大家樂 Café de Coral：狂風掃樂葉

大家樂大多數喺小弟星期六落去食旱餐嘅地方，晚飯？甚少幫襯，偶爾有新出嘅特別嘢想試或懶煮晚飯，就會到快餐店搞掂。最近，就見佢出咗款「海鹽檸檬烤雞超值2人外賣餐」，$88已包海鹽檸檬烤雞1隻、粟米2支、蜜糖甜薯1客、肉醬意粉1客及可口可樂汽水2罐，非常豐富。趁快樂星期五，工作忙無時間煮，就買一份返屋企同老婆撐枱腳。


依一款套餐有晒專用袋及膠盒作包裝，而裝雞嘅膠盒，裡面放有吸油紙，而透明膠蓋又有啲窿窿散氣，唔會焗住有水氣整腍啲雞皮。之但喺，好老實，買到返去屋企，仲要等埋老婆返嚟，都已喺半個多鐘後嘅事，啲嘢食點都打折扣。



海鹽檸檬烤雞 海鹽、檸檬，喺幾有興趣嘅味道組合，不過，食完晒隻雞檸檬味就欠奉，不如加多半個檸檬俾個客，後加檸汁就仲好，相反，鹽味就過多而有過鹹嘅情況。因為，我有再用焗爐翻熱，所以，皮都仲有啲脆，而雞肉則幾嫩滑。老婆話食完半隻雞，加條粟米及少少蜜糖甜薯，都飽晒，結果，個意粉留番第二朝早餐。



粟米 屬於超甜粟，食落好甜，不過，我就唔覺有牛油香。



蜜糖甜薯 賣相有啲麻麻哋，焗到有唔少燶位，但味道其實唔錯，粉甜清香，有少少食煨蕃薯嘅感覺。



肉醬意粉 整個餐做得最迤、最快餐嘅水平，啲意粉白烚無味，口感又過腍，喺快餐式一煮就一大盆嘅質素。肉醬就還好，唔喺話好食，只喺唔太差，覺得佢唔夠入味。比起曾食過佢哋嘅焗肉醬意粉，明顯有好大落差。

供應時間由下午5:00開始已經有得買，只限外賣，限時優惠，售完即止。唔知每間店預幾多份，當日都見有幾個客買，講唔埋好易狂風掃落葉被人買晒。雖然水準麻麻，都只喺快餐式貨色，但咁嘅價錢相信都唔可以太多要求吧！
個人評分
味道：6/10
環境：7/10
服務：7/10
抵食：9/10
平均每人消費：HK$44
餐廳資料：
大家樂 Café de Coral
美孚美孚新邨第八期百老匯街114B號地下126-128號
2785 4103

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================