香港地 Hong Kong Day：我的星期六美孚早餐 ~ 美心茶記

原鋪位間美心MX搬去同區另一邊，唔知會轉手俾間咩餐廳接手，最後，原來喺「香港地」，同樣喺美心系，不過，就走茶記嘅路線，美心集團首間以港式茶餐廳為主題嘅食店，其實都唔喺咩新嘢，分店多達十多間，遍佈港九新畀。之前，就曾光顧過奧海城店，知道佢喺以高質素嘅食材為賣點，所以，定價較貼近翠華一類。今早，貪新鮮就同老婆落嚟嘆個早餐。


諗住開咗兩三個星期，會無咁多人，都成朝早九點幾，估唔到門口企唔少人在等位，不過，人流快上快落，都喺等咗幾分鐘就有位。入到裡面，環境帶點復古，但就唔喺搞懷舊，所以，仍有份型格嘅感覺。之但喺，逼逼狹嘅空間感就肯定架喇。





晌門口就陳列晒早餐有乜食，分類為日式、港式及歐陸，共10款選擇，定價進取，賣$31-$38，比同區嘅茶記，大概貴兩乘左右。上文都講過佢以靚料為賣點，所以，餐牌標明採用日本農場雞蛋，絕無抗生素及激素。





黑松露醬鮮雜菇炒滑蛋 $36 老婆揀咗個炒滑蛋，雖然啲蛋炒得都算滑，又幾有蛋香，再加埋黑松露醬嘅幽香，味道確實唔錯，不過，炒蛋得好少，厚多士亦得半件，咁嘅份量真喺連我老婆屬細食型都話唔喺太夠。



絲級奶茶 我無打錯，餐牌真喺印住絲「級」，而唔喺絲襪，亦唔喺A級、B級，而喺「絲」級，真喺唔明佢意思。點都好，奶茶嘅茶底唔錯，幾香茶味，雖然用黑白奶，但又唔會話特別滑到曉飛，感覺同平時晌美心MX飲嘅差唔多。



日式溫泉蛋濃蕃茄澳洲和牛通粉 $38 碗牛通份量就正常啲，一定填得飽，個濃蕃茄湯做得幾好，濃郁鮮活，而和牛又腍又滑，不過同樣份量唔多，我已經撈晒出嚟影張相做記錄，份量就真喺得相中咁多，至於隻溫泉蛋都仲有少少流心，叫OK啦！啲通粉口感啱啱好，有少少咬口，最怕喺啲過腍嘅通粉。







即磨咖啡 去茶記我就一定揀飲奶茶，喺不二之選，但估唔到老婆竟然揀奶茶，所以，小弟就改試咖啡，即磨確喺醇香啲，雖然唔喺咩特色咖啡，但單單嗰份咖啡香，都可以止吓癮先。

是日朝早咁旺場，相信都喺好多人好似小弟咁，正一「新屎坑」，走嚟試新店。不過，早餐嘅質素唔覺得特別高，定價相對嚟比亦有啲偏貴，服務就普普通通咁啦，估計一段時間後，我覺得啲老街坊都喺會回歸附近嘅茶記懷抱。
個人評分
味道：7/10
環境：7/10
服務：6/10
抵食：6/10
平均每人消費：HK$37
餐廳資料：
香港地 Hong Kong Day
美孚蘭秀道1-15, 2-24號美孚新邨地下N10-12號舖
2743 2793

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================