離開札幌電視塔，我哋去埋札幌市半日遊最後一站二條市場，午飯後就出發登別溫泉啦﹗之前上網睇資料，話啲人去二條市場最緊要係食海鮮丼，我哋去小樽時食咗個唔係太好味嘅海鮮丼，但同一日又食咗令人非常滿意嘅壽司，感覺上「海鮮丼」同「美味刺身」嘅慾望已經得到滿足，今次要唔要再食海鮮丼好似已經唔太重要了，另一方面曉曉係路上已經瞓咗覺，去到市場時又未醒，我哋又冇必要咁早食lunch，所以就咁逛下睇下嘢就算啦～
由電視塔去二條市場只係步行距離，唯一問題係太陽真係好曬，我哋又冇帶遮出嚟，難得曉曉都瞓得好好～等過馬路都要匿埋係條柱後面﹗
二條市場
其實去到二條市場有少少失望，因為實在太冷清了，呢個市場純熟觀光市場，賣嘅嘢都係target遊客做手信，一方面睇唔到當地人嘅生活，另一方面連觀光客都好少，我地又冇打算買海產類或者貴貴蜜瓜返香港，所以隨便繞一圈就行完了，而事實上個市場都唔大～
反而係我哋離開二條市場已經好近狸小路，我哋行咗day 1未行嘅第1至3段，唔，印象最深刻係行咗一間超大嘅結他專門店，day就睇得好入迷了，雖然冇收獲～另一個深刻嘅係一間女士only嘅sauna，如果今次係同家姐同行又有時間我一定要幫襯，好似千幾yen已經可以入去沖涼、浸浴、sauna仲有埋一餐食添，睇啲小冊子見到入面好似好舒服咁呢～
咦，搵得到條link，我去唔到大家都可以去下～
http://www.yudokoro-honoka.jp/komichi/
我哋由薄野站搭番地鐵出札幌站搵食，近近地食咗定食，雖然鋪頭有啲殘破，但居然有個包廂，我哋帶住曉曉都叫做自由啲嘅～個小朋友真係知聲，去食嘢就醒咯～
我哋叫咗一份炸雞定食一份天婦羅定食一份鰻魚卷share食，曉曉最捧場係鰻魚卷，我揀嘅炸雞都好味道～係日本食嘢真係抵過香港食囉，而家咁樣每個定食都唔駛1000 yen，香港嘅平民日本餐廳貴啲都未必有咁好味道～
經過見到呢間廚藝教室，好開心呀～
我哋去locker拎埋今朝擺定嘅行李就出發去登別啦～
日式溫泉旅館係我今個trip其中一個重點項目，咁耐冇去日本，所以揀間好啲嘅，所以我都好期待呀～嚴格嚟講我哋去嘅唔係登別溫泉，而係附近嘅虎杖浜溫泉，都係JR登別站落車，要酒店免費pick up搭10分鐘左右車程去到﹗我search jalan.net時搵到呢間溫泉旅館，但估唔到後來睇番長空閃閃旅遊書，先知道係佢推薦嘅北海道溫泉酒店第一位，我就更加期待了﹗吸引我嘅係無敵大海景，間間酒店房都望到一望無際嘅海，而睇相睇落去溫泉亦好似infinity pool咁望住個海，一泊二食嘅美食嘛，我又冇話特別期望，因為去得日本嘅溫泉旅館，係唔會唔好食的，只要唔係自助餐我就ok了～
我哋搭JR一個鐘零十五分鐘嘅車程，去到中段已經開始風雲變色，窗外面見到一陣陣狂風大雨，後來去到酒店先知道日本打風打得好犀利，都有少少失望㗎，會唔會浸唔到外湯？去到登別，咦，原來登別呢個咁出名嘅觀光點，JR站咁細㗎？只有人手剪票出站，我哋行出去時已經望到「心のリゾート 海の別邸」嘅職員等緊我哋了，同一架車返酒店仲有三個老伯，應該係相約一齊去玩兩日一夜嘅老朋友吧～
去到酒店，wow，如圖片一樣，超高樓底嘅lobby，放咗好多唔同款式嘅designer chair俾大家坐係度relax，落地玻璃嘅無敵海景，太開心了～
我哋坐係舒適嘅坐椅等候check in時，職員送上welcome drink，我哋嘅係冰凍花茶，而曉曉都有小朋友專用嘅果汁呀﹗原來係lobby全日都有無限供應嘅免費飲品，而唔同時段會serve唔同嘅小食添～
邊享受美景邊享受美食～
曉：菠蘿好味﹗
我哋嘅房間係三樓，走廊雖然似西式酒店嘅格局，但入到房間就係100%嘅和式房間了～
入到玄關我已經好興奮了，見到酒店貼心地一早為曉曉預備咗拖鞋(雖然佢未識得著)，而入面每一樣嘢都係預備俾兩大一小享用，有小朋友嘅浴衣，有小朋友嘅梳洗用品，welcome snack都係三份﹗
邊個話我唔識著拖鞋？﹗
靚景房間～
大概因為「心のリゾート 海の別邸」本身離開登別熱鬧嘅溫泉街較遠，如果唔自己駕車的話去唔得幾遠，所以呢度係預備咗好多東西俾客人消磨時間的，房間入面有幾本書、CD機，而style都係比較度假feel的，書有攝影集、詩集，當然全部都係日文啦，而CD有classical music、有大自然音樂，而最令人感到溫暖嘅預備埋兒童書同埋兒歌﹗
枱面仲擺咗一幅望遠鏡，可以係自己房間觀鳥吧﹗的確房間嘅景色係無敵大海景，但旅遊書嘅係藍天白雲、海天一色，但今次因為颱風，我哋嘅海景變成憤怒嘅海浪，灰暗嘅天色了～
我諗好興奮嘅除咗有我之外，另外一個就係曉曉了，因為和室未擺床鋪，所以好多空間，可以不停不停不停跑步步，坐下呢張椅又坐下嗰個坐墊﹗佢基本上non-stop咁跑咗一個鐘﹗
曉曉一定要晚飯之前瞓一覺，唔係餐飯實搞唔掂，我哋決定出去逛逛，同埋強逼瞓覺呀～
心のリゾート 海の別邸官方網站：
http://www.kokorono-resort.com/
前往其他日本旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247295
全部攻略 705
全部回應 10
