原本考慮之後花一個full day去Singapore Zoo同埋正正係隔離嘅River Safari，美姨提議今日我哋下晝就去Singapore Zoo了，因為地點好遠，佢可以車我哋去，一心諗住新加坡地方唔大，遠極有限，原來Singapore Zoo嘅位置可以想像成羅湖咁，差不多去到邊境，搭公共交通未必去唔到，但如果自己坐車去都可能真係花好多時間，咁車我哋去梗係好啦～
去到時下晝兩點幾，距離公園關門只有四個鐘，我哋決定全力玩Singapore Zoo了，唔好咁多心想去兩個park，入到去發覺果然係正確嘅選擇，因為入面好多嘢睇好多嘢玩丫，玩一日都唔嫌多，不過買門票時我哋加多S$5買埋tram ride門票，呢個就真係徙咗錢了，因為我哋入到去完全徒步，一次都冇搭過，因為又要係指定地方等，行車又只有單方向，想free啲都係行路算數～而家上網睇一睇，原來事先上網買定飛平好多﹗平日有九折，peak有九五斤，係super peak先至買番原價～所以如果一早計劃好行程，一定要提早上網買飛，又可以節省排隊嘅時間呢～
入到去見到有各種「租車」服務，上次去北海道嘅旭山動物園(請參閱：2-9-2016：北海道三人行day 6(part 1)．旭山動物園(上)之「葉公好龍」)，園內bb車全部免費任用，嗰次曉又肯坐，我哋輕鬆唔少，新加坡唔少大型景點都有bb車，但全部都要俾錢租呢，Singapore Zoo特別嘅係，除咗有傳統bb車之外，仲有可以坐兩個小朋友嘅手拉車，啲小朋友坐得特別高興呢～今次我哋就冇考慮租喎，曉跑步步+輪流揹應該都ok～
睇一睇啲show嘅時間，兩點半有一場Rainforest Fights Back Show，我哋先直接行過去了﹗
行過去睇show途中會經過Zoo-rassic Park，其實係一條以恐龍模型裝飾嘅路，第一次去動物園有得睇恐龍﹗George(Peppa個細佬)同埋其他恐龍迷見到一定會好興奮﹗我就不太好，如果有聲識郁又大隻嘅就更加驚了～
又經過睇企鵝﹗同一個水池有埋介紹海獅，但見唔到佢哋係入面嘅？
曉好喜歡呢幾個，影完一個又要影另一個，有斑斑(斑海豹)呀～
我哋去到劇場時仲有時間，搵個靚位坐一陣先，day話要眠一眠喎～
Rainforest Fights Back Show個名好似好dramatic咁，原來係介紹各種熱帶雨林動物嘅教育活動，並唔係訓練佢哋做乜做乜嗰啲，亦唔係有劇情嘅話劇～
有趣嘅係，啲動物會由唔同位置出現，有啲會有舞台嘅一端奔跑去另一端一閃而過，有啲就會由頭頂嘅麻繩catwalk咁出嚟，曉曉睇動物都睇得好開心呀，雖然唔識聽英文，但一直都好專心留意住動物出場，而家問番佢去新加坡有咩睇，佢都會答「睇馬騮﹗」～
最驚嚇嘅係蛇嘅部份，兩個工作人員唔知幾時開始就抱住條蛇坐係觀眾席當中，大家一發現時嚇餐死，個host問大家有冇人怕蛇，我都舉咗手，但原來如果怕有0-10的話，我可能只係有2-3怕左右，因為有個女人一發現啲蛇即刻彈開幾米遠，呢啲先算真怕﹗﹗
睇show都學到新知識，你有信心分辨馬騮同猩猩嗎？大家可能好有自信，但你腦海中都係卡通入面最典型嘅馬騮同猩猩樣吧﹗如果係好大隻嘅馬騮或者好細隻嘅猩猩又如何？原來馬騮有尾巴，猩猩同我哋一樣係冇尾巴㗎，而猩猩嘅手亦比較長～講到呢個，我諗起後來我哋後來睇鱷魚，我哋細個時咪A for apple、B for boy嘅，我哋今時今日咪好不滿點解變成A for alligator嘅，crocodile就crocodile啦，做乜鱷魚又要整個alligator出嚟？﹗今次去動物園至知，原來佢哋係唔同㗎，你要叫條鱷魚合埋口，原來alligator合埋口時只見到上排嘅牙齒好整齊咁露出嚟，而crocodile的話，上下嘅牙齒都會交錯咁露出嚟，而家知道了﹗
而成個show最令人歎為觀止嘅係closing時啲雀鳥出嚟嘅部份，孔雀見過好多次，係印度時連野生孔雀都見過，但孔雀開屏真係未見過，今次迅雷不及掩耳，毫無預兆之下，白色孔雀開屏了﹗﹗大家都「哇～」晒出聲，但令人感到傷感嘅係另外一隻彩色孔雀完全唔show嗰隻開屏孔雀，而開屏嘅白色孔雀一而再再而三咁登一登自己個屏，令佢哋擺動得更動人，但對方依然不為所動，我係度諗，其實白色孔雀係咪albinism？彩色孔雀睇佢唔上眼？所以白色孔雀只係一廂情願咁示愛？慘慘～
睇完show我哋就先趕去小朋友區Kidzworld，因為曉唔知幾時會眼瞓嘛，都係趁佢未瞓之前去咗先﹗
途中又睇下動物，今次曉曉大個咗啲，唔驚動物了，見到象象都會指住叫象象，講佢知象象係個窿窿度捲啲草出嚟食佢都留心聽我講～
