day打算轉工期間休息長少少時間，話晒畢業第一份工做到而家，都未真真正正好好休息過，放假好多時都俾我拉咗去旅行，既然諗住休息一兩個月，我哋去一個星期旅行都ok吧？heehee～逸bb嘅百日宴之後個星期我哋就出發了，好學生嘅我，星期四要返學，當然後星期五出發星期三返香港啦﹗
目的地方面，我再一次要係去唔去韓國之間掙扎，未學韓文之前成日去韓國，計埋今個學期我學咗兩年半了，反而呢段期間未去過，但今次一月係韓國全年入面最凍嘅時間，行李又會好多，揹住曉又會好辛苦，曉(同埋我)又唔係好捱得凍，結果都係理性地打消咗呢個念頭～最合理嘅目的地當然係新加坡了，可以避寒之餘，美姨移民去新加坡咁多年我一直都未去探過佢，加上而家新加坡多咗咁多新嘢玩，好多家庭帶小朋友出門第一個選擇唔係去沖繩就係去新加坡了，好吧，gogogo﹗
今個trip嘅blog命名為「new新加坡」，因為講我自己去新加坡嘛，嚴格嚟講真正有入境去旅行嘅算係第三次，但頭一、兩次都係小學時嘅事lu，一次就係跟旅行團去「星、馬」(當年新加坡仲係普遍地稱為星加坡呢)，另一次就係去澳洲時飛新加坡，回程時停留多兩日，呢兩個trip印象唔係完全冇，但就只剩低零零碎碎嘅記憶片段，對於我嚟講今次係全新新加坡啦﹗
日日都好忙，結果出發前只係book咗機票同酒店，去嘅地方都只係略略咁睇過，大景點就有同美姨商量過少少，見步行步吧﹗第一日去到只有晚飯，第二、三日我哋都同美姨一齊，唔駛plan咁多住嘅～
曉曉，唔夠位啦，帶唔到Daisy同Dora去啦～
出發嘅早上執埋行李，下晝兩點幾嘅機，我哋早上十點幾就趕住出門了，點解？因為個小朋友要瞓覺，如果係屋企瞓著，整醒佢出門口就無謂啦，屯門人最好就係搭車瞓覺了﹗去到機場未可以check in，曉又未瞓醒，我哋逛一陣商店先，買咗兩本書，一本俾曉嘅可愛兔兔故事書，一本就我哋兩個睇嘅東野圭吾，但結果返到香港都未揭過﹗﹗原本有諗住睇下有冇啱嘅自拍新器，但day想買有得末端分叉三隻腳可以變腳架嗰啲可以同曉曉錄jam歌，唔係好睇得啱添～時間差唔多曉又醒咗，我哋check in後就入禁區搵嘢食﹗
我哋去咗食百樂潮州酒家，諗住可以叫下點心飯麵之類，對於百樂嘅認知，除咗係香港都比較有名嘅潮州酒樓之外，另外好似就係當年我喜愛嘅Zarahn嘅貝氏兄弟屋企人嘅餐廳呢，不過我都係第一次食，我哋叫咗一個炒飯、一個潮州粥、一籠叉燒包，原本諗住就咁就夠，waitress提議我哋叫碟菜食下，菜？好丫﹗餐牌都冇睇就叫咗，點知變咗全餐最貴嘅一碟食物～>.<" anyway，中式酒樓嘅好處就可以坐耐啲，我哋慢慢食完再過去登機都好輕鬆～
曉曉做得好，有入有出，食飽飽，我哋可以享用埋機場嘅靚靚育嬰室換個x片先上飛機，咁就安枕無憂啦～
出門著咗啱啱新網購嘅親子衛衣，今次呢間買啲衫都好靚呢，但聽講話係韓國訂番嚟，我等到頸都長～
爸爸都要同曉曉自拍一下﹗
原來閘口附近有得睇卡通片﹗
上飛機之前當然要指定動作啦～
今次係曉第四次海外旅行，9m時去嘅馬來西工吉隆坡+檳城，11m去嘅台灣台北+清境，16m去嘅北海道，今次就係21m嘅新加坡，暫時未衝出亞洲，但搭飛機經驗都好豐富了，無奈去程嘅飛機媽媽一啲都唔輕鬆﹗飛機都未起飛時已經要接受挑戰﹗事關我哋帶住bb，就被安排坐係最前排，手提行李冇得放係前面坐椅底，唯有全部放晒上頭頂嘅行李架，諗住有少少圖書、少少玩具，可以等飛機飛定先再慢慢拎「曉曉娛樂袋」嘅其他東西，點知安全帶燈著起，飛機等候起飛，連空姐都已經坐定定時，曉曉居然非常極度超級想飲水﹗不停叫「飲水水～飲水水～」，但水樽放咗係背囊，叫佢要忍耐一陣，又解釋俾佢聽，搵其他嘢嚟分散佢注意力，都只係可以keep到30秒左右，轉個頭又再大叫「飲水水～飲水水～」﹗我哋身上有嘅「水份來源」，諗嚟諗去只有媽媽奶，但我已經好耐好耐冇著哺乳bra/哺乳衣/帶餵奶巾出街，要埋身真係有啲論盡，但為個女其實其他嘢都可以豁出去，奶奶頂住當先啦，好在俾佢都肯啜，不過曉好公度，想要水水就係水水，我好不容易俾咗奶奶佢，飛機飛穩咗之後佢離口，結果都係要飲水水～好啦好啦，有得飲啦，回程時我哋一定會記得了﹗
之後嘅三個幾鐘都唔容易，佢又唔係好喜歡食啲飛機餐，只食包包同雪糕，長通粉都只食一兩啖～好在而家大個少少識得睇飛機上嘅電視﹗16m嗰次只識睇下卡通片片尾嘅跳舞，都唔係好理解到故事內容，但而家熱愛Peppa Pig嘅佢已經係卡通片小fans，飛機上雖然冇得睇Peppa Pig，但有個Baby First嘅「Harry the Bunny」節目，曉喜歡得不得了，兔兔做好多日常生活嘅嘢，好似玩玩具、照鏡、瞓覺、淋花等等，曉唔識聽英文，亦唔肯戴headphone，佢只係睇住畫面冇聲但都笑到卡卡聲，我都覺得好amazed﹗﹗另外之前係Facebook網店買定嘅貼紙書係今個旅程亦擔當非常重要嘅角色，雖然我買咗一套18本，帶咗3本去旅行，但一本Colours曉曉就好夠玩了，睇咗好多次都未貼完第一本，佢好喜歡封面嘅熱氣球，因為可以配合平時唱開嘅「Balloon」歌指住嚟唱，入面嘅小動物亦好可愛，有好多日常生活唔同嘅場景，唔貼貼紙齋睇都好有趣味～
佢就係Harry the Bunny了﹗
曉曉娛樂袋除咗玩嘅、睇嘅之外，食嘅當然有啦，提子乾依然係favourite，帶咗啲迷你麥精去都冇飲過添～玩咗兩個幾鐘，好在最尾一個鐘佢都有瞓覺，我可以自己睇下劇，不過瞓得唔冧，間中醒咗又喊，我又要企下咁，落機就已經筋疲力盡了﹗太好了，終於嚟到新加坡了，要知道，三個鐘十五分鐘對於大人嚟講一啲都唔耐，但對於呢個21m嘅小人仔嚟講，未起飛就話要「落車」嘅情況，呢段時間係有幾咁長﹗
可以快快出番市區，check in酒店然後去食晚飯就好lu～
待續
前往其他新加坡旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 245704
全部攻略 705
全部回應 10
