有情有意 Friends Italian Restaurant：情意兩全

曾到訪過紅磡都會廣場嘅社企餐廳「高。牽心」（Go Inside）食飯，不過，都已經喺2014年8月嘅事。其實，佢隔離仲有一家姊妹店「有情有意」（Friends Italian Restaurant），同樣喺社企餐廳，不過，前者主要以訓練年輕人為使命，重拾追求夢想嘅熱情，後者則喺個讓失聰人士自力更新嘅地方，更推動聾健共融。這晚，有事過到嚟火車站依邊，就專登嚟支持一下這社企意大利餐廳。


對比起「高．牽心」嘅色彩繽紛環境，「有情有意」環境格局真喺好唔同，一室黑與白，水晶燈，走高級格調路線。



店內有唔少侍應喺失聰或弱聽，既然喺聾健共融，咁就要學吓點溝通。識手語就故然喺最好啦，唔識就要發揮吓你嘅身體語言天份，否則，好似小弟咁「篤手指」，因為餐墊紙有唔少「備用」圖片及詞匯。



不過，有個手語就真喺要學一學，就喺叻嘅手勢：「多謝 / 唔該」，以表示對佢哋嘅鼓勵。

散點主餐牌影嚟比大家當個參考：



一支公嚟到就揀套餐划算啲，基本晚餐包餐湯、主菜及飲品，視乎揀咩主菜，定價為$88-$248，有平有貴，豐儉由人。





甘筍湯 色澤橙紅，好似就咁新鮮蘿蔔打成，無落好多忌廉，入口甘筍味清新，而且，仲有些微甘筍微粒，哈哈，以証真材實料。



燒紐西蘭羊扒香草醬意大利飯 $138 既有羊扒，又有意大利飯，晚餐眾多選擇中，依個肯定喺小弟嘅不二之選啦。雖然等待嘅時間稍耐，但個意大利飯一上枱，真喺幾吸引，最估唔到一客有成4支羊扒，而且，意大利飯亦不少，份量十足。

唔止羊扒燒得外層焦香，肉質軟腍帶中度嘅羊羶味，啲意大利飯更入口有咬口，味道上隱若有微微香草味，整體水準不俗。要挑剔，啲羊燒短啲時間，生少少仲啱我呀。





莫卡咖啡 +$8 本來點杯普通咖啡就算，後尾發現改飲其他特色咖啡都只喺俾多$6-$8，所以，改試莫卡咖啡。賣相做得有板有眼，味道唔錯，奶泡綿密，咖啡跟朱古力味都幾平衡。



意大利芝士餅 +$28 加錢可配是日精選甜品，共有4款選擇，我就想睇睇佢啲意大利芝士餅質素如何！一客有3小件，賣相唔失禮，芝士餅嘅層次亦好分明。至於味道方面，幾有咖啡香，酒味就薄啲，海綿蛋糕層夠濕潤，芝士層夠綿密軟滑，綜合評分屬中上左右。



臨走前，侍應順帶介紹咗佢哋一個「任食晚餐All You Can Taste」，沙律、餐湯、頭盤、主菜、意粉、意大利飯、甜品、飲品，全部住點任食，原價$660就肯定太貴，因為晌唔少五星酒店食個自助晚餐都味差唔多價，但依家做緊$268就頗吸引，佢仲話為慶祝開業4周年，11月內惠顧更俾多85折，但應該唔會咁快又再嚟。



除以上優惠，餐廳原來有啲現金餐券賣，送俾朋友或自用都得，撞啱 4周年，買$600就加送$50，買$1,000就加送$100，人多嚟食真喺諗得過。

因為，始終喺走稍高級嘅路線，所以，俾人感覺可能定價有啲貴，但質素不俗，環境又舒適，又可以支持一下自力更新嘅失聰人士。此外，餐墊紙上亦有介紹佢哋喺香港首間聾人意大利餐廳、民政事務局社企獎勵計劃2013得獎餐廳之一、傑出愛心商戶，唔喺浪得虛名得個樣，好值得支持。
個人評分
味道：8/10
環境：8/10
服務：8/10
抵食：7/10
平均每人消費：HK$190
餐廳資料：
有情有意 Friends Italian Restaurant
紅磡都會道6-10號置富都會7樓742號舖
2668 0450

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================