仲有猩猩﹗
雖然係假日遊人都多，但勝在地方大，依然好多空間俾小朋友跑步步～
嚟到Kidzworld了﹗
Kidzworld最吸引人目光嘅肯定係大型玩水區，我哋唔知道今日會嚟Singapore Zoo，更加冇諗過會玩水，當然冇帶定泳衣啦，如果要去玩，曉之外起碼我同day是但一個都要落埋水，曉又冇表示好想入去玩水就算數了﹗
估唔到嘅係，佢主動想玩嘅係跳彈床﹗﹗因為最近好喜歡Peppa Pig，Peppa同佢屋企人、唱遊班嘅動物小朋友個個都好鍾意係泥氹上跳上跳落、跳上跳落，曉就學識咗「跳上跳落」呢個term，佢見到小朋友係彈床度玩就指住話「跳上跳落」，問佢想唔想玩就話想了，眼神非常熱切呢，好啦，S$5/10分鐘，排隊時見我入埋去的話體重都冇超標，問准工作人員，我都可以俾錢入去一齊跳，梗係好啦，可以照顧住佢嘛﹗出發去旅行前嗰幾日，曉去海洋公園嘅吹氣彈床玩得好開心，諗住呢個真彈床都ok，點知入到去原來太刺激～佢唔識自己跳，但我跳嘅時候彈起佢佢又驚驚，唯一ok嘅係我抱住佢嚟跳，本身跳彈床以經要好用力，跑住廿幾磅嚟跳真係捱唔到幾耐，放低佢休息一陣，曉直情話要出去，吓？俾咗錢唔好浪費啦，我其實真係好鍾意跳彈床，哈哈，令人回味當年中學上PE堂嘅日子，我都跳得幾好㗎～但當見到有小朋友係度排隊，望住我呢個大嬸一條友係度跳彈床，件事實在太奇怪了，問咗曉曉真係唔想再入番去玩，我決定提早出嚟啦，唔好阻住其他小朋友了，呢件事實在太搞笑～
跳完彈床見到Kidzworld嘅Animal Friends Show開始咗冇耐，我哋又去睇下，順便坐一陣休息下，原來係啲接受咗訓練嘅狗狗嘅演出，每個環節都有邀請小朋友出去玩，都幾有趣，不過啲狗狗狀態似乎唔係太fit，有個位連練十幾次都唔服從命令，都唔知點收科，因為曉眼瞓了，我哋都冇睇埋落去提早離場啦～
我哋沿路睇下唔同動物﹗
呢度嘅爬蟲動物區真係同屯門市鎮公園嘅爬蟲館唔同規模，蜥蜴又好長又大，龜就更加超級大，影相影唔出有幾驚人添～不過更加驚訝嘅係居然要幫啲龜加熱，新加坡天氣已經夠熱啦，仲要幫佢哋開暖爐﹗
我哋遠處見到一個建築物外牆係啲網網，好似以前海洋公園入去睇雀鳥同蝴蝶嗰啲館咁，本身諗住入去睇可愛嘅雀雀，去到門口先知原來係俾你近距離、無障礙咁親親蜥蜴呀龜呀咁～我？唔駛咁刺激了～
有喜愛熱嘅動物又有喜愛凍嘅動物，Singapore Zoo嘅北極熊係度出世㗎，不過佢匿埋咗係房入面涼冷氣，淨係睇到佢遠遠嘅身影，唯有影個公仔啦﹗北極熊個館好大，入面好多資料，印象最深刻嘅係講北極熊嘅母乳，原來北極太凍了，北極熊媽媽奶嘅成份有接近一半係脂肪，而人類同埋牛嘅脂肪比例都係個位數字，係母乳媽媽group成日有媽媽擔心自己啲奶嘅脂肪層比人哋少，又懷疑自己啲奶脂肪少bb會容易肚餓，又求教點樣可以更加奶嘅脂肪等等，其實造物主咪就係按bb需要去創造囉，北極熊bb有北極熊bb嘅需要，我哋人類bb有人類bb嘅需要，即使冬天同夏天嘅脂肪比例都唔同啦～各位母乳媽媽要對自己有信心呀﹗加油～
我哋路過猩猩嘅自由活動區，原來佢哋啲繩索真係會跨到好遠嘅樹度，分分鐘佢哋會係你頭頂路過呢～
我真係好想睇長頸鹿同斑馬，上次去旭山動物園時長頸鹿剛巧身體抱恙冇同大家見面～
搵到佢哋了﹗時間唔多，唔可以慢慢觀察佢哋嘅動態，急急影張相就要走啦，因為公園差唔多要關門了～上次去番禺嘅動物園就有得慢慢睇長頸鹿～(請參閱：5-4-2014：番禺清明遊day 1(part 2)．長隆香江野生動物世界)哈，啱啱睇番篇blog先知，原來嗰次都有得睇恐龍喎～
係非洲動物區，長頸鹿同斑馬附近見到「warthog」(左圖)，我哋記得丁滿與彭彭嘅彭彭好似就係warthog，所以⋯佢旁邊嘅應該肯定係丁滿吧？(day深信⋯)
好不容易睇完，動物園差唔多關門，我哋約咗美姨pick up嘅時間又差唔多到，要急急腳急急腳行番出去正門，我仲想去souvenir shop買嘢呀～好在都揀到送俾逸逸嘅圖書同埋買俾自己嘅mug，我最鍾意就係去旅行買杯，今次係斑馬杯嚟㗎～
臨走係正門再影番個招牌先～
之後嗰篇blog講到美姨帶我哋去食好嘢，大家要繼續留意呀～
Singapore Zoo官方網站：
http://www.zoo.com.sg/index.html
待續
前往其他新加坡旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247489
全部攻略 705
全部回應 10
