探險家攻略 > 30-8-2016：北海道三人行day 3(part 1)．札幌地標之時計台、大通公園、電視塔

30-8-2016：北海道三人行day 3(part 1)．札幌地標之時計台、大通公園、電視塔

由 Rita 於 2016-10-09 00:00:00 發表 | 累積瀏覽 258

分類：

呢個trip可以分俾札幌嘅時間其實真係好零碎，第一日抵埗後嘅傍晚，跟住嚟到第三日出發登別前嘅一個上晝，第四日登別經札幌去富良野中間嘅幾個中小休，同埋最尾一日臨走前嘅上晝而已，大家成日都話札幌冇乜嘢睇，其實我相信要睇就實有嘢睇嘅，不過時間有限就只能夠取捨了﹗我預咗午飯後搭JR去登別，一個幾鐘車程去到，可以啱啱check in溫泉酒店就差不多了～

呢個上午我哋都係札幌站附近活動，當然要參觀下幾個札幌地標啦，出發前食飽飽先，我哋最後一次享用三井花園酒店嘅美味自助早餐啦～

有啲一格格嘅碟嚟分開一種種食物，擺盤自然靚啲，啲餸汁又唔會撈埋啦～曉話，我都有小朋友專用碟丫﹗

札幌同大通公園只係一個地鐵站嘅距離，我哋決定經地下街行路過去，地下街沿路啱啱有啲類似farmer’s market之類嘅檔口預備緊呢，應該係啲農夫親自帶自己出產嘅各類蔬果嚟賣吧，睇落去都好靚而且都唔貴添呀～

係香港，所有日本產嘅東西大家都趨之若鶩，價格都自然大大提高，其實係北海道好多新鮮農產品都賣得好平㗎～

到大通公園之前，發現有個出口更近時計台，咁我哋去咗先了﹗原來有時計台電視塔聯票，本來冇打算入時計台參觀，既然有聯票賣，咁就順道參觀埋啦﹗

時計台嘅外型係西洋式嘅建築～

原來時計台係以前學校嘅練武場，又係集會嘅地方，而個鐘係mechanical運作，真係要上鍊㗎，而家依然係咁樣運作﹗我哋入去睇展館時有個叔叔招手叫我哋上二樓，話開始啦開始啦，有咩睇？原來啱啱到十點，個鐘要響鈴，我哋可以睇大電視直播個鐘樓嘅內部～

我哋上到去時啱啱響完鐘了，比起個鐘有幾特別，我覺得更特別嘅係有好多人圍住個電視睇直播呢，仲要坐晒係地下，而螢光幕嘅畫面就好似睇閉路電視咁，當然啦，如果識日文嘅話，聽埋導賞員嘅講解應該會好有趣嘅⋯

但我哋唔知頭唔知路，都係去影下其他展示嘅有趣古老大鐘更好﹗

既然係演武場，我哋都要1-2-3-拳先～

札幌市時計台網站：

http://sapporoshi-tokeidai.jp/

行出去見到有架馬車，而隻馬好大隻呀，莫非就係漫畫「白銀之匙」入面所講嘅北海道拖曳馬？栗子號係咪就係咁㗎啦？

時計台行一個街口就見到大通公園了，地圖嘅大通公園又大又長，我以為個feel係好似紐約嘅中央公園咁，原來個scale唔同的，大通公園應該係又幼又長，比較似城市中休憩嘅小公園，只係一個綿延得比較遠嘅公園，我哋去到嗰個位啱啱見到有幼兒園嘅小朋友跟住老師出嚟公園玩，睇落啲小朋友都唔大得過曉幾多，可能都係兩歲左右咋，老師同小朋友比例一比三，真係每一個都可以照顧到呢～

曉曉係香港都冇乜機會踩下草地玩呢～不過叫曉曉又去草地跑步步，但佢又黏到我哋實一實，只在我哋附近走兩走～

咁睇下花花啦，呢啲叫：薰－－衣－－草－－﹗曉真係係旅途中之中學得識又認得出呢～不過返到嚟香港可能唔記得了，只認得「薰衣兔」(係富良野薰衣草田買嘅紫色兔兔公仔)～

我哋經過公園時，啱啱有園丁叔叔係度建立緊一幅新嘅花圃呢～原來要先畫好圖案﹗

既然你唔落地玩，咁我哋影下相就過去電視塔啦～大通公園同我想像唔係好同，我以為一個咁大嘅公園一定會有小朋友嘅遊樂設施，但似乎可以俾佢哋玩樂嘅就係空間同草地，兒童遊樂場嗰啲就冇啦，加上天氣超級熱，我哋都係撤退啦～

大通公園中文網站：

http://www.sapporo-park.or.jp/odori/cn_h/

大通公園嘅盡頭就係電視搭，我哋嘅位置就已經好接近了，兩步路就去到～

塔下面有靚靚花花，但曉曉之前經過瀑布園林時驚驚，到呢個位都仲未驚完，唔係瞓覺呀，只係攬到實一實～

旅行當日適逢有團體帶住好多坐輪椅嘅公公婆婆嚟遊覽電視搭，仲上埋去瞭望台添，我哋係下面係上面都有遇到佢哋～我哋二話不說先去咗付費嘅瞭望台先了～

天氣好好，望得都遠，可惜我哋對呢個城市嘅了解太少～只係認得我哋啱啱去完嘅大通公園、我哋住係附近嘅札幌站同埋第一晚去過食蟹嘅薄野，其他地方全部都唔認得了﹗

大通公園呀～

曉曉你又擺post影相呀？