小齊返學未夠兩個月, 好彩的是功課不多,
每日仍有時間可以睇電視同午睡, 有時仲可以落公園玩半粒鐘
但我見好多朋友已經在哀號 (其中包括我見得最多o既表哥仔)
話功課多, 而且係能力範圍之外, 測考默也不少...
為難小朋友也為難家長
![]()
上一篇都講過下選校中所謂適合與否o既問題
其中最切身係每日都要面對o既 -- 功課
而第一項對功課量影響好大o既政策係普教中
我深深慶幸小齊學校並不是強制普教中
試諗諗, 如果中文科佢每日返o黎就係要溫拚音,
波~棵~摸~科~ 所有的生字會變成:
廣教中只需要溫寫法, 用法
變成普教中要溫寫法, 用法, 讀法, 串法, 聲調
而且我唔知點同佢溫默書先死...
我自己讀出o黎都無把握, 而佢讀我又唔知佢讀成點??
我唔想佢咁低年級我都教唔到佢!
有d學校唔係強制全普教, 會分精英班普教/其他粵教
坦白講, 點分都好, 我一定全力爭取一路粵教中落去~
真的, 選校時教學語言一定要考慮!!
雖然學校會唔會改變我唔知, 但如果可以的話我真係想粵教中下去~
![]()
另一種政策影響功課量就係 TSA!
有 D學校會比好多TSA 練習,
而我睇過某 D 練習都幾花時間加操練式,
好彩小齊學校已經決定唔考小三TSA啦,
可以唔駛同呢 D 練習見面啦~
但津校可能就無咁自由可以話唔考,
要被我們偉大的教育部門
玩指導下去
![]()
另外, 有時校長o既眼光, 視野都好重要,
校長好多時決定到學生要做幾多"暴力作業" (抄抄寫寫無乜涵義果d)
做幾多測考默, 程度如何?!
得個深字令學生每次做完都有挫敗感o既唔係好o既卷~
上星期去左學校比小一家長o既座談會,
聽完都放心d,
起碼我覺得程度, 範圍好合理, 測考不會教淺考深,
學生如果能夠融會貫通教左o既內容同小心做卷的話,
拎高分甚至滿分應該唔難!
我已經聽過有d學校出o既英文卷有一半小一學生唔合格!
如果我做老師的話我會覺得自己好失敗
一係教學出問題, 一係出卷有問題
小一學期頭已經唔合格? 點捱落去?!
家長見到咁o既成績一定嚇到傻
於是惡性循環o既鞭策就開始 ... 直到永遠...
初小我最想培養係小朋友對於"讀書"一事o既責任感!
讀書係你讀, 唔係我讀,
我當然樂意同小齊溫習, 但唔該唔好 shift左個burden比我,
我唔o係你身邊你就唔讀, 得我坐隔離先溫
對於默書, 我暫時o既方法係-
範圍一早有, 我得閒會問下佢d vocab 點串,
夜晚做完功課又有時間就叫佢自己抄下,
抄完自己改! (順便培養佢覆卷習慣)
雖然佢覆完都係錯咖 ! haha
![]()
暫時我覺得呢個方法都ok, 起碼佢肯自己溫書,
用咩方法溫書其實我只係比建議佢,
o黎緊繼續有測驗考試,
我同佢都要慢慢探索最適合o既辦法!
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
