我哋會係富良野住三晚，咁耐？一日留係富良野，一日去旭川，最尾嗰日去完美瑛就出番札幌，富良野作為一個基地就唔駛成日搬酒店啦～舟車勞頓後嘅第一日，我哋決定三個行程之中搭車相對較少嘅富良野花田﹗
一日嘅開始梗係最重要係個早餐啦﹗有別於札幌同登別嘅自助早餐，Furano Natulux Hotel嘅早餐係一人一份嘅，有得揀和式或西式，要先一晚揀定款式，而飲品同cornflakes就自助～雖然係一人一份，但都唔好睇少佢，款式又多又精緻，味道樣樣都好(除咗我直接婉拒免得浪費嘅納豆﹗哈，冇理由因為唔食納豆而唔揀和式早餐嘛～)﹗又係嗰句，最令人印象深刻嘅唔單單係食物本身餐廳環境本身，而係對客人，包括年紀最小嘅客人嘅重視，曉曉雖然係冇俾錢嘅guest，但都有得揀俾白飯定麵包佢喎﹗﹗good good～
食到八八九九諗住睇番火車時間表，哇，雖然由富良野搭火車去上富良野站只係好短距離嘅local車，但原來班次都少得可憐﹗﹗要趕過去啦，唔好miss呢班車呀，唔係有排等﹗﹗好在火車站超近，只係過條馬路啫～
點解標題要特別講超旺季過後呢，其實睇旅遊書時，去富良野最出名嘅花田農場一定係富田農場，由JR薰衣草花畑站可以徒步過去，難怪咁受歡迎﹗大家有留意我day 0 blog講啲preparation就知，其實我哋揀呢段時間去係為咗就我個韓文班sem break，所以同朋友講起去北海道都有人話「呢個時間乜都冇喎」，意思係指又冇薰衣草又冇紅葉嘅尷尬位～其實我後來再plan行程時就知，即使薰衣草已經過咗最盛開嘅日子，其實仲有好多其他花都仲好靚，所以旅程時間有限，係函館同富良野一帶之間挑選，我依然揀咗去富良野而放棄函館，但問題後來先陸續出現，原來去富良野唔揸車真係會綁手綁腳，估唔到薰衣草花畑站係臨時站，到八月中會關閉，而觀光巴士亦會停駛，有啲就剩低星期六日有服務～所以我哋基本上係去唔到富田農場﹗﹗其他options之中我揀咗上富良野嘅Flower land，可以由上富良野站搭10分鐘的士去，起碼叫做去得到先丫～
好天氣自然有好心情，搭車嚟個自拍，點知螳螂捕蟬黃雀在後，我哋被捕捉了﹗
沿路大多景色係呢啲鄉村景色，花花就未係好覺眼～
好在一出站就有的士了﹗我去過咁多次日本先第一次搭的士咋，始終日本的士出名好－－－－貴－－－－﹗今次如果唔係無可奈可都唔會諗啦～我係怕貴怕到係香港plan行程時search清楚北海道的士跳錶收費，再用google map畫條路線計距離，再人手計大概搭的士呢段路要幾多錢﹗照計就應該1000yen鬆啲可以去到，搭10分鐘要1000yen就梗係貴啦，但以Flower land免費入場嚟講，我哋來回的士即使要3000yen都仲ok嘅﹗果然，跳錶嘅結果都冇點樣out budget，放心晒～
Flower land Kamifurano－－富良野Flowerland到達﹗
去到一落車先係一個賣嘢食賣紀念品嘅室內空間，我哋當然先去睇花花啦～Flower land免費入場，但我哋坐嘅觀光小火車就要每位500yen，幾時開車？哈，原來有客就開㗎啦，我哋嗰班車就得我哋三個乘客﹗
架小火車駛出去以超慢速度行駛，而花田亦一眼望晒﹗係旅遊書、旅遊雜誌睇嘅北海道花田好似無邊無際咁，我一直天真地以為成個北海道係夏季嘅時候處處都係花海，所以早上搭local火車時都咕嚕冇乜特別嘅風景睇，卻冇諗過其實花田啲花都係要專登種出嚟嘅觀光農場，觀光農場的話地方當然有限大啦，其實話Flower land嘅花田一眼望晒，其實影相都好夠大㗎啦～可能我哋坐係觀光小火車上面居高臨下就覺得範圍細，之後再徒步行住影相就覺得都唔算太細嘅，當然我哋後來去美瑛嗰個觀光農場就更大啦～
我哋搭小火車兜一圈之後就用腳去重新參觀一次﹗
日本人好興呢啲有埋日期嘅影相位，仔細一睇，原來啲紅花係排成北海道嘅地形呢～
邊個可愛啲？好似爸爸贏呢～
發現蒲公英﹗
花田嘅風景睇落又唔係好同呢，更加壯觀了～
呢度雜色嘅花叢令我諗起可以用嚟練玉女心經～^^"
黃花
橙花
彩色花
邊個話九月冇薰衣草㗎？
咁樣影出嚟都唔太寒酸丫～
呢種花花唔知叫咩名，似乎係而家最燦爛呢，色彩好鮮艷～
人比花嬌？花比人嬌？
望下、聞下、輕輕溫柔摸下
靚靚
咁我都唔排除七、八月時嘅薰衣草更靚更茂盛嘅，下次再嚟囉﹗呵呵～
勝在有好天氣
花花﹗﹗
不過曉曉唔係好肯落地丫，呢個城市人⋯唉～好不容易肯落地行，係泥地上戰戰兢兢，幾步路又要抱抱了，所以火日竹竹竹唔到幾張曉曉靚靚單人相呢～
我哋上埋去展望台度睇，可以望晒整個Flower land了﹗
出番嚟試下呢度嘅薰衣草雪糕，雖然係漂亮嘅淺紫色，但只係少少香甜味，又唔係太薰衣草，叫做試過啦﹗係對面嘅薰衣草主題店，曉曉好喜歡隻兔兔公仔，我哋結果買咗一隻俾曉曉，一隻一模一樣俾快要出世嘅表妹逸bb，到時佢哋一人攬一隻嚟影相咪超級cute？
其實咁都叫做逛完Flower land，而我哋亦要注意唔好miss local火車嘅班次，寧願早啲出番去上富良野站﹗我哋發現真係冇可能等運到，似乎好難撞正有人搭的士上來吧？呢段路出去火車站成超過3公里，農場仲要係山上面，行路要超過一個鐘，真係冇可能～好在我哋落車時的士司機俾咗咭片我哋，我哋拜託Flower land嘅職員幫我哋call車，好快同一間的士公司嘅車就嚟到了﹗
呢個時候曉曉要瞓覺啦，出到去火車站坐下又影下相咁啦～
byebye上富良野～
下晝嘅行程既令人期待，亦令人擔心呢，我哋要抓緊時間﹗
Flower land Kamifurano官方網站：
http://flower-land.co.jp/
前往其他日本旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 245685
全部攻略 705
全部回應 10
