由 Rita 於 2016-08-30 00:00:00 發表 | 累積瀏覽 222
為咗要出去行下等曉曉晚飯之前瞓一覺，我哋輕裝咁落去酒店附近行下，趁佢未瞓時出去望海嘅平台度影下相啦﹗
我哋住嘅三樓都有一個小小圖書角，你睇嗰位小朋友幾好學？
舒服嘅座椅總令人忍唔住要坐一下﹗
出去戶外之前有個裝備室，實在太太太太太貼心了﹗估到會有嘅有唔入鏡頭嘅雨傘啦，浸足湯時用到嘅毛巾都諗得到嘅，但其他嘅全部都想像唔到會出現，擋風保暖嘅斗篷、遮太陽嘅太陽帽估唔到有小朋友size，仲有唔入鏡頭嘅皮鞋﹗事關大家可能著住拖鞋落嚟，出戶外仲要提供埋室外鞋俾你替換添～
風和日麗嘅日子呢個平台應該真係好舒服，坐下舒服嘅座椅望下個海，親近下大自然，身心應該都可以好好休息～
不過打風嘅日子嘛，真係此地不宜久留，太大風，我咁重都差唔多被吹走，更加唔敢俾曉落地跑步步，要攬實穩陣啲﹗
打風中嘅登別海邊，都係難得嘅體驗吧？
用心設計嘅花園
心のリゾート 海の別邸戶戶向海，有啲應該係貴價啲嘅房間吧，仲有埋露台添呢～
點都好，都試下佢個足湯啦，咁貼心有毛巾無限供應喎，溫度唔算好熱，不過坐一陣過下癮影張相就算啦，因為開始落雨了～
好啦好啦，入番室內，強制瞓覺先，爸爸抱曉曉去行下，我就去番lobby坐下睇下雜誌，冇㗎，得日文書同埋雜誌咋，我揀咗本類似講生活品味嘅雜誌嚟睇，好多相片，適合作為「文盲」嘅我，雖然講有錢人嘅生活品味，但感覺好優雅，內容唔講珠寶唔講名錶唔講名車，但就講下旅行講下美食講下生活嘅detail，印象最深刻嘅係一個lace特集，少少lace花邊就可以點綴生活同埋衣著～另外一個好深刻嘅係類似「陸上郵輪之旅」嘅旅行團介紹，點解郵輪可以陸上呢？其實係一個豪華火車九州七天旅行團，有幾晚住係火車入面嘅豪華獨立房，就好似坐郵輪嘅船艙咁有床有私家浴室，係火車入面享用美食，然後會「上岸」，係某啲景點會落車一日遊之類，然後好似其中兩晚會入住九州嘅溫泉旅館，唔同價位嘅溫泉旅館的話整個tour就有少少價錢嘅分別﹗好似好吸引咁呢～日本仔真係好多諗頭丫﹗我睇緊雜誌時，day就抱住瞓著咗嘅曉入番嚟，我哋終於悠閒地坐下啦～
差唔多到晚餐時間，我返上房間拎齊曉嘅開餐用品，叫醒佢就可以去食飯lu，進入我好期待嘅一個環節，就係好多道菜嘅溫泉旅館全餐﹗
我哋入座獨立廂房，要除鞋梗係好啦，仲free仲舒服，職員俾咗我哋揀曉嘅座椅，係櫈仔同埋booster chair之中我揀咗booster chair，應該佢冇咁易跌同埋冇咁易逃脫～今個晚餐確實樣樣都好食，到打blog嘅呢一刻隔咗兩差唔多兩個月，我印象最深嘅食物得番和牛shabushabu warm salad，其他嘅味道已經開始淡忘，但依然令我感動嘅係佢哋對小朋友客人嘅重視囉﹗我哋book酒店時係book兩大一小，小朋友嘅可以揀要唔要床舖同埋要唔要飯餐，我幫曉揀咗兩樣都唔需要，反正佢都同我哋攬住瞓，食又share就ok，但都有少少收費嘅，即使冇床鋪同冇飯餐嘅小朋友都係尊貴嘅客人，佢哋都提供白飯、果汁、湯同埋甜品俾佢呀﹗太體貼了～等我哋睇下晚餐嘅食物啦﹗
有英文餐單，少一份驚喜，但就可以知道自己食緊啲乜囉～:D
果味cocktail，甜甜易入口，酒精應該好少喇～
曉曉喜愛嘅粟米豆腐
刺身拼盤實在太華麗太闊綽了﹗種類又多又厚切，樣樣都好鮮美呀～最正應該係唔識個名嘅白肉魚﹗
濃味油脂豐厚嘅烤鴨肉同清新嘅蔬果smoothie當然係絕配啦﹗齋曉好鍾意蔬果smoothie呀﹗
開頭好難想像shabu shabu同沙律點樣可以一齊食⋯
原來係以warm salad嘅形態上菜，牛肉嘅油脂流落去蔬菜度吸收，加上酸酸甜甜嘅醬汁，想像唔到嘅夾同好味道呢～連齋曉都食好多牛肉呀，夠腍丫嘛～
蘿蔔蜆肉湯就中規中矩啦～
估唔到主食都咁精緻，茶漬炸飯糰，一片片嘅莫非係大雄佢哋秋天去摘嘅松茸？好香但口感有點硬硬的～
種種精彩嘅食物之後，呢個藍莓mousse甜品就相對有啲失色了～
曉曉話，都係雪糕好味﹗
我哋返到房時，榻榻米上面已經鋪到床鋪啦～
食飽飽返房休息一陣又到另一重頭項目，當然係浸溫泉啦﹗其實有啲緊張嘅係，今次係第一次帶曉去大浴場沖涼，因為房間入面係冇浴室的，曉即使唔浸都一定要落去沖涼，一來曉沖慣浴盆對花灑有少少驚，二來去到陌生環境唔知會點，我都要鼓起勇氣﹗好在我哋沖涼時客人唔多，有咩發生都唔怕太尷尬～更衣室好大好乾淨好舒服，我同曉曉都脫光光就入去沖涼，可能因為係陌生環境佢真係緊張吧，企定定唔會走嚟走去，我唱住歌同佢沖都好合作，順利完成﹗雖然都估佢會怕熱唔肯浸溫泉，都即管一試下，放一隻腳入去時就話熱熱，跟住想出去，ok，咁都係照我原本嘅計劃進行啫～更衣室嗰度好貼心咁有張bb床，我先放曉入去等我，我可以鋪大毛巾係地上同佢抹身著尿片，曉曉件小童浴衣雖然有啲oversize，但都超可愛丫～輕鬆搞掂就輪到我私人時間啦，爸爸同曉曉去玩，我入番去浸咯～內湯都有兩個池加蒸氣浴，我樣樣都試下咁啦，當然都要試埋外湯，心のリゾート 海の別邸當初最吸引我想入住嘅就係景觀似infinity pool嘅外湯，umum⋯因為打風嘅關係，同我expectation有好大差距，出去一陣我就要入番嚟了，因為大風大雨大浪得太恐怖了，雖然有簷蓬唔會淋濕，但視覺同聽覺效果都令人覺得有威脅，好怕有咩事都冇人知，都係出去啦，驚驚～
出到去見到兩父女係度自拍，我都要join呀﹗
曉曉著住件浴衣大佬曉嘅feel有少少番咗嚟，但好可愛呀～
開心～
榻榻米嘅好處係⋯張床無限大﹗
好滿意嘅溫泉酒店呢～一定可以好好瞓一覺﹗
心のリゾート 海の別邸官方網站：
http://www.kokorono-resort.com/
前往其他日本旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247466
全部攻略 705
全部回應 10
