由登別搭巴士經札幌，將會邁向旅程下一個大站－－富良野，為咗唔好令車程太長途，我哋一早已經決定要係札幌停留幾個鐘先再出發，好好舒展筋骨之餘，唔好令day 4太乏味啦﹗札幌唯一嘅shopping時間就係得今日咋～我哋好好彩，前往富良野嘅車站旁邊就有locker了，而好好彩有兩個吉嘅大locker，但唔好彩嘅係我哋唔夠100yen硬幣，而車站counter亦唔肯同我哋唱錢，拖男帶女又大件細件行李唔想撐樓梯上去搵地方唱錢，所以直接係旁邊嘅自動販賣機買嘢飲嚟唱錢算⋯
所以出現咗呢罐咖啡﹗佢最平所以揀咗佢﹗但買一罐時部機好醒咁找咗500yen + 幾個100yen硬類，oops，我哋要再買多一個飲品先夠coins用囉～太老土了﹗背囊已經揹住好多樽清水，而家再加多兩罐飲品，實在太蠢了～不過呢個咖啡罐嘅故事到呢度仲未完⋯
啱啱有奇異果試食活動，唔好執輸先～好闊綽呀，試食都大大舊～
好喇，我哋放好locker一上樓梯就係Esta購物大廈了，見到拉麵共和國嘅招牌，去得札幌點都要試一次札幌拉麵，好似專登為我哋揀咗今日試食咁呢～
拉麵共和國係10/F，好在有專用電梯直上到去，我哋個個都好餓了～
影下個招牌先～
拉麵共和國總共有8間拉麵店，全部都細細間，雖然係商場入面，但座位都似傳統拉麵店咁坐得唔算太舒服，好在都有bb椅﹗8間之中其實都冇idea邊間好，對住店名+拉麵照片嘅poster都唔知揀邊間好，唯有問曉曉啦﹗:p
撞鬼，打blog時想搵番我哋結果食咗邊一間，史官(我家姐)冇同行，原來冇影到店面同招牌，好在有線索﹗﹗
對番相入面個麵碗個logo，原來我哋食咗呢間叫「空」(らーめん そら)～印象覺得味道頗鹹頗膩，雖然話北海道冬天天氣寒冷，拉麵會傾向濃郁飽肚，但後來我哋呢個trip第二次再食拉麵，先知道濃味都唔一定要咁鹹嘅，後來嗰次更好味呢～
拉麵共和國嘅設計係走懷舊路線，都有啲影相位，曉曉著住浴衣會唔會襯個背景多少少？
食飽飽出嚟就係行街嘅時間了﹗我哋去玩之前同曉曉換條片～出發前講起帶bb去日本旅行，好多朋友都話日本好baby friendly，雖然都係相對地baby friendly，不過講到育嬰設施，其實我覺得啱啱去台灣時，台北做得更好，嗰次啲親子廁所令人印象深刻，好大嘅獨立空間有大人座廁、小朋友座廁、換片台、仲有俾bb暫時坐一陣嘅安全椅，非常好～而香港嘅育嬰室大多同男女廁分開一個空間，爸爸去換片都ok，要是換片台install係女廁入面，都唔駛入廁格～但今次去北海道，好多時幾唔方便嘅係，啲換片台係係數格廁格入面嘅其中一格之內，即是你要幫bb換片就要先排「銀行隊」，到你排第一喇，再等有換片台嘅嗰一格，都幾花時間，同埋你要睇下廁所門口嘅floor plan先知有冇呢啲設施同埋位置～唔知東京、大阪呢啲更進步嘅城市會唔會設計得好用啲？
Esta成楝building由B2到11/F，我哋由10/F開始一直掃落去到樓下，精品、文具、家品、電器、服飾等樣樣齊全﹗
9/F有Pokemon精品店呀﹗十幾年前開始興Pokemon時我冇乜feel，嗰排個個都玩Pokemon Go，連大人都好鍾意啲小精靈呢，我自己就冇揀啱買咩，day就揀咗啲文具送俾人～
我哋停留得最耐嘅應該係5/F嘅Uniqlo，雖然係香港都成日有幫襯，但札幌站Esta嘅Uniqlo係全世界最大嘅Uniqlo旗艦店，行都行到腳仔軟～同埋之前媽咪嚟開日本旅行時，聽啲阿姨講日本Uniqlo比香港平，佢自己親自比對過都確認果真如此，所以如果有啱嘅我哋又拎得到都想買﹗主力睇曉曉衫啦，發現好多款係香港都未見過，太高興了﹗起碼香港Uniqlo從來未見過bb襪有得賣，而睡衣款式都冇咁多～呢間Uniqlo仲可以幫外國遊客直接辦埋免稅購物添，不過後來先知道呢啲方便會變成唔方便呢～
