食飽飽之後我哋就去行街了﹗其實係旅遊書入面小樽嘅「景點」唔係太多真係咩觀光地點，反而好多林林總總嘅手工藝店、飾品店、DIY店、各種靚靚鋪頭，絕大多數都聚集係同一條街入面，有啲旅遊書講嘅甚麼甚麼館，我哋都冇逐間搵出嚟，總之吸引到我哋嘅就入去逛啦﹗
充滿遊客嘅街道﹗唔知其實呢條街叫咩名？
DIY其實都唔係冇興趣，不過帶住曉就好難坐定定係度學嘢，差不多想俾錢學整嘅就只有音樂盒一間，未見過丫嘛，不過見唔同parts＋裝飾品價錢都幾貴，而我呢啲冇乜藝術天份又粗手粗腳嚟講，似乎都係有啲浪費，結果都係放棄了～
唔知點解日本特別多呢啲窿窿影相位﹗當爸爸揸相機，我一個窿曉一個窿實在太難manage，難以兩全其美﹗哈～
爸爸自己影幾可愛～
好怕呢啲雕像嘅曉曉，唔知點解真係唔怕麵包超人，麵包超人好似真係同小朋友有種親和力咁～
我哋購物去﹗
其中有收穫嘅好幾間鋪頭，有曉曉係度暴走照鏡嘅布藝產品店，啲小袋子好精美，布料又靚，但好似冇乜用，我就買咗好多條手巾仔，因為爹爹嘅習慣，我同係鼻敏感一族都同佢一樣習慣用手巾仔抹鼻，因為即使係Tempo都冇好質地嘅手巾仔咁柔軟、咁唔甩毛，係香港都冇乜人用手巾仔，我有好幾條舊嘅由小學用到而家都唔捨得丟掉，好幾條較新嘅都係自己或家人去旅行時買嘅，今次買到幾條質地好，design好特別，布料、繡花都好啱我心水嘅手巾仔，真係好滿意﹗
另外我哋大手筆買咗好多對筷子，生肖筷子有男裝有女裝，好精美丫～俾錢先知道原來可以免費刻名，可惜冇得刻中文啦～一人一對返媽咪度食飯時用﹗連未識揸筷子同未出世嘅逸bb都預埋啦～
冇幫襯嘅鋪頭之中，其中一間印象好深刻嘅係關於江戶時代家族嘅專門店，估唔到咁窄嘅範疇都有咁多fans，可以整咁多紀念品出嚟賣﹗都幾得意～
除咗買同睇，都有唔少食嘅鋪頭～
呢間我哋諗住買定蛋糕仔俾曉曉行住食嚟做下午茶，可能中國人遊客真係好多，每一款產品都有中文解說，哈，我哋一見到「利用大量北海道黃油⋯」呢句，即刻想打退堂鼓，肥肥肥肥肥～
結果都買咗啦，曉有quota﹗day話影定張相俾我打blog喎～
係咪因為得天獨厚嘅好天氣？點解只係鋪頭後面嘅花槽，啲花都可以長得咁靚嘅？果然係北海道﹗
呢張最搞笑嘅係，經過時day就企埋去等我影相，我問佢乜你知道係咩嚟嘅咩，佢話「影下囉」，哈，不過title係「人生xxx旅」，應該都係啲好有意義嘅東東嚟嘅～
曉曉瞓著咗下晝覺之後，我哋終於可以坐低休息下，搵咗間cafe飲下嘢咁～
要恢復一下體力呀﹗估唔到我飲到尾聲時佢就醒咗可以試咗一小啖我嘅matcha latte﹗
佢醒咗，當然要jap jap jap啦﹗
我哋又經過番嗰間買蛋糕仔嘅鋪頭，曉曉可以同呢杯好可愛嘅雪糕影張合照﹗
呀，另外我哋都經過咗郵局，雄心壯志咁買咗兩張postcard連郵票，諗住分別記俾曉曉嘅爺爺嫲嫲同埋公公婆婆，點知之後晚晚返到酒店都昏迷咗咁，返到嚟香港都未寫丫﹗哎吔吔，postcard係曉曉最喜愛嘅粟米嚟㗎～
我哋之後周圍逛又影下靚景咁～
有點西洋風格嘅建築物～
係咪咩landmark我哋就唔知道了～
呢間洋菓子店好豪氣㗎，門口出面一人派一大粒朱古力，好味，不過⋯我哋冇幫襯呢～
原本見仲有少少時間先去食晚飯，諗住搵個地方可以俾曉曉落下地，跑下步步，公園有啲遠，睇地圖見到有間神社，以為神社應該出面有啲大空地之類，但跟住地圖行只係搵到呢間超迷你神社？﹗要學曉曉「喔﹗」一下～
七個小矮人都同曉曉一齊「1-2-3-拳﹗」？係呢個trip嘅呢一日，我哋第一次同曉曉玩「1-2-3-x﹗」個x可以係「喔」，可以係「yeah」，可以係「拳」等等，乜都得，呢個時候佢仲未可以同我哋好同步咁樣出招，但到我哋搭長途巴士去富良野時，呢個game佢已經掌握得好好了，直至返來香港而家打blog嘅一個月後，依然充滿趣味，不過個x增加咗變化，呢排仲有「wow」同「笑」等新動作～
爸爸指定要影喎～呢個「爸爸寄存處」⋯heehee，辛苦了﹗呢個trip媽媽去血拼時全靠爸爸睇住曉曉﹗
差唔多時間就要去搵政壽司食晚飯了﹗唔知要等位等幾耐嘛～下一篇blog見﹗
前往其他日本旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 252951
全部攻略 705
全部回應 10
