鴻星海鮮酒家 Super Star Seafood Restaurant：死佬營爆盆菜

我哋一班死佬晌年初搞完壇蛇宴，一時興起話不如搞次露營，老實講，我哋都曾經講過話拋妻棄子跳出香港搞外遊，一路都唔成事，所以，初頭都擔心今次露營都喺唔成事。估唔到，雖然未喺一呼百應，但一行9人（7大2細）總算成事，浩浩蕩蕩闖入粉嶺鶴藪。


先頭部隊大概12:30pm到達，嘩！啲營多到呢……，好彩都被我哋搵到個有爐，有半邊枱（因為張枱喺另一營友先霸，佢哋得兩個用唔晒張枱，分半張借我哋用），可以開3個營嘅空地，之後仲陸續見有人嚟，但嗰時紮營真喺插針咁插先得，最後，啲營密到一個貼一個，老友打趣咁話猶如野外劏房。其實，喺有啲人一早嚟到搵啲天幕霸咗成半個籃球場嘅地方，再開營霸多4、5個爐同枱，先搞到啲地方咁擠迫，仲要晌天幕下玩到半夜三更，真喺好擾民兼破壞大自然寧靜！



本來打算BBQ做午餐，夜晚就食盆菜，不過，第二小隊同第三小隊成晏晝3:30pm先到，大家都餓到爆，就一於改改計劃，即時滾番個盆菜當午餐+下午茶。老友孔七兄經HKTV Mall訂咗「鴻星海鮮酒家」嘅「一品銀裝盆菜」（4-5人），$928，但需要憑券自行到鴻星分店自取，咁我哋有車自取都好小事。 



本身個盆菜內喺無湯汁，另附有原味飽汁，加上成個盆菜有保鮮紙包實晒，有巨型紙盒做固定，所以，就算長途跋涉拎到入嚟，都唔使怕會打瀉。而盆菜內整整齊齊埋滿乾瑤柱、花膠、發菜、海參、豬手、蠔豉、魷魚、魚丸、冬菇、雞、鴨、豬皮、蓮藕、扣肉、臘腸、芋頭，而蘿蔔同芋絲則另外以膠盒裝住，望上去非常豐富。我哋再加啲菜、烏冬，夠晒我哋9個人食。



滾起就食得，我哋一班麻甩佬就梗喺唔講衛生架啦，所以，基本不設公筷，想食就夾。食物嘅質素就唔詳細逐樣講，不過，整體而言，覺得用料唔差，基本上我都有試勻所有嘢，瑤柱夠香、花膠咬口、海參軟腍、蠔豉味濃、魚丸爽彈、芋頭粉香……，總之樣樣都幾好食。加上我哋一班死佬應該好肚餓，所以，就食得更滋味，三扒兩撥，就KO咗個盆菜。食飽，餘慶節目就喺行山，先行段短嘅過鶴藪水塘。





順便借少少版位分享是次死佬美食營，話說我哋一班死佬中，有啲喺對食都幾有要求，唔喺話咀刁嗰種，而喺食嘢唔會「求求其其」，所以，夜晚嘅燒烤，絕對唔喺腸仔、牛丸、雞翼……咁普通，有烤羊架、燒春雞、烤虎蝦、燒大蜆、焗龍躉腩、焗桶蠔、烤鮮菠蘿……等等，開埋香檳，小弟都真喺未試過燒嘢食燒得咁豪。













就算第二朝早餐，都新鮮即做炒蛋、雞肉腸多士，以及豬肉腸熱狗，喺帶漏啲茄汁同芥辣嚟，否則就一流。小弟就沖杯熱辣辣嘅咖啡嚟嘆熱狗，老友就索性晌陰寒嘅早上，嘆支熱維他奶，認真「梳肝」。







相隔大家對上一次一齊去露營，相信都有20、30年，今次嬉嬉哈哈渡過兩日，雖然大家都被啲環迴鼻鼾聲騷擾瞓唔到，不過，仍然喺玩得開心快樂！
個人評分
味道：8/10
環境：-/10
服務：-/10
抵食：7/10
平均每人消費：HK$100
餐廳資料：
鴻星海鮮酒家 Super Star Seafood Restaurant
荔枝角長沙灣道788號羅氏商業廣場地下
2628 0323

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================