又越過高山又越過谷
兜兜轉轉，終於嚟到我地係今晚住嘅地方啦！
咁多晚住嘅地方最貴就係今晚
因為呢間係溫泉旅館，仲要係望到富士山嘅溫泉旅館呀！
入到大堂，呢度俾我嘅感覺記係－－－我係未入咗金田一入面啲場景呀？
有啲歷史味度嘅大堂，出嚟招呼我哋係2個伯伯，
入住嘅只有3戶人⋯⋯
（Sorry，金田一迷上身，佢啲裝修真係好有金田一電視劇入面有事發生啲旅館㗎！）
小小嘅溫泉飯店，係網上嘅評語個個都讚不絕口
唔好睇佢好似唔顯眼，每一間房都可以望到富士山㗎！
旅館有份和式同西式，一場嚟到，緊係入鄉隨俗，瞓下tatami啦～
你睇下你睇下，出面就係富士山啦！
我真係覺得自己好好彩，
雖然前兩日都天陰，上緊山嘅時候仲落緊雨
但係每次最後都會俾我遇到最好嘅
所以我深信"祢的恩典每天夠我用"！
襯仲見到個山，我要出去唱富士山下！
山田屋係座落係精進湖 （五湖中雖然係最少，但係其實都唔少㗎）
有好多人特登入嚟划艇同露營
如果可以，我都想係度露營呀T0T
影山影到咁上下，係食飯前緊係最好去浸個溫泉先啦
山田屋有2個風呂，一個係地下嘅公眾湯，另一個係6樓嘅私人風呂
入住嘅每間房都可以享用私人風呂50分鐘
今日天氣好，可以望住富士山浸溫泉，真係好幸福呀！
等我介紹下今次浸嘅溫泉啦～
位於山梨縣嘅富士五湖屬於硫酸鹽溫泉，有消除疲勞，減輕痛症嘅功效
浸完溫泉，著番件浴衣
之前幾趕幾頻撲都好，突然好似變咗兩個世界咁
七點鐘, 已經係晚飯時間
餐廳只係得3圍客( 係呀, 得我哋3圍客咋, 金田一殺人事件即將開始....亂講中)
枱面已經擺好飯餸, 夠晒精緻款式多
仲可以望住富士山嚟食, 我係未去咗天堂呀
住溫泉旅館真係食得好瞓得好
食飽時間又上早,瞓番個令鐘又去公眾湯浸多次溫泉先~
就算而家係6月, 但因為海拔高,到咗夜晚都涼涼地架
公眾湯有分室內同室外,浸係室外嘅溫泉,有風吹過,但係個身就暖暖嘅
好唔捨得走呀...
未想瞓，寫下明信片
係富士山下飲住富士山汽水,再寫富士山型名信片,
我真係覺得自己好似發緊夢呀~
第二朝起身, 富士山已經消失了(哭)
佢俾啲雲完全遮晒, 就好似無出現過一樣
我真係覺得自己好好彩
富士山雖然再見唔到,但係今日旅程仲未開始呢!
住係呢個旅館嘅汨間房客又再一次係大堂一齊等車
雖然呢度係遠啲係舊啲, 但係旅館嘅人好有人情味
佢哋去晒門口送我哋車, 連最細嘅BB都一齊嚟 ( 噢, 溫泉旅館太子爺?!)
再見啦~山田屋
( 金田一mood: 最後咩事都無發生，我仲瞓得好好)
============================================
感謝 沙沙密卡的彩色世界 提供以上資料
沙沙密卡的彩色世界的網誌: http://sasamaka.pixnet.net/blog
============================================
