Cafe Paradise：飪．天堂

月中老婆卒之返完學，所以，同佢出街食番餐，今回佢連份功課都煞科埋，真喺乜都輕鬆晒，所以，費事煮兩公婆出街食。大半年前到訪過Cafe Paradise，知道佢嘅水準去到邊，價位又唔太貴，對我哋嚟講又算近近哋，所以，就選址晌度食。


唔知喺臨近年尾，定喺是夜喺周五，個場超多客，爆晒之餘仲有少少人晌門外等位。店內環境裝修簡約，以白與藍色為主調，配點閃亮嘅壁燈同水晶吊燈，我哋被安排晌最入面嘅二人枱，算得上全場最靜局嘅位置！

散叫餐牌包括沙律、小食、意大利飯、意大利麵、主菜等類別，種類較為偏向意大利口味，不過主菜類就集多國大成。店員仲解釋意大利飯、意大利麵一欄，俾$118就可以將$58嘅菜式變為套餐，而俾$128就可以將$68/$73嘅菜式變為套餐，即喺多咗餐湯、沙律、甜品及餐飲，超划算。





至於基本晚餐有7款主菜選擇（$118-$208），包餐湯、沙律、主菜、甜品及餐飲，同樣喺抵食之選。



是日餐湯 餐湯喺野菌忌廉湯，野菌打得幼細，故個湯嘅質感都幾順滑，然而，菌味不過不失，再強啲就故然更有個性，依家個味道都還可以。



田園沙律 今次嚟見佢個田園沙律唔再喺油醋汁撈沙律菜咁寡，而喺加咗啲車厘茄，粒車厘茄應該輕焗過，所以，意外地又甜又茄味濃。

由於晚餐選擇比較多紅肉，如肉眼扒、豬手、牛仔肋骨、羊膝及豬鞍，咁啱個白酒海鮮薯意大利飯又無咗，所以，唔太啱佢食。就改為晌散點餐牌度揀，再轉為套餐，結果同樣揀番意大利飯。



海鮮南瓜汁燴意大利飯 $128（套餐價） 散點就$73客，依家補多$55就轉為套餐。南瓜汁意大利飯非首次食，晌Fiat Caffe嘅栗子菠菜南瓜意大利燴飯老婆就讚不絕口，但今晚晌度遇到嘅海鮮南瓜汁燴意大利飯，佢同樣超讚。飯粒煮出嚟極致分明，入口好煙韌而咬口，帶有濃香嘅南瓜味，海鮮料包括鮮蝦、魷魚、青口及蜆肉，幾鮮甜，用料不賴。



208克美國頂級肉眼牛扒配燒汁 $208（套餐價） 208克所言非虛，上枱時件扒真喺有塊面咁大，一身焦炭色，實在誘人，要求5乘熟，切幾刀，都做到要求，帶點血紅卻無血水滲出，肉質頗軟腍，又有肉味，只喺有些微筋位。配菜有扒蕃茄、翠玉瓜同露筍仔，喺扒燶咗少少，反而個薯蓉有驚喜，除面面加撮蟹籽，薯蓉內仲混入黑松露，真喺既軟滑，又幽香。





芒果蛋糕 +$25 晚餐甜品喺老婆最唔鍾意嘅木槺布甸，但好就好在可以加錢轉其他甜品，所以，二話不說就轉個芒果蛋糕。其實賣相就有啲普通，好傳統鮮果忌廉蛋糕，不過，海綿蛋糕鬆軟有回彈力，忌廉打得幼滑，啲芒果亦鮮甜，做足基本質素，只喺款式叫大路啲。



意大利芝士餅 +$25 外觀睇落唔錯，一層濕潤嘅海綿蛋糕，一層馬卡風芝士，不過，蛋糕所浸嘅咖啡酒唔夠突出，亦唔夠濕透，還好嘅喺啲芝士層軟滑。然而，個人就唔鍾意餅底加層朱古力脆餅，唔多夾意大利芝士餅嘅質感，而且，佢層餅底做得比較硬。比起上次嘅檸檬撻，水準有啲回落，亦無以前做出嚟嘅賣相好睇。





檸水、咖啡 餐飲我哋就無刻意揀啲咩嘢，老婆健康緣由就揀熱檸水，我就簡簡單單飲杯即磨咖啡，牛奶喺加熱咗，感受到服務都唔馬虎。



今晚再訪，老婆好滿意佢哋嘅菜式，亦對比起半年前光顧嗰次，菜式都有改善及提升，服務方面仍保持禮貌、殷勤，感到一班後生女侍應幾有活力。因為地點方便，老婆都話下次可以帶朋友嚟一齊試。
個人評分 味道：8/10
環境：8/10
服務：9/10
抵食：8/10
平均每人消費：HK$215
餐廳資料：
Cafe Paradise
長沙灣長沙灣道638號地舖
3709 8103

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================