2016 的平安夜

24.12.2016

臨近年尾 , 貴賓室發生左好多不如意事件 , 令我地一班 Senior 同事都好頭痕 .

大家一直都為新的貴賓室籌備中 , 但最近卻上報紙了 , 每篇報導都係 " 火燒旺地 " . 同事們見到 , 都好傷心 . 不過 , 依件事都係唔提為妙 . 

另一件事就係 , 有皇親國戚對貴賓室的服務有微言 . 老實講 , 咁多年黎都未試過係服務上被貴賓投訴 , 今次真係好大鑊 , 經理要我地每個人都自我檢討 , 搵出原因 , 一班同事突然人心惶惶 . 

其實我本身係做 admin 野 , 但又剛好遇上上級們要去工幹 , 得返我一個人係貴賓室 . 最 Senior 係我 , 個三日 , 我接左無數個電話 , 同事事無大小都搵我 , 我自己既工作又日日都清唔曬 , 我壓力真係差點爆煲 , 那個星期 , 好想無義氣地離開 .

上級有時都會叫我放手比同事做 , 但所有野都係同錢有關 , 如何放手 ? 識做同做得好係兩樣野 , 不過 , 好多人都唔會明白 . 正如同事們成日會講 , 我個位好輕鬆 . 事實上如果佢地唔做錯野 , 唔計錯數 , 唔將 d 野亂咁放 , 日日都準時交數 , 可能的確如佢地所諗咁輕鬆 . 每個同事錯一個數 , 我都要係一個月內搵幾百個錯處去更改 . 基本上 , 我係一個管家婆咁 ...

今日平安夜 , 幸運地被安排放假 , 腦袋可以放空一下 . 最近接二連三的不幸事件 , 都跟貴賓室有關 , 希望 2017 年順順利利 , 所有舊同事都繼續齊齊整整, 一個也不要少 .