1月21日(星期六)~依日約左小奧+baby笠友聚
小奧問我想全馬/半馬? 難得有心聚..梗係全日全馬啦
星期六baby笠要返工~我意思..全馬等佢放工即刻開始ma
點知..攪到笠特登請假~真係唔好意思! 不過好在請半日(哈哈)
次次有聚會都好興奮~有時會瞓唔著好期待去玩+聚既心情
同baby笠傾開..佢都話有! 但男士就無依d感覺..唔知點解?!
* * * * * * * * * *
朝早起身收拾好屋企~等佢地通知出門..我地先預時間去"稻坊"
之前講左大約10:00到荃灣飲茶~飲到11:30埋單..打的上"城門"
依日天氣超好..行山一流~老闆同小奧行前面..我地行後面
全程邊行邊傾..完全無停過(哈)~行到中段..老闆話行完去食tea
我估佢應該開始肚餓~平時行山..我話帶定"朱古力"江湖救急
佢又話唔駛~依日好在baby笠有朱古力脆餅~可以補充熱量
行完山..差不多15:30~唔想呆等van仔..所以行落去坐巴士
由於時間關係(要爭取時間返屋企玩..哈哈)~我地要分頭行事
老闆同小奧先去拎貨>買湯圓>炸雞>洗衣液>屋企
我同baby笠買餸>屋企~返到去..即刻食炸雞送啤酒先
"Kokio炸雞"..之前食過幾次唔錯~今次炸到超乾
![]()
baby笠間中會去KFC~所以叫佢攞定d胡椒粉送雞
原本想分頭行事..每人拎d~估唔到佢拎左咁多(哈哈)
所以我地唔駛拎~不過依家KFC d胡椒粉..唔香既
![]()
食完雞..我煮定蘿蔔做湯底~佢地收拾..準備開局(每人有5萬)
雖然開左局..我都唔得閒四圍藤來藤去~玩就即刻坐返低
開頭話試玩~唔知試玩左幾多舖(仲試玩緊)..有舖我嬴好多錢
好開心大笑拎晒d錢~佢3個呆左..話試玩之喎! (即時心情大跌)
之後..老闆襯小奧去洗手間~教笠玩"三公"(唔駛1分鐘輸左$20)
baby笠同小奧投訴..話老闆呃佢錢(但小奧無反應..哈)
跟住仲衰..老闆洗牌偷左我$10000~奇怪佢做咩奸笑
一定唔係好野啦~好在之後發現咋..即刻攞返(哈哈)
![]()
笠上次買比老闆聖誕節禮物既"啤酒糖"
我話等埋一齊試ma~依日開黎一齊食
![]()
玩到7點..收局~我同笠快手入廚房準備火鍋先
男士就收拾檯~下午分頭行事時..同笠去買餸超急趕
要買雞+椰子水~諗住近d去Aeon睇下有冇斬左"半隻雞"
其實都知無..不過想博一博~真係冇! 要即刻去一田買
再急步去街市~幾驚笠行唔到咁急..一陣暈底就大鑊啦
老闆打黎問我地係邊~話做咩咁慢? 我地已經勁急趕
不過街太多人~又要走幾個場..邊得黎咁快喎! (完全唔體諒我地既)
晚餐有baby笠幫手~快手快腳..19:30攪掂! 影埋相食得
![]()
"水餃, 雲吞, 魚皮餃"
![]()
"豆卜, 脆鯇腩"
d魚食唔晒~第2日煮"脆鯇魚菜湯"比老闆做午餐
![]()
"響鈴"..baby笠幫手用白鑊慢慢煎返脆
不過入口陣油味好怪~唔係益..但唔知點形容
所以我話唔好食..掉左去(一陣食壞身體仲衰)
![]()
必食.."炸魚皮(x2)"
![]()
老闆話想食雞~所以買半隻
![]()
屋企仲有日本旺菜~湯底有蘿蔔..所以唔買菜
![]()
"椰子湯底"..有蘿蔔, 粟米, 魚片頭, 雞腳, 魚頭, 椰子水
![]()
食到差不多10點~洗埋碗+慢食生果..再開局(哈哈)
![]()
下半場..玩到我有d火~玩鋤大D..一直無講"炒雙"架ma
有舖我好多牌無機會出~小奧想出大D2..老闆阻一阻佢
仲教佢唔出牌..等我炒雙分多D錢乜乜乜~玩咁耐又唔講
小奧再想出又再阻~雖然小奧最終都出大D2..我都要炒雙
但我覺得好唔公平囉~要解釋"炒雙"..應該完左果舖先講
唔係玩緊果陣講~=打麻雀都唔會..打緊叫人唔好出乜乜乜
我堅嬲! 雖然話玩..唔係真錢~正因為老闆平時處事都係咁
永遠只對我做出d最唔公平既事~從來唔會理我感受架(衰)
之後我追住佢黎殺~炒返佢幾舖(第2朝佢好話我牌品差+脾氣臭..衰!)
玩到1:00am..小奧話要走啦! call的士..好快返到屋企
依日好開心..可以15小時全馬開心友聚(多謝你地啊)
![]()
依隻"白色加菲貓"..係拍拖第一年~老闆係韓國買比我
之前唔會入袋~因為想成日可以攬下佢~不過早幾年
去洗衣店幫貓貓沖涼..爆左線~店主幫我修補返咋
加上貓貓年紀好大..唔可以再沖涼
今次多得小奧+baby笠搵左5個大袋比我(Thx 33)
換袋先有機會..可以攬攬
![]()
換左袋..精神晒! 另外..兩隻bear bear係媽咪送既
粉紅色果隻幾得意+d毛好柔軟! 不過最唔想收到囉
上年7月..媽咪10D9N暫宿~係房見到隻粉紅bear bear
話一隻咁悶..送個朋友仔陪佢喎~係媽咪個院友親手織既
不過點都好呢! 最緊要媽咪依家身體健康..我就安心囉
![]()
============================================
感謝 Yanomi 提供以上資料
Yanomi的網誌: http://yanomichung.blogspot.hk//
============================================
[ 今日講咩 ]
