Moreish & Malt：麥超所值

早前嚟觀塘駿業街依一邊廠廈食飯，較相約時間早到，商場我就亦麻麻哋鍾意行，所以，揀晌附近打個轉，偶然行經鴻圖道，Moreish & Malt喺其中一家印象較深嘅餐廳，主打好多手工啤，所以，想起麵包班同學仔甚好此道，擇咗今晚同佢嚟食飯傾偈。


以前晌其他食文都講過，觀塘工廠區嘅銳變都可謂翻天覆地，晚上七點幾嚟到Moreish & Malt，已經見有唔少客人幫襯，因為有「歡樂時光」嘅引力。

餐廳裝修簡約，配合番周邊嘅環境，帶少少工業風，但襯以特色嘅燈飾，讓燈光昏暗，不失氣氛。而門面全部喺落地大玻璃，可以清晰望到外出街景，喺增加空間感嘅法門。



其實，餐廳環境本身都相當寬敞，枱與枱之間都編排得唔密，牆上掛有唔少畫作，感覺予人頗悠閒。但最欣賞喺佢哋嘅貼心，特設小籃讓客人放低手袋或背包。

店名嘅「Malt」指麥，就喺釀啤酒嘅主材料之一，所以，店中提供嘅手工啤酒多達17款，此外，仲有紅白餐酒、烈酒、葡萄汽酒、威士忌、雞尾酒、冰涼特飲……等等。點知，老友有輕微抱恙，唔飲得啤酒，只好等佢自己留待下次再試。







散點餐牌，食物分為頭盤、沙律、漢堡、意大利粉、烤肉及配菜。



但睇勻兼跟散叫對比一下，佢哋嘅「二人套餐」真喺抵到暈，$398 + 10%，已包頭盤（是餐湯x2 +什菜沙律1客）、主菜（2揀1）、意粉（2揀1）及兩杯餐飲（咖啡、茶、汽水），單喺份美國肉眼扒散叫就要$248啦，所以，個套餐真喺物超所值。



意大利香草包 餐前麵包喺小弟嘅至愛之一「意大利香草包」（Focaccia），麵包軟熟，帶微微香草香，最有心思喺加入乾番茄，沾點上橄欖油醋，簡單清新。



南瓜忌廉湯 估唔到餐湯頗大碗，攪一攪質感好對辦，入口幼滑，南瓜味好突出，清甜細膩。



田園沙律 喺簡單嘅沙律菜配基本嘅油醋，當然稱唔上好有特色，但由於啲沙律菜新鮮爽脆，所以，已算喺清新好食。



美國肉眼扒配炸薯條 +$30 佢味上菜嘅時間幾好，食完個沙律，等一陣就上份肉眼扒，兩款主菜中，選肉眼喺需另補$30，但睇見咁大件扒，足10安士，感覺都抵番啦。

雖然只喺伴有炸薯條，無乜加咩配菜，賣相「原始」，好美式格調，但件肉眼真喺燒得好靚仔，一格格嘅炭燒坑紋。要5分熟，切開色澤帶點嫣紅，卻唔會有血水滲出，燒得恰到好處，其實，落刀嗰吓嘢已知不俗。食落啲眼肉保持嫩口、軟腍，肉味濃郁，又有炭燒嘅焦香，實在誘人好食。





煙燻肉意粉、泡菜忌廉蛋黃汁 意大利麵有兩款，一款喺香濃蕃茄肉醬蜆殼粉，感覺較為大路，不然喺想試另一款煙燻肉意粉伴泡菜忌廉蛋黃汁，單喺想想已經覺得好有創意。

雖然材料寫明喺意大利風乾火腿，但並非刨成一片片嗰種，而喺切成粒粒，有啲似我哋嘅金華火腿粒，咬口且甚具煙燻香。而個汁以卡邦尼為基礎，以洋蔥、蛋黃、巴馬臣芝士、濃忌廉汁去做，不過多加入韓國泡菜，但其實食唔到好重嘅泡菜味，只喺嗒落有啲泡菜嘅酸味，所以，感覺唔會太怪。意粉做到咬口，汁個質感又幾好，掛滿汁卻唔會太杰身。

一來食完晒所有嘢真喺幾飽，二來睇過啲甜品算不上好特別，所以，今次就無以甜點作結。



鮮奶咖啡 +$15 不過，以一杯細滑香醇嘅咖啡亦喺唔錯嘅結尾。套餐只包普通啡茶汽水，所以，寧願加多少少錢嘆杯鮮奶咖啡，兩杯咖啡都拉出唔同嘅花紋，拉得細緻，而沖泡嘅手勢亦唔差，奶泡跟濃縮咖啡撞得口感均勻。

飽餐一頓，繼續講講近況，友人就快出發去沖繩，預祝佢哋一切行程順利，有個愉快嘅假期。
個人評分
味道：8/10
環境：8/10
服務：8/10
抵食：8/10
平均每人消費：HK$250
餐廳資料：
Moreish & Malt
觀塘鴻圖道48號地下B號舖
3580 7133

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================