龍島美食店 Lucullus：公朱同好（17）

好耐無寫過朱古力系列食評，一來有啲朱古力小禮物無得寫，唔通收盒金莎都寫一大篇咩，二來有時喺朋友買嚟一大棚人一齊分享，咁就唔太方便影相、寫食評。最近過年前就收到朋友嘅大禮，龍島朱古力嘅「雞年賀歲朱古力及曲奇禮盒」，紅底金線年花包裝盒，連埋金絲帶，一片喜氣洋洋嘅感覺，送禮真喺非常得體。


禮盒內包括10款朱古力，粒粒都唔同，立體造型並有唔少款式喺同賀年相關，此外，亦有10片曲奇，共5款口味，全獨立包裝，衛生方便。怕你收到盒禮盒唔知咩味打咩味，一大張示意圖就清楚不過。



右邊喺朱古力，粒粒的骰，但造型別緻，10款口味包括番石榴軟心朱古力、榛子奇脆牛奶朱古力、杏仁糖碎純黑朱古力、福雞報喜榛子脆米純朱古力、福字牛奶軟心朱古力、富貴大吉橘味朱古力、大吉蘋果軟糖純朱古力、桃花黑加侖子朱古力、四兄弟原粒榛子純朱古力、威士忌酒心朱古力。小弟只試咗其中部份款式。



番石榴軟心朱古力 外層嘅朱古力殼做得夠薄，一口好脆口，內餡嘅番石榴軟心既柔滑，又帶有好出嘅番石榴味，真喺好食。





福雞報喜榛子脆米純朱古力 外形就自然最應節，呆呆嘅雞樣內裡喺榛子、脆米、純朱古力嘅組合，食落非常有口感。



福字牛奶軟心朱古力 依一粒除咗心朱古力面做咗個福字，其實，就唔算好特別，中間嘅軟心亦無番石榴嘅軟心咁滑。





富貴大吉橘味朱古力 除咗外形做成大吉之外，唔止有姿勢，仲好實際，中間嘅橙味朱古力好突出，真喺講得好有橙香。





大吉蘋果軟糖純朱古力 跟以上幾粒，依一粒做法又有少少唔同，中心都喺純朱古力，而蘋果味喺嚟自中間粒軟糖，煙煙韌韌，又幾好食。





桃花黑加侖子朱古力 跟富貴大吉橘味朱古力差唔多，除咗外形有少少別緻之外，味道上黑加侖子味香甜突出。



四兄弟原粒榛子純朱古力 比較難切開，就一啖放入口，薄薄嘅純朱古力外殼下包住香脆嘅原粒榛子，簡單而好食。

而左邊一排喺曲奇， 5款口味分別喺金元寶原味曲奇、紫薯曲奇、士多啤梨雲石曲奇、朱古力糖薑曲奇、亞麻籽曲奇，因為每款口味有2片，所以，全部口味都試一片。



金元寶原味曲奇 原味嘅牛油曲奇，雖然牛油味唔算好犀利，但口感好鬆脆。



紫薯曲奇 一身紫衣，不過，無期待中咁有紫薯味，嚟得比較淡淡嘅紫薯而已。



士多啤梨雲石曲奇 5塊曲奇中，最靚就喺依一塊，做成雲石紋，味道帶少少士多啤梨香味，味道唔錯。



朱古力糖薑曲奇 咁多款，最得歡心要數依一塊，因為既有濃郁朱古力味，薑味又夠突出，個性最鮮明。



亞麻籽曲奇 曲奇內混有好多亞麻籽，咬落質感就更加鬆脆有口感。

以往食過好幾次龍島嘅朱古力，都知有一定嘅質素，今次應該喺第一次食佢啲曲奇，估唔到同樣有水準，再次多謝朋友嘅餽贈。
個人評分
味道：8/10
環境：- /10
服務：- /10
抵食：- /10
平均每人消費：HK$0（朋友送贈）
餐廳資料：
龍島美食店 Lucullus
葵芳興芳路223號新都會廣場L3層358A號舖
2426 2121

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================