由 Rita 於 2017-03-01 00:00:00 發表 | 累積瀏覽 445
記得我哋出發去美瑛前見到酒店對面嘅活動嘛？好在我哋由Norokko慢車號出嚟之後，活動仲未結束啫～原來係Furano Wine Festival呀﹗我哋去到時仲好熱鬧呀，又有嘢玩又有嘢食～
入口有大大嘅提子氣球～
曉當時細細個未入到去呢啲彈彈床玩，打blog嘅時候已經差唔多23m，開始有啲競爭力，入去玩都唔怕俾人彈走或者壓扁了～
仲有木塞池～
曉曉同爸爸飲提子汁，好味～飲到變紫色嘴﹗
媽媽試下富良野嘅水果酒先，好香甜，正～我覺得最好嘅係，呢度飲酒唔係用即棄膠杯紙杯，而係借隻玻璃酒杯俾你，俾500yen按金，可以用盡隻杯再俾錢嚟飲唔同嘅酒，還番杯嘅時候先退番俾你，可以用正式酒杯嚟飲以發揮酒嘅口味到最好得嚟又環保～
雞串都好好味～現場即烤㗎～
姐姐陪我玩丫～
我哋訂好咗返札幌嘅火車票，仲未夠鐘開車，去邊度消磨時間好呢？富良野正式嘅景點大多要搭車去，我哋只剩番少少時間，睇下google map，距離富良野駅12分鐘步行路程有個富良野総合 スポーツ公園，唔知有咩參觀價值，又唔知有冇小朋友嘅遊樂設施，既然地圖上係綠油油嘅一片，去行下總係好嘅～
去到先知道原來係運動公園，所有「綠油油」其實全部都係各種運動場嘅草地，有網球、棒球、哥爾夫球、標準運動場等等，我哋去嘅時間冇人用緊，度度都可以跑步步一陣，扮下嘢影下相～
冇咩設施啱我哋玩，享受下綠色同埋空間都好丫～
曉曉，你知唔知呢度係打golf㗎？
驚驚行草地嘅城市人～
到差唔多時間，我揹住曉行番過去酒店拎行李時佢就瞓著咗啦，非常好～
佢呢覺一直瞓到瀧川轉車都冇醒，係去到札幌前半個鐘至起身～小朋友瞓咗，大人搭長途車就輕鬆好多～
醒咗又唔醒得晒梗係爆喊啦，好在仲有半條粟米﹗
喊住食，食完⋯
開心晒～好在架車唔full，除咗查飛時要嚴謹地坐番我哋自己嗰兩個位之外，其實其他時候都可以好free～
去到札幌，今次熟路好多啦，雖然住唔番同一間酒店，但始終札幌駅周邊環境熟悉好多，好容易就搵到今晚住嘅Keio Plaza Hotel Sapporo～
咁多晚酒店之中，除咗登別嘅溫泉酒店之外，今晚最貴，主要因為係星期六晚好full吧，但住起上嚟反而滿意度冇咁高～
酒店係傳統舊式西式酒店再翻新，走廊同房間裝修都好新淨，房間好大，但因為房間大，雙人床嘅左右兩邊都可以落床，即是可以碌落床，之前細房間入面，雙人床總有一邊貼牆放，曉瞓牆邊自己會bang埋一邊我哋就瞓得好鬆動，但今次佢就要瞓中間，又鍾意大字形瞓，我哋就變成好逼啦～而且Keio Plaza嘅房間唔包早餐，我哋第二朝要再出去搵食，好在係札幌站總唔會餓親嘅～
曉好喜歡lift lobby嘅鏡子﹗呢個trip佢好鍾意咁樣整隻手然後講「嗚～」我哋一直都唔知咩意思，直至有次同佢唱讚美之泉時，唱到嗰句「使讚美之泉，流『入』～每個人的心間」佢到個「入」字時就做，先知道呢個「嗚～」嘅意義﹗打blog嘅呢一刻相隔咗半年，佢而家已經唔會做lu～
settle down之後我哋出去食晚飯，因為已經好夜了，都唔想再explore其他新嘢，記得之前day 4去Esta見到有好多食肆，我哋就直接去嗰邊搵食了～食咗好多日和式食物，我哋揀咗間日式西餐廳～
有可愛嘅小朋友餐具，係曉曉新認識嘅麵包超人呀～
食物樣樣都幾好食～
我哋仲食埋甜品添～
以前香港未全面實施食肆禁煙前，曾經有一段時間係大型食肆要劃三分之二嘅座位係非吸煙區，估唔到日本呢度有「吸煙時段」同埋「非吸煙時段」，可惜晚市嘅繁忙時段係吸煙時段呢，咁一家大細嚟食飯咪好唔方便囉～
係札幌駅附近走動時，幾次經過呢間丼飯店，次次見到390yen嘅親子丼廣告都會讚嘆，日本人就好啦，可以咁平食lunch，但我哋去旅行只有8日，即是只有16次午+晚餐(扣除搭飛機嘅飯餐根本就冇16餐)，我又唔想花其中一餐係度食超平親子丼喎～
之前講過曉曉到第五、六日左右開始思鄉，我哋返到去酒店時佢又姨媽又婆婆咁叫，好啦，我哋同佢哋Facetime啦，以解相思之苦～曉，我哋聽日就返香港啦～
前往其他日本旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 246977
全部攻略 705
全部回應 10
