9月16日(Happy Friday)~中秋節假期..
約左小奧 & Baby笠home聚~朝早好早起左身
整豬手+收拾完屋企~同老闆出去食早餐+買餸
前一日無約實時間~等佢地瞓夠..起身先再約
原本佢地話一齊買餸~但我驚街市多人又濕漉漉
反正已經諗定買咩~我地直接入街市..買完會即走
所以叫佢地慢慢攪掂先~我地去買餸就ok~買完回程..
小奧 & Baby笠已經坐緊車黎啦~咁叫佢地到左行陣先
我要返屋企..煲落個糖水~仲有pack好盒"麻辣豬手"
先可以出門口~13:00攪掂..直接約係"金坊"泰飯堂等
小奧同Baby笠好有心~係都話要上機前同老闆食返餐
提早慶祝佢生日~真係太客氣! 午餐要佢地破費呢(Thx 33)
* * * * * * * * * *
上午買唔到魚..食完lunch一齊去街市~買完坐車返屋企
返到屋企開大張檯~大家坐住..傾下講下笑下又食下野
Baby笠又買左零食+人蔘果..仲有月餅~上次佢買黎既零食
都仲有好多未食~所以諗住去旅行..拎d去食囉(哈哈)
![]()
坐到17:00開始洗食材~準備火鍋晚餐
湯底主打用鮮椰青+椰青水~食完可以無咁燥
![]()
是日火鍋晚餐.."粟米蓮藕椰青湯底"
湯底越滾越甜~見Baby笠飲左唔少(好鐘意啊)
![]()
上次home聚..見佢地食量真係唔多
所以唔買太多食物~加上聽日旅行..食物唔留得
要盡量預少d.."象拔蚌仔(x4) & 鮑魚仔(x8)"
![]()
下午一齊去街市ma~叫Baby笠睇下..我講果個蝦佬
佢個樣好似葛民峰~連把聲都好似架(哈哈)
今次都係幫佢買料~食材好新鮮+肉厚
![]()
"鮑魚仔"..蝦佬話幫我地起肉打邊爐~會乾淨好多
佢叫蝦佬媽起肉~諗住叫佢起晒肉..留2隻殼(講左2次)
返到屋企先發現..原來蝦佬媽唔明~有2隻連殼無開(冏)
![]()
"桶蠔"..買開果隻牌子無貨~問左阿姐2次..依款肉質係咪爽?
佢話..係呀! 爽架! 點知食入口係粉蠔..好憎食粉蠔
但就好有蠔香味囉~下次無貨寧願唔買(衰)
![]()
"龍躉肉"..上午去街市一轉~龍躉靚佬話未返貨
食完lunch再去..話已經開左2條~腩位賣晒lu
無計啦..老闆好想食魚~所以買全肉
![]()
"蝦膠"
![]()
"鬼馬墨膠"..煎左就咁食/放湯都好味
![]()
"黑豚肉片"..食剩一半
回港第一晚..整個"泡菜豚肉鍋"清埋佢
![]()
老闆最緊張買"炸魚皮"~因為佢知Baby好鐘意食
![]()
"蔬菜"
![]()
買左"半個芋頭"(兩食)..火鍋料"黃金芋頭片"
![]()
飯後甜品.."芋頭西米露"
中段見小奧飲完啤酒..開始眼瞓~尾段仲係咁捽眼(哈哈)
上次未食飯老闆就叫小奧飲~攪到佢晚餐開始呆+眼瞓
話鬼老闆..叫佢唔好咁早叫小奧飲~佢自己飲會飲ma
你知啦! 你拎啤酒比人..實唔好意思推話唔飲
為左要小奧用心享受晚餐~唔准咁早比佢飲(哈哈)
![]()
依晚邊食邊傾到11:45pm~佢地差不多走lu
臨走拎埋盒"麻辣豬手"..比Baby笠返屋企慢慢食
同埋..仲有少少糖水剩~真係唔好意思要佢地拎埋
因為我地聽日仲有其他食材要清~驚清唔到糖水
送埋佢地坐的士~我地返屋企收拾下都早點休息呢
![]()
佢地送既"月餅"..拎左4個去馬爾代夫食
食左2個流心~2個遊飛機河..返香港慢慢再食
![]()
============================================
感謝 Yanomi 提供以上資料
Yanomi的網誌: http://yanomichung.blogspot.hk//
============================================
[ 今日講咩 ]
