Warren：好到貼地

都好耐無嚟大坑依一區食飯，既然喺同識食嘅老友相聚，自然要揀啲好嘢食吓。偶然從雜誌睇到依一間新店，甚麼貼地歐陸菜，而且，據文中介紹，用料、煮法都頗講究，又有半島酒店主廚做顧問，真喺幾吸引吓，但貼唔貼地試過先知。


睇地址話晌大坑華倫街，晌條街來來回回兩次，只見間日本餐廳，原來間店嘅鋪面正式喺開晌隔一條街嘅重士街。

睇門面仲以為間鋪好大，入到去原來喺屬於小店格局，偌大嘅開放式廚房，用餐區呈長L形，感覺其實有點窄，還好喺氣氛頗有情調，非常適合情侶或三幾個老友聚一聚嘅用餐地方。



有散點，但睇過套餐最划算，晚市套餐分三道菜（$330）或四道菜（$380）之選，另收加一服務費，前者嘅組合喺頭盤、餐湯或甜品、主菜，而後者則4樣包晒，每一樣都有兩至三款選擇，並包簡單餐飲。



麵包籃 落單後，侍應送上麵包籃，唔算有咩特別，只喺原味及竹炭法包，不過，特色反而喺啲牛油，入口幽香得緊要，因為喺黑松露牛油。



香煎法國鵝肝配芒果甜酸醬 +$20 頭盤中，如揀法國鵝肝需另加$20。採用法國鵝肝，出嚟嘅效果自然有保證，而啲鵝肝煎得夠火喉，外脆內嫩，充滿油香而不膩，皆因配以芒果甜酸醬，酸味既可中和油膩感，甜味可襯起油香。唔怕膽固醇嘅朋友，值得投佢一票。





香煎吞拿魚及吞拿魚他他配柚子汁 3款頭盤，睇落依款好似當中相對無咁吸引嘅一款，因為都只喺啲吞拿魚，但無論賣相及味道，都帶嚟驚喜。賣相色彩搶眼，造型夠立體；吞拿魚只喺輕輕煎香外層，所以，中間位入口仍保持刺身嘅感覺，鮮甜細嫩，而中間嘅吞拿魚他他切得細碎，搭上牛油果蓉，配柚子汁，攪勻塗上超脆口嘅法包，超好食，加多件鮮甜橙肉，感覺更清新。







北海道帶子刺身沙律配柑橘汁 望落去油潤光澤，雖然只喺以北海道帶子薄切做成刺身，但加入少少橙肉、松子仁、車厘茄及沙律菜，賣相好有夏天嘅色彩。帶子鮮甜爽口，柑橘汁酸爽清新，兩者拍埋一齊，令人食完真喺更開胃。



餐湯方面，共有兩款選擇，分別喺法國南青口忌廉湯及法式洋蔥湯，睇雜誌重點介紹個法式洋蔥湯，心水自喺佢。



法國藍青口忌廉湯 朋友嘅忌廉湯一送到嚟，心諗使唔使咁大碗，朋友打趣咁講飲完個湯都夠飽肚呀！少試一啖，質感黏身幼滑，啲法國藍青口有少少鮮甜味，最緊要口感唔會好似擦紙膠咁，依家咬落軟軟腍。



法式洋蔥湯 小弟所揀嘅洋蔥湯賣相都好對辦，面層放滿法包同刨咗唔少碎芝士，先嚟一陣陣芝士香。先試件法包，吸滿洋蔥湯，食落滲出洋蔥嘅清甜味，再飲啖湯，可以用味道細緻嚟描述，洋蔥味好濃郁，佢嗰份甜味充分散發出嚟，卻又唔會有種濁嘅感覺。



主菜喺三揀一，店員話通常會喺一款紅肉，一款白肉及一款海鮮類，當然，都視乎節令睇睇有咩時令食材以作配合。順帶一帶，服務都好稱心，上菜嘅時間啱啱好，唔太耐又唔太急，而且，各環菜式都同步上菜，有會幫客人換碟，故服務一環值得俾高啲分。



慢煮西班牙豬腩仔配芥末醬 慢煮既可保持食物原汁原味，又可以保留所有肉汁，我覺得煮肉就最能發揮依一種烹調技術。西班牙豬腩仔慢煮後再煎香，金黃嘅賣相已經十分誘人，外皮脆卜卜，而半肥瘦嘅腩仔肉，油香十足卻不膩；配菜有白蘿蔔、露筍仔、甘筍仔、珍珠筍及蕃茄，件白蘿蔔清甜到不得了，食落無渣，但最欣賞喺件焗蕃茄，平時食西餐、鐵板餐都會遇到扒蕃茄，蕃茄開半煎兩煎，但依件焗蕃茄雖然細細件，但睇得出焗至收水，所以，茄味濃郁鮮活。





低溫油封三文魚柳配白酒汁 將食材油浸後再低溫慢煮，尤其魚類，又喺一種可以保留魚內嘅脂肪同蛋白質，但又保持肉質嫩滑嘅上佳煮法。件三文魚經過此方法烹煮，肉質滑溜得如BB肌膚，入口滿有三文嘅油香，沾少少白酒忌廉汁，淡淡嘅白酒香正好襯托番三文魚嘅魚味。



海陸盛宴配蘑菇汁 +$60 睇中文名就唔知佢「海陸」會指喺咩，但英文已寫明喺西冷同虎蝦。西冷睇樣大概有5安士份量，而虎蝦更有一隻成人手掌大小，所以，非常有睇頭。厚切嘅西冷要上5分熟，落刀嗰吓已經好對辦，色澤粉嫩，外層煎得帶點焦脆，肉味不俗，且口感軟腍，時間拿捏得非常好；至於隻虎蝦已經去咗殼，鎅背去埋腸，方便食用，咬落爽彈鮮甜，水準之作。不過，如想享受此美味，需額外加$60！





法式焦糖燉蛋芝士蛋糕伴雲呢嗱雪糕 原本套餐嘅甜品只喺自家製嘅雪糕，不過，新優惠，如點4道菜晚餐個甜品就自動升級，變為「法式焦糖燉蛋芝士蛋糕伴雲呢嗱雪糕」，店員話依個優惠未知做到幾時完，都喺視乎反應。不過，估唔到件芝士蛋糕有咁大件，芝士味十分濃郁，口感輕幼軟滑，面層更喺做咗一層焦糖，而雲呢嗱雪糕更伴上脆脆嘅金寶碎，自家製雪糕亦柔滑富奶香，超滿足嘅一道甜點。



手沖咖啡 餐飲喺一般咖啡或茶，本想點一杯鮮奶咖啡，但店員推介佢哋嘅手沖咖啡，小弟甚少飲齋啡，所以，都好有興趣一試。咖啡豆嚟自埃塞俄比亞嘅耶加雪夫，再自家烘焙，簡單以手沖方式，呷一口咖啡味醇厚細緻，似有啲果酸香，所以，咪落奶，更要「齋飲」。



依家講話「貼地」多數形容啲嘢喺親民，貼近實況，不過，我哋香港人有句俗語「衰到貼地」，喺指話人衰到不得了，借用一下，今餐無論頭盤、餐湯、主菜、甜品，以至服務，都表現出色，所以，俾咗個標題佢：「好到貼地」，就喺咁嘅意思！
個人評分 味道：8/10
環境：7/10
服務：8/10
抵食：7/10
平均每人消費：HK$450
餐廳資料：
Warren
大坑華倫街9號地下1號舖
2392 5121

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================