探險家攻略 > 15-1-2017：new新加坡day 3(part 1)．主日崇拜＆PappaRich好味沙嗲

15-1-2017：new新加坡day 3(part 1)．主日崇拜＆PappaRich好味沙嗲

由 Rita 於 2017-01-15 00:00:00 發表 | 累積瀏覽 132

分類：

day 3係主日，我哋一早就請美姨帶我哋去佢平時返開嘅教會參與崇拜，又係約好九點半左右由酒店出門～

先一晚玩得太盡興，三隻豬豬瞓到唔願起身，食早餐就要快少少了，好在曉曉有芝士就充滿動力，食包包都食得好乖～

教會車位唔多，所以美姨先將車泊係旁邊商業大廈嘅停車場我哋再步行過去，原來每個主日相同時間有兩場崇拜，一邊就比較傳統式，另一邊就會活潑啲，會唱多啲新派詩歌，美姨話平時多數參加年輕嗰邊，上次就帶我爸媽去，今日以為係兩邊一齊合堂，同我哋去咗樓上，誤打誤撞參加咗傳統啲嘅崇拜，唔緊要，我乜嘢style都ok的，有時太年輕反而接受唔到^^"～我哋冇係裡面影相，雖然係一排排長跪櫈，但感覺有啲似中學嘅學校禮堂～我哋坐嘅位置係choir旁邊，離祭台都好近，最重要係好近樓梯出口，萬一曉喊起上嚟都可以「緊急逃生」﹗其實有歌唱我就唔擔心嘅，曉好鍾意聽歌，最弊係講道講得長時佢會唔耐煩啫～因為教會歷史都頗悠久，美姨話有啲教友可能係由細係度大，所以choir嘅年齡層都比較高，但誠意依然十足，佢哋有分四部唱歌丫﹗記起之前去Fiji參與崇拜時嘅自動分四部，到而家仍然印象深刻﹗(請參閱：13-11-2011：斐濟蜜月day 7(part 2)．懶洋洋的下午@Lalati．叫人驚異的美妙歌聲)如我所料，開頭嘅敬拜部份曉一直非常專心聽唱歌，其中有啲歌我同day都識唱可以一齊大聲唱添，曉就冇識嘅歌曲～到讀經、講道佢就要開始玩，當有啲嘈時，我唯有帶佢出去緊急出口睇書書，後來靠住同佢貼貼紙書，都可以返入嚟繼續參與～

曉到尾聲時有啲眼瞓，原來主日崇拜後個個星期都會有茶會，大家可以食下嘢傾下計，美姨拎咗餅餅同美祿俾曉，即刻開心晒﹗

曉曉仲食咗人生第一粒珍寶珠添，我哋以為理所當然嘅原來小朋友唔一定識得食，初時可能太大粒，曉食到成個口都係口水又唔識吞，結果漏晒啲口水出嚟，我要不停抹抹抹﹗美姨婆整蠱佢，係佢口中拔咗粒珍寶珠出嚟，即刻爆喊，「我唔識食啫，唔代表我唔鍾意食家嘛～」慘慘～好在啜兩啜又開心番～唔想佢食太多，結果粒珍寶珠都係有少少核突地我哋三份share咗～

臨走係教會大門口前留影～

之後去午飯了，但差唔多到午飯曉都未瞓覺點算？唔瞓覺食飯可能會好論盡﹗希望搭車可以瞓一陣，即使搭車未瞓得著，落車行下瞓一覺先再食都好丫～結果錯有錯著，曉曉有得瞓一陣﹗點解？事關美姨泊車嘅停車場係超大商場連會議中心嘅地底停車場，美姨一心想停係食飯嘅位置附近，但嗰邊啲車位好full，明明電子顯示系統話呢邊有幾多個幾多個位，要兜到搵到為止﹗但轉嚟轉去，話有4個，轉過去又冇位，話有6個，轉過去又冇位，係美姨好堅持嘅時候，曉就係昏暗嘅停車場瞓著了，因為瞓著咗，更加唔怕兜得再耐啲，落車後爸爸揹住都仲繼續瞓多一陣先醒，所以午餐都表現ok啦～

行過商場開始有啲賀年嘅裝飾，曉曉好喜歡呢個十二生肖嘅摺紙擺設～

影完一個又要影另一個～

去到餐廳要排隊，美姨叫我哋去逛15分鐘先再返來，果然經驗冇得頂，我哋15分鐘後返來(做到好準確嘅15分鐘，多謝Pebble運動電子手錶)，啱啱見到美姨嘅背影行緊入去餐廳﹗勁～

去旅行呢次曉都算飲得多甜嘢，放假係咁㗎啦，少啲限制，多啲歡樂﹗美姨點食物嘅時候叫我哋點飲品，曉曉見到杯紫紅色、造型可愛嘅冰沙就兩眼發光，好啦，我哋兩杯飲品三份share啦﹗

飲少少之後要食飽飽先可以再繼續飲㗎～

先有印度烤餅上桌，自從2008年大學畢業嘅長長印度之旅之後，對印度美食總有一份親切感～

主菜沙嗲上場了，雞肉串烤得好香，配上惹味濃郁嘅花生醬沙嗲，好味﹗另外傳統地配搭青瓜、洋葱、米糕等一齊食都好匹配～其他食物有炒河粉同埋海南雞飯，都好好味呀～

曉曉主力食飯，初時我拆咗雞肉串啲肉俾佢，佢掂都唔掂，但後來連竹簽咁俾佢咬，可能覺得有趣，試咗個味就追住要繼續食了～對曉嚟講，當然杯利賓納沙冰先至係佢嘅主菜啦，美姨婆充份地見到佢食完喜愛嘅食物後嘅滿足樣同幸福樣了，令人忍唔住想俾嘢佢食呢，飲到尾食埋西瓜粒、原粒荔枝同埋蒟蒻粒，大滿足～我哋嘅另一杯飲品反而比較平凡，係豆漿紅豆冰，飲落同平時嘅紅豆冰分別唔係太大，造型都冇曉曉揀嗰杯咁fancy～

PappaRich官方網站：

http://papparich.com.sg/mb/

食飽飽諗住用埋餐廳旁邊嘅商場育嬰室換片，可惜只有一格，假日嚟講供不應求要大排長龍，好在女廁裡面可以勉強換到啫～

美姨帶我哋去睇埋呢個商場嘅大大噴水池，原來以前可以出去戶外的，咁就可以切身感受到設計嘅宏大同水嘅威力，而家只可以隔住玻璃嚟望～

係噴水池附近咁啱有間我哋平時係香港成日幫襯嘅翡翠拉麵，而特別嘅係，佢居然附設麵包店，香港嘅翡翠好似冇呢項業務吧？

似乎係新加坡，Pokemon依然人氣好高呢，繼day 2見到Pokemon Run活動之後，今日係商場又見到佢哋～

商場好大，通道好闊，即使人多都唔算好逼，曉曉間中都可以落地行，佢好努力想追住美姨婆，但美姨婆實在行動太迅速，「跑跑跑跑跑～」點解反而距離越來越遠嘅？﹗

下一站我哋去我自己今個trip最期待嘅Gardens by the Bay，大家要繼續留意我個blog啦～

待續

前往其他新加坡旅遊blog