櫻之滙素食料理 Meet At Sakura Veggie：適逢其滙

同幾個以前做酒店嘅舊同事約食團年飯，講講吓原來都好耐無見，對上一次就喺舊年晌尖東「御苑皇宴」搞嘅團年飯，不經不覺又一年。適逢其會，今次再搞，有提議依間「櫻之匯」，小弟都幫襯過，覺得啲嘢唔錯，食素又健康啲，可惜，原本諗住6個齊晒腳，最後一行都喺好似舊年咁得5人！


環境唔多講，以前食評都描述過，簡單嚟講就喺裝修簡單，環境光猛，就算閒日都有7、8乘滿。餐牌方面亦唔多累敘，因為跟以往嘅都喺一樣，包括壽司、壽司卷、手卷、刺身、小食、沙律、天婦羅、小菜、中式粉麵、糖水……等等，只喺貴咗，對比上次食評餐牌啲價，加幅都有10%之多。



鮮淮山蟲草花雜菌雲吞翅 $92 嚟一窩湯翅潤潤先，戒食魚翅多年，素翅就放心食，而個湯翅嘅份量都幾大，一大窩，連料每人分到兩碗咁滯。個湯底OK啦，勝在料多，不過，啲素雲吞麻麻哋，雲吞內主要喺啲素肉，其實搵番啲素菜、木耳、筍絲包仲好。 





壽司拼盤（2人）12件 $88 壽司拼盤分2人或4人分量，前者有12件，而後者有20件，我哋志在過吓癮，點客2人份就可以了，有和牛壽司、鮑魚壽司、吞拿魚壽司、三文魚壽司、玉子壽司、中華沙律軍艦、香芒魚生軍艦、腐皮壽司、青瓜紅椒小卷。整體質素好一般，啲飯搓得比較黏，始終唔喺真魚生，口感有啲膠，最好食都喺件腐皮壽司。



古法松子糖醋魚 $68 魚塊都喺啲豆製品加入紫菜捲成，撇除啲外觀似唔似魚塊，其實啲「魚塊」幾脆口甘香，不過，個糖醋似蕃茄汁底，無乜醋嘅酸香，初時仲以為類似松子魚，真喺有少少失望。



日式海鮮比薩 $108 唔喺成底咁上，裁成一客6件，雖然話喺海鮮，其實都唔喺好食得出喺扮緊咩海鮮，反而批面有唔少菠蘿、青椒、車厘茄、栗米等食材，批底做得薄身脆口，又加入唔少芝士，是晚最好食嘅菜式我投比薩一票。





薑蓉炒翡翠苗 $62 好穩陣嘅一道炒青菜，翡翠苗炒得好爽口，滲出絲絲薑味，無論以上菜式，抑或依一道炒菜，份量真喺依然十足，無呃秤。



牛油果醬海鮮蛋白炒飯 $72 雖然話席間女生佔多數，但都怕大家食素食得唔夠飽，所以，嗌番一客炒飯作單尾。個炒飯無咩驚喜，牛油果醬真喺食唔出，蛋白亦得好少，海鮮食落主要都喺啲素蝦，幸好個飯炒得乾身，飯粒夠分明。



腰果露糖水 $72（窩）
佢哋個腰果露非常正，所以，餐後點可以唔叫一窩共享，而一窩夠晒分俾我哋5個人食。腰果露香滑順喉，腰果味十分突出，貨真價實，又相對少甜，大家都讚好。

連埋茶位$5位及加一，埋單每人百三左右，食到飽一飽，都算划算啦。不過，對比起上次同老婆及姨仔嚟食飯，今次所揀嘅菜式，水準明顯有啲回落。但老婆對此店印象好，應該都仲喺後「匯」有期！
個人評分
味道：7/10
環境：7/10
服務：8/10
抵食：8/10
平均每人消費：HK$130
餐廳資料：
櫻之滙素食料理 Meet At Sakura Veggie
太子荔枝角道104號地下
2392 2386

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================