上嘅對比，令食物更突出，背景仲有陽光，影相就更方便！





台式肉燥飯配豬軟骨 $48
今日係為咗肉燥飯而嚟，造型可愛會令人留下深刻印象，由上面睇落已經見到配料豐富，有半隻糖心滷水蛋，非常入味，每件豬軟骨一層一層清楚可以見到豬肉脂肪軟骨，入口鬆化，脂肪一啲都唔膩，醬油味滲入，軟骨處理得好，全部都可以食晒，肉燥粒有好香月桂葉嘅味道，飯粒水份多較腍，再配合一些爽咸雪菜增加口感。

仲記得旺角有幾楝大廈有好多間樓上cafe，放學大約4點就到旺角，呢段時間就最好去餐廳流連，食客少又有下午茶價格優惠，坐耐啲都唔怕，除咗會每人嗌一杯飲品，都會嗌啲小食share，對我哋中學生嚟講都算係奢侈活動。













蜜味台式香腸 $40，檸檬愛玉 $32
認識台灣香腸比起台灣其他小食早，因為香港小食店好早就引入各式台灣香腸，係加熱廚具上不停轉轉轉，令香腸全面煎至金黃色，咬落脆口後肉汁一定會流出，如果唔小心肉汁就會滴落衣服上面。

餐廳嘅蜜味台式香腸，切好一片片，用蒜頭青蔥蜜汁炒香，香腸咸香帶焦燶、蒜片惹味、蔥粒爽口，炸過後味道更豐富。檸檬愛玉亦係台灣夜市又一特色飲品，檸檬汁加愛玉，顏色係淺黃色嘅好似啫喱，酸酸甜甜唔錯。





店員反應好純熟，我哋嗌完甜品，就送上新餐具同碟。

屋喔窩夫$68
超厚、超脆、超有蛋香 (超飽嘿嘿)
睇到menu上嘅相見窩夫幾得意就嗌一個，窩夫造型成個啤酒杯咁，仲有餐廳名，真係度身訂造架，碟上面仲有蜜糖、忌廉、雪糕、士多啤梨，仲有突如其來嘅嘉賓－甜甜圈。

好期待窩夫到底有幾厚！仲可以試下拎起個杯耳，真係同啤酒杯差唔多，先淋啲蜜糖，流落一格格嘅表面，真係忍唔住要食啦！先切成八件，每刀切落外層質地鬆脆，厚度唔會令你失望，而且蛋香非常，忌廉同雪糕亦更加濕潤感，食起嚟窩夫就唔會咁乾，另外甜甜圈甜度好高，飽肚得食唔落啦！份量都足夠三四人食！













都唔知點解，溫書都鐘意約埋幾個同學一齊，仲要去cafe，好似有其他人留意住，會溫得投入啲，係屋企係唔會有呢種動力，可能只係見下同學仔嘅藉口。到會考完結，大家都放假，唔洗咁早返屋企，都會約cafe，俗語有話三個女人一個墟，如果六個女人又會點樣？就係一坐就坐到凌晨一兩點，有傾唔完嘅話題，畢業後嘅去向，返暑期工嘅經歷，大家都會一齊分享，通宵巴士都係嗰時學識點搭，嘿嘿。



蜂蜜桂圓紅棗玫瑰 $36
最後點多杯熱飲消消滯，蜂蜜潤滑、桂圓明目、紅棗補血係女生嘅好朋友，每次有玫瑰加入飲品，都比我夢幻嘅感覺，見到玫瑰花係杯裏面盛開，好似個盆景，味道唔做作，用嚟配甜品就啱啱好。



之後同一個禮拜再同朋友嚟食下午茶，平日三四點，餐廳人流比較少，係一個傾偈好地方！
你中學時期去嘅樓上cafe又係邊間？
平均消費$128/位，兩位用，1個午餐 + 1個小食 + 3杯飲品 + 1個甜品 （包括加一）

屋喔 O'Casa
星期日至四: 11:30-01:00 星期五，六及公眾假期前：11:30-02:00
旺角砵蘭街215號朗晴坊4樓
電話：2321 5131
分店：中環

================================

感謝mohkc提供以上資料

mohkc的網誌: http://www.openrice.com/zh/gourmet/reviews.htm?userid=717759&city=hongkong

================================