既然搵唔到可以俾曉跑步步嘅地方，而間神社又唔係我哋預期咁樣，於是我哋決定早少少過去政壽司搵位了，唔知會唔會好多人嘛，可能要等一個鐘或以上呢﹗我哋由神社返出去熱鬧嘅街道時，經過咗住宅區，山坡上都有好多靚靚屋呢，係香港好難有得住house嘅我哋羨慕唔到啦～係小樽，政壽司有兩間分店，我哋日間經過運河附近嘅色內分店，同埋我哋今晚去食嘅壽司屋通總店～
去到登記時格局同食蟹宴差唔多，講低名之後同你講要等一個鐘，今次個等候室仲靚過上次食蟹嗰度好多，座位更多又舒服，仲有洗手間係旁邊添﹗我哋見曉曉行嚟行去又唔會悶或者唔耐煩，所以今次都冇同佢出去行街了，附近等位有一家三口日本人，個小男孩大個曉曉一歲左右吧，佢又想同曉曉玩又怕醜，我逗佢佢又咭咭笑，曉曉有個小哥哥係度又冇咁悶吧，後來日本家庭仲有其他客人入座了，得番我哋三個，後來又有韓國人大家庭，個唔知嫲嫲定婆婆見到曉曉問佢幾多歲，我膽粗粗用韓文答咗佢，但唔記得用敬語丫﹗好冇禮貌添～:p
等位時有咩好做？當然睇下餐牌之餘又陪下個女玩啦～
到我哋了到我哋了﹗我其實好想有得坐獨立房，大為冇咁擔心曉嘅儀態問題嘛，佢大聲講嘢或者食到一地都係都唔怕，但我哋被分配坐大房添～政壽司都算高級食肆嘛，曉咁大聲講嘢有時真係唔係幾好意思添～係等候房時睇餐牌都心大心細，好似一場嚟到應該食啲正啲嘅壽司，但又怕肉赤喎，所以叫咗一份貴少少一份普通少少，另外散叫少少，我哋再幫曉執兒童餐嘅手尾應該就夠了﹗
曉：我預備好啦﹗
今次嚟日本旅行已經一心諗住一定要食壽司，我個心已經盤算無限次要點啲咩俾曉曉食，總之要熟嘅啦，鰻魚？蛋？熟蝦？腐皮？點都點到啦～去到政壽司，原來唔係香港壽司店有嘅就一定有，諗諗下都係叫咗個兒童餐俾佢，但其實主要唔係食壽司囉～陣間再講﹗
壽司真係好好好好味～魚都係鮮味嘅，但最令人讚歎嘅唔係啲魚生，而係整個壽司嘅口感，放入口時好充實嘅感覺，美味填充整個口腔，可能因為啲飯捏得啱啱好吧，真係好似漫畫入面形容，醋飯係口中散開咁，又唔會太硬，壽司雖然大粒，但一口一個食就最適合﹗印象最深刻嘅係海膽壽司，真係好似「將太的壽司」入面咁係唔整成軍艦卷嘅無紫菜海膽壽司，果然味道最純粹，充份咁食到海膽嘅鮮味﹗另外我好期待嘅係Toro了，平時係香港唔捨得食，今次呢件Toro個樣都好靚，唔，味係好鮮好肥美，但食落去筋比較多，相對於海膽就失色了～
最鮮味嘅反而係我哋另外散叫嘅白肉魚，但唔記得咗叫咗種咩魚了～
曉嘅兒童餐都好正丫﹗雖然每樣菜色都得一件，但款式多，夾埋都好澎湃﹗炸蝦又大隻卜卜脆，炸雞我睇見到想食，有個哈哈笑薯餅夠可愛，又有日本小朋友最愛嘅厚煎蛋同埋魚板，仲有甜品cake同埋巨峰提子添，主食係三文魚子飯，我哋唔俾曉食三文魚子住，但有少少汁流咗落去嘅好味道飯都令佢比平時食多咗飯丫﹗既然叫做餐，當然有小朋友包括曉曉在內最喜歡嘅果汁啦～咁大份都預咗佢食唔晒，我哋執手尾有得試埋味仲好～
好開心呀，滿意又食到笑咪咪嘅一餐，果然名店即是名店﹗究竟「將太的壽司」嘅作者寺沢大介先生有幾多取材係嚟自呢度呢？
食飽飽影番張認證照先﹗
兩父女好可愛丫～
名店嘅門面果然有排場～
我哋都仲師傅合照先～
食飽飽我哋慢慢散步出番去運河，睇埋夜景﹗
曉，俾啲笑容好唔好？算啦算啦，影下我哋睇景啦，唔駛勉強你笑笑啦～
雖然遮晒啲景，但一家三口合照總要影下嘅～:D
都係唔影人時最靚～哈～
夜晚冇咁熱，散下步都幾舒服～
睇埋夜景之後我哋都要出番去札幌啦，回程時搭慢車，停好多站，好在夜晚嘅列車有啲應酬完飲咗兩杯嘅上班族，佢哋講嘢大大聲，曉曉嘅聲浪都冇咁大問題～
係火車上仲好活躍嘅小朋友，搶住飲凍嘢～
返到酒店我哋都筋疲力盡了～
政壽司網站：
http://www.masazushi.co.jp/
前往其他日本旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 246989
全部攻略 705
全部回應 10
