Warren：慢活周末

大坑曾被喻為香港一個頗有慢活感覺嘅小社區，天氣開始轉涼，秋意綿綿，又喺露天用餐嘅好時節，故同老婆嚟到大坑渡一個慢活周末，食餐晏，再行行半山。


晌華倫街嘅Warren，喺朋友新開嘅餐廳，當然要嚟撐吓場，其實之前曾到此晚餐，食得出質素、用料都夠精，所以，對其出品都有信心。餐廳位處兩幢新建豪宅中間嘅「後巷」，擺咗少少露天位，雖然喺後巷，但唔單只闊落，更喺乾淨企理，自然喺是日位置首選，亦好適合放狗人士晌度食晏或嘆下午茶。



至於室內，屬小店格局，大概17、18個位左右，偌大嘅開放式廚房，可以一窺師傅做菜。



周六、日推出嘅Weekend Brunch，供應時間由12:00pm至4:00pm，主菜連飲品定價為$128 - $198，餐飲包括熱茶、濾泡咖啡或是日果汁，豪啲更可加$120任飲紅白餐酒。與其說Brunch，就似Lunchea，午餐+下午茶，俾人hea足成個晏晝。



不過，款式選擇比預期少，但聽店長講，因為初初推出都喺當小試牛刀及睇吓食客嘅反應，行順咗，遲啲就會加多啲款式，總之就遲啲先嚟！



香煎慢煮雞胸配白菌汁 $158 對於慢煮嘅食物一向有期望，因為，慢煮嘅方式令食材可保持柔嫩感同肉汁不流失。不過，眼前嘅慢煮雞胸比預期些微落差，口感都軟腍，但未至好嫩滑，個白菌汁就真喺做得幾香，啲烤薯又粉香。







華倫豪華全日早餐 $198 原本打算點個全日早餐嘅基本版，不過，店長推介個豪華版，加多6oz美國西冷，佢寫包單喺質素保証，搞到我心癢癢，結果就試咗個豪華版。

其實，單以定價，個人就真喺覺得有啲貴，不過，賣相、食材質素就覺得都算值回票價。茄汁豆、沙律菜依啲大路嘢就唔多講啦，而烘多士又脆又富牛油香，炒香草滑蛋既滑又有香草幽香，煙肉唔喺肥膏多過肉嘅劣貨，豬肉睇皮脆肉香，薯餅炸得甘脆而唔油膩，就連片蕃茄都烤烘到收水，變得茄味濃郁。



至於件西冷，真喺掂喎，好有肉味，煎得粉嫩啱啱好，落刀手感已好得，入口肉質軟腍，簡單鹽、黑椒調味，再沾丁點芥辣已夠晒好食。



蘋果汁 是日果汁有橙汁或蘋果汁，不過，點睇都唔多似鮮榨，所以，是日果汁可以講無咩特別。



即磨咖啡
原本想點掛耳式濾泡咖啡，但店長話已經無做，所以，佢或者改改番個餐牌會好啲。幸而，普通嘅咖啡一樣飲落咖啡味醇香。

天氣舒服，自然食嘢都稱心啲，跟住再行吓山，幫助消化吓之餘，出身汗，不知幾寫意。
個人評分
味道：8/10
環境：8/10 服務：8/10
抵食：7/10
平均每人消費：HK$200
餐廳資料：
Warren
大坑華倫街9號地下1號舖
2392 5121

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================