媽媽想要守護的東西

幾年做媽媽生涯落o黎發現我經常要同各種力量 (有形的, 無形的) 角力
先可以守護到我想為小齊守護o既東西

有時都唔知咁樣堅持是對定錯,

但我為求心安都要把把關







我自己好細個已經近視, 到中學畢業時已經成 800度,

後尾仲 9百幾度近視,

係大學畢業後先自己儲錢去做激光矯視~

我深深明白要戴眼鏡o既限制,

好似游水做運動又唔方便啦,

朝頭早起身第一件事就要搵眼鏡,

影相又四眼又反光啦, 出入冷氣地方又成陣霧咁,

搵工(果時我曾經見過紀律部隊) 又過唔到eye test!


所以我都幾驚小齊要戴眼鏡,

於是(在我控制到的範圍) 我都控制佢睇書, 睇電視o既時間同距離





你知唔知阻力幾大?

佢睇緊卡通時要叫佢休息一陣慘過叫佢擔泥

叫佢熄機有時會喊, 有時會抗旨,

所以我成日都要做衰人, 講睇多5分鐘, 睇埋呢集就要熄電視...





另外就係電子產品, 小齊已經識自己拎 IPAD開YOUTUBE, 開卡通睇,

迫住我要 SET PASSWORD 及同佢講數

呢個年代真係兩難, 又唔想佢完全唔識,

但又擔心太沉迷, 呢樣我暫時都仲叫把到關,

起碼小齊會問問我先玩 IPAD, 而且我都會限佢時間


表哥成日打機, 佢又成日導小齊同佢一齊沉喎!

好似咩 Pokemon GO! 我都唔識玩,

但表哥就教左小齊玩, 仲話要去公園捉精靈呀救命!~

我自己部手機都幾豆泥而且乜GAME都無裝,

即使係咁, 有時我都覺得我自己沉迷手機,

但o係小齊面前就要忍忍手,

如果我自己玩又叫佢唔好玩好似無乜說服力~

而且我想像到個畫面係第時小齊掛住望手機都唔同我傾計我就好傷心...

呢樣我都要學習...





仲有就係飲食, 小齊食o野方面真係唔多好,

揀飲擇食又食得少,

有時朝早又話無胃口唔想食早餐,

但我都堅持佢點都要咬兩啖蛋糕麵包先比佢上校車,


仲有就係茶點方面加料同埋營養均衡d 囉

芝士, 麵包, 生果, 堅果... 儘量比多幾樣佢等佢可以在無得揀o既情況下食多d

開學以o黎小齊都重左2磅, 卒之突破40磅大關啦!!

但小齊真係食好多甜食 (我有時又心軟, 仲有最衰係我自己都想食, XD XD)

而且刷牙唔乾淨有污跡,

雖然未發現蛀牙但我覺得我要監督佢刷牙刷得好d!





做媽媽真係好多o野要把關,

希望小齊大左會明白媽媽o既苦心啦

============================================

感謝 敗家媽媽 提供以上資料

敗家媽媽的網誌: http://buyjiamama.blogspot.hk/

============================================