yeah，滿載而歸～
媽媽開心shopping時，爸爸同曉曉當然自己搵嘢玩啦﹗地下有彩色格仔，佢哋又行下跳下，曉曉鍾意照鏡，爸爸又同佢整蠱做怪～咖啡罐嚟到呢度再出場了，話說今期曉曉好鍾意playgroup嘅飛高高，因為曉曉飛高高得多令人太疲累，爸爸有超越一般框框嘅思維，令我大為佩服，原來可以「我是快樂的罐罐飛高高，oooh～」之後我哋仲發展到「我是快樂的頭髮飛高高，oooh～」咁就飛幾耐都唔怕啦～勁﹗
我哋基本上係行到夠鐘至走，臨過番去巴士站前，買咗兩個鯛魚燒做下午茶，紅豆味同custard味都好味道～
第二程長途車要搭三個鐘，三個鐘呢部份有啲令人擔心，但巴士相對JR嘅優勢，一方面容易瞓覺，另一方面揀班次方面更有彈性，因為唔駛考慮轉車時間，所以第二程嘅出發時間正正係曉曉瞓下晝一覺嘅時間，三個鐘瞓足兩個鐘，今次佢實在太合作了～剩低一個鐘要娛樂瞓飽開心嘅曉曉就唔難啦～話說係小樽我哋漫步住宅區搵神舍時我哋同佢試玩「1-2-3-喔﹗」、「1-2-3-yeah﹗」，佢點都係慢半拍，我好記得，就係呢程長途車入面，佢第一次同我哋同步「喔」、同步「yeah」，玩呢個都玩餐飽呢～
去到富良野七點左右，天已經黑齊晒，一出JR站真係令人意想不到嘅⋯荒蕪﹗﹗車站周邊唯一高少少嘅building就係我哋要入住嘅Natulux Hotel，好在咁近啫～拿拿聲check in放行李就要搵食﹗
大概酒店就係知道遊客係咁荒蕪嘅地方搵嘢食一定好慌亂，所以為我哋每一個住客預備咗手繪地圖，標示咗我哋有機會要光顧嘅鋪頭，最重要係餐廳啦，包括公休日、開放時間、食物種類等資料，另外便利店同埋超級市場都有顯示，欣賞﹗
因為時間已經頗晏，我哋決定食最近酒店嘅福壽司，比起小樽幫襯嘅有氣派嘅政壽司，福壽司感覺更平民更接近日常呢～
要叫啱曉曉食嘅嘢必須有熟食，我哋除咗兩個大人share咗個壽司拼盆之外，我哋叫多份鰻魚卷同埋親子丼，兩款曉曉都啱食﹗令人詫異嘅係，福壽司嘅壽司居然有得揀大或細size，唔係指件數，而係個握壽司嘅size，根據我睇將太的壽司嘅知識，我以為壽司有所謂「理想嘅大細同形狀」，以達至最好嘅味道同口感(？﹗)，我哋揀咗細size，但嚟到食落好感覺都係大size囉，哈哈，雖然如此，但又出乎意料之外嘅好味喎，好搞笑～跟住day就提起，呢間福壽司可能就係將太個師兄佐治安人係京都修業期間其中一間壽司店咁，老師傅見到小朋友食得咁開心就忍唔住越揑越大件，但手藝了得嘅老師傅嘅壽司即使大件到「唔似樣」都依然好味，深得大家歡心～鰻魚卷都有段故事，我哋落order後，只識非常簡單英文嘅店員好努力用body language想同我哋解釋一件事，嗱，一條壽司卷就咁長，切開一件件啦，咁呢⋯哦﹗原來一份鰻魚卷唔係一條，而係好幾條再切成一大盆﹗﹗原來如此﹗根據我哋嘅食量同我哋商量，又俾我哋叫指定幾多條壽司卷喎，真好～
福壽司嘅幾樣食物個樣唔算精緻，但食落又幾ok喎，加上溫暖嘅服務，都算係今個trip其中一間令人印象深刻嘅鋪頭呀～
食飽飽稍稍係附近逛一陣，真係靜得好交關﹗想搵地圖入面嘅自助洗衣店，好不容易搵到，但已經關門，番酒店問下櫃枱知唔知佢哋幾點開門，先知道原來我哋酒店都有自助洗衣乾衣機呀﹗哇，唔駛手洗大大堆衫實在太好了～沖涼後由我陪曉曉瞓覺，由day搞掂晒洗衣乾衣，辛苦了爸爸﹗﹗
JR札幌站Esta購物商場官方網站：
http://www.sapporo-esta.jp/
Esta 10/F拉麵共和國官方網站：
http://www.sapporo-esta.jp/ramen
前往其他日本旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247486
全部攻略 705
全部回應 